फिलिप्पि 2 - धिमालख्रिस्टको नोइका 1 एदि ख्रिस्टता हिका नेलाइको ज्यान नेलाइहेङ हिमत पिका हि पानु, वाको माया नेलाइहेङ थुमथुमाइ पिका हि पानु, नेलाइ पुनित हाङसाता सङगति पासुखेना पानु, नेलाइ ए भेनेङहेङ दाया रो माया पासुखेना पानु, 2 कासेहेङ लेङचापालि नेलाइ एलोङदोङ मनको जेङतेङ, एलोङदोङ मायाता हितेङ रो एलोङदोङ बिचारको जेङतेङ हिसु दोअ्तेङ का नेलाइहेङ बिनइ पाखा। 3 नेलाइ ताइको खिनिङ भालाइ भोतेङ हाइदोङ मापासु। नेलाइ बारालि बुङ माभोसु रो बिथाता तुजुकि जेङलि हाइदोङ मापासु। कालाउ ए भेनेङदोफा नोइका जेङसु रो बोमिगेलाइ ताइमिखान्तेङ मानलाएक हि दोअ्तेङ फोमपासु। 4 नेलाइ झाराङ ताइको खिनिङ भालाइ पालि माभोसु। कालाउ बोमिको बुङ भालाइ पालि भोसु। 5 नेलाइको इसिका मन ह्याको, जाइ ख्रिस्ट इसुता हिघाहि। 6 वा परमेस्वरको बानाबर हितेङ बुङ ताइको लाभको भाअ्सिङ हेअ्लाउ बुङ वा परमेस्वरको बानाबर जेङलि माभोहि। 7 भुरुङ वा गोताङ थोक लाअ्हि रो बान्धाइ भाइपाङ जेङहि। कालाउ वा केलाइभाइपाङ द्याङ जेङतेङ जोन्मेहि। 8 वा द्याङ जेङतेङ इदोइ सुमिङता हिलाउ ताइमिङहेङ नोइका बान्हाइहि। कालाउ वा सिका पहर थिकापाङ परमेस्वरको हुकुम साअ्तेङ कुरुसता टाङगाइन्हातेङ सिहि। 9 इङकोखातिर परमेस्वर वासेहेङ झाराङखान्तेङ र्हुता मान पाका थामेता तोल्हेहि। कालाउ झाराङखान्तेङ बाराका मिङ पिहि। जेदोङ मिङ भाइका भेनेङ मिङ मान्थु। 10 एसापा सादेलता, सुमिङता रो सुमिङ लेता हिका झाराङ इसुहेङ मान पालिको भाअ्सिङ वाको मिङता तिर्हो थोलि गोयावा। 11 कालाउ झाराङ परमेस्वर आबाको प्रतापको भाअ्सिङ इसु ख्रिस्टहेङ प्रभु दोअ्तेङ मन्जुर पावा। जोल्काभाइपाङ चिल्कालि 12 इदोइखातिर काङको मोन्दाताका दादाओने बाइओनेगेलाइ का नेलाइदोफा हिलाउ नेलाइ दिनाङ काङको काथागेलाइ साअ्सुन्हा। झन का नेलाइसो दुरे हिलाउ बुङ नेलाइ काङको काथागेलाइ आरोङ हेन्जाङ साअ्लि गोइस्वाना। कालाउ नेलाइको निङका छुटकाराको काथा तिङपालि हेन्जा भेम्ति ह्याअ्पासु रो परमेस्वरहेङ मान पातेङ वाको थिकाता एसा पासु। 13 हाइदोनु परमेस्वर नेलाइता दिनाङ काम पावा। कालाउ वा दोङ वाको काम पातेङ दोपाका मन रो सरबङ प्यावा। 14 नेलाइ हिदिङ काम पालाउ बुङ गानगानमापासिङ रो माचेरसुसिङ गोताङ काम पासु। 15 एसा पासुन्हा पानु नेलाइ कुकरमि रो दुनियाको आखेका द्याङगेलाइको माझाता परमेस्वरको हाइदोङ दुस मान्थुका जामाल भाइपाङ पुनित जेङस्वाना। कालाउ आदेलता फुरुगेलाइ चिल्काका भाइपाङ नेलाइ बुङ रेम्का काम पातेङ एम्बालाइको माझाता चिल्कास्वाना। 16 नेलाइ ज्यान पिका रेम्काबानालहेङ थिर जेङतेङ खान्धुर पासु। एसा पासुन्हा पानु काङको धाअ्का रो मिनेत एन्साङ बिथाको माजेङहि दोअ्तेङ ख्रिस्ट लोलाउ का तुजुक पाका माउका निनाङका। 17 नेलाइको प्रभु इसुता पाका खान्धुर परमेस्वरहेङ चार्हाइका भोक भाइकाङ एइ। इङको भोकता काङको हिति होलाउ बुङ का लेङचाका हिघा। कालाउ का नेलाइ दोफादोफाङ लेङचाङका। 18 एन्साङ पातेङ नेलाइ बुङ लेङचासु रो का बुङ नेलाइ दोफादोफाङ लेङचाङका। तिमोथि रो इपाफ्रोडिटस 19 प्रभु इसुको लाल्सा हिनु आस पाखा, का मारफाङ तिमोथिहेङ नेलाइकोता दिङगिलाङका। कालाउ वा काता घुरितेङ नेलाइको बानाल हिङपालाउ का हेन्जाङ लेङचाङका। 20 तिमोथि भाइका जातिङको मनहोइ नेलाइको भालाइ चिताइका खामाल कादोफा बो हासुङ मान्थु। 21 बोगेलाइ ते झाराङ ताइकोङ सुरता खिनिङ हिखे। कालाउ इसु ख्रिस्टको बारेता एम्बालाइहेङ हाइदोङ मतलब मान्थु 22 कालाउ तिमोथि हिसिका लाएकको खामाल हिघाहि दोअ्का काथा नेलाइ दोङ गेसुखेना। जेसापा एलोङ चान आबाको चाकर पाखे, एन्सा दोङ इङको रेम्काबानाल पारचार पाका कामता कादोफाङ चाकर पाहि। 23 कासेहेङ हाइ जेङखे इङको गेतेङसाङ का तिमोथिहेङ नेलाइकोता दिङगिलाङका। 24 कालाउ प्रभुको लाल्सा हिनु का बुङ मारफाङ नेलाइकोता लोका खान्धुर र्हुका हिघा। 25 कालाउ बुङ एला केलाइको ओने इपाफ्रोडिटसहेङ नेलाइको हिका थामेता दिङगिल्लि गोयाङ दोअ्तेङ का बिचार पादोङखा। वा बुङ ख्रिस्टको मन्डलिता सिपाल्हाइ भाइपाङ तु: भोगितेङ कादोफा चाकर पाखे। जेलाउ कासेहेङ साघाइलि हारजा जेङहि, कोलाउ नेलाइ ताइको चर भाइपाङ इङकोहेङ काङकोता दिङगिलसुन्हा। 26 नेलाइ झाराङहेङ दुसुलि वाको बुङ बाराका लाल्सा हि। जेलाउ नेलाइ वा बिमार हि दोअ्का हिङसुन्हा आङ कोलाउ वा हेन्जाङ सुरता पातेङ हि। 27 वा हेन्जाङ मासाअ्धेतेङ सिलि तोम्का हिघाखे। कालाउ बुङ परमेस्वर वार्हुता खिनिङ दाया मापासिङ का र्हुता बुङ दाया पाहि। कालाउ परमेस्वर वासेहेङ खिनिङ माको कासेहेङ बुङ दाया पाहि रो का सुरतार्हुता सुरता पालि मागोइहि। 28 इदोइखातिर का वासेहेङ नेलाइकोता दिङगिल्लि हेन्जाङ लाल्सा पाका हिघाखा। कालाउ नेलाइ बुङ वासिहेङ तिङतेङ हेन्जाङ लेङचास्वाना रो काङको मनको पिर बुङ होम्का जेङधावा। 29 प्रभुता वासेहेङ खान्धुरि ओने दोअ्तेङ लेङचातेङ रेम्फा पासु। कालाउ इसिका द्याङगेलाइहेङ मान पासु। 30 हाइपानु वा ख्रिस्टको भाअ्सिङ झान्दाइ ताइको ज्यानसुदाङ पिलि तोम्का हिघाखे। कालाउ नेलाइ काङको भाअ्सिङ पोङघा पालि मादोका चाकरको काम वा दोङ पोङघा पाका हिघाखे। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.