फिलिप्पि 1 - धिमाल1 ख्रिस्ट इसुको बान्धाइगेलाइ पावल रो तिमोथिसो, फिलिप्पि पुरता हिका मन्डलिको आगुवागेलाइ, डिकनगेलाइ रो ख्रिस्ट इसुता हिका परमेस्वरको झाराङ पुनित जनगेलाइहेङ इदोइ चिथि लेखेदोङ न्हाखे। 2 केलाइको परमेस्वर आबा रो प्रभु इसु ख्रिस्टसो नेलाइहेङ निगाहा रो सुबिस्ता प्याको। च्याबासको पुकार 3 जेलाउ का नेलाइहेङ फोमपाखा कोलाउ नेलाइको भाअ्सिङ का काङको परमेस्वरहेङ च्याबास चार्हाइखा। 4 कालाउ नेलाइ झाराङको भाअ्सिङ पुकार पालाउ का दिनाङ लेङचातेङ पुकार पाखा। 5 हाइदोनु नेलाइ कासेहेङ रेम्काबानालको कामता लाम्फासो एलाथिकापा साघाइतेङ लोका हिसुन्हा। 6 परमेस्वर नेलाइको माझाता एलोङ एल्का काम थालनि पाका हि। कालाउ वा दोङ इसु ख्रिस्ट घुरितेङ लोका पहरता इङको काम पोङघा पावा दोअ्तेङ का पाक्काङ खान्धुर पाखा। 7 नेलाइको बारेता इसिकाङ बिचार पालि कासेहेङ उचित लागेहि। हाइदोनु का नेलाइहेङ ताइको कोन्धाङसोङ माया पाखा। कालाउ का थुनाता हिलाउ बुङ, बाहार हिलाउ बुङ नेलाइ कासेहेङ रेम्काबानाल पारचारपालि रो इदोइहेङ जोगाइलि परमेस्वरको पिका इदोइ गोताङ निगाहाता नेलाइ कादोफाङ भाकर्हुका हिसुन्हा। 8 का नेलाइहेङ दुसुलि इस्तुङ लाल्सा पाखा दोअ्का काथा परमेस्वर दोङ गिखे। हाइदोनु ख्रिस्ट इसु नेलाइहेङ जेसापा माया पाहि का बुङ नेलाइहेङ माया पाखा। 9 नेलाइको भाअ्सिङ काङको पुकार इदोङ हि नेलाइ बुङ माया पाका काथाता, सत आकिल रो रेम्का मारेम्का खेङलि दोका काथाता बार्हेतेङ हानेसु। 10 एन्सा जेङनु खिनिङ नेलाइ झाराङखान्तेङ रेम्का काथाहेङ खेङलि दोस्वाना। कालाउ ख्रिस्ट लोलाउ नेलाइ पुनित रो दुसमान्थुका जेङस्वाना। 11 कालाउ इसु ख्रिस्टको सरबङसो नेलाइ दिनाङ परमेस्वरहेङ मोन्दाताका काम पासु। इदोङ रेम्का काम तिङतेङ द्याङगेलाइ परमेस्वरहेङ मान पातेङ वासेहेङ बाखिनावा। पावलसो रेम्काबानालको पारचार 12 दादाओने बाइओनेगेलाइ, का र्हुता लोका तु: भोगेकासो रेम्काबानाल पारचार जेङलि दोहोइ दोअ्तेङ नेलाइ गेसु दोअ्का का भोखा। 13 का ख्रिस्टको बारेता रेम्काबानाल पारचारपानाङ थुनाता परेका एइ दोअ्का काथा दारबारको झाराङ सिपाल्हाइ रो बो द्याङगेलाइ बुङ गेका हि। 14 का थुनाता परेका हिनाङसिङ हेन्जाङ दादाओने बाइओनेगेलाइ प्रभुता बोल्याका जेङका हि। कालाउ एम्बालाइ माथिसिङ रेम्काबानाल हिङपालि हिम्मति जेङका हि। 15 आधेमि द्याङगेलाइ आरिस पातेङ का बोमिको खान्तेङ हेन्जा पाघा दोअ्तेङ तिङपालिको भाअ्सिङ ख्रिस्टको रेम्काबानाल पारचार पाखे। कालाउ आधेमि द्याङगेलाइचाहिँ एल्काङ बिचार ताअ्तेङ ख्रिस्टको रेम्काबानाल पारचार पाखे। 16 जाइ कासेहेङ माया पाखे, एम्बालाइ दोङ रेम्का बिचारहोइ ख्रिस्टको रेम्काबानाल पारचार पाखे। हाइदोनु एम्बालाइ गेखे, परमेस्वर दोङ कासेहेङ रेम्काबानालहेङ जोगाइलिको भाअ्सिङ खाटाइका हि। 17 बोमिगेलाइचाहिँ सोझा मनहोइ माको, कालाउ का थुनाता हिलाउ झन हेन्जा तु: भोग्याको दोअ्तेङ ताइको भालाइको भाअ्सिङ खिनिङ फोमपातेङ ख्रिस्टको पारचार पाखे। 18 कालाउ जेदोङ जेङलाउ बुङ इदोइ काथाता का लेङचाखा। रेम्का मनहोइ पारचार पालाउ बुङ, मारेम्का मनहोइ पारचार पालाउ बुङ, जेसालाउ बुङ ख्रिस्टकोङ पारचार जेङका हि। जातिङकोङ का इदोइ काथाता लेङचाङका। 19 हाइदोनु नेलाइ काङको भाअ्सिङ पुकार पापितेङ कालाउ इसु ख्रिस्टको पिका हाङसासो साघाइतेङ छुटकारा निनाङका दोअ्का काथा का गेखा। 20 काङको बाराका लाल्सा रो आसचाहिँ इदोइ एइ, का परमेस्वरको आगाता हेअ्लाउ मालेदेराङका। कालाउ लाम्फा भाइपाङ एला बुङ का परमेस्वरको कथन हिङपालि हिमत निङतेङ ह्याङका। कालाउ का सिन्हुलाउ बुङ, नासालाउ बुङ काङको ज्यान ख्रिस्टको मानको भाअ्सिङ ज्यावा। 21 हाइदोनु का सिन्हुलाउ बुङ ख्रिस्टको भाअ्सिङ सिन्हुताङका। कालाउ का सिलाउ बुङ ख्रिस्टकोङ भाअ्सिङ स्याङका। काङको भाअ्सिङ इदोइ लाभको काथा दोङ ज्यावा। 22 कालाउ का सिन्हुतेङहिघा पानु प्रभुको भाअ्सिङ रेम्का काम पाका माउका निनाङका। एन्सानु ज्यान साल्लि ना सिका साल्लि? इङको का दोअ्लि माद्वाङका। 23 का ते दोमनता परेका हिघा। कालाउ इदोइ दुनिया लाअ्तेङ ख्रिस्ट दोफाङ हिलि बुङ कासेहेङ बाराका लाल्सा हि। इङकोचाहिँ बान्चेतेङहिका खान्तेङ हेन्जाङ रेम्का काथा एइ। 24 कालाउ का नेलाइको भाअ्सिङ का बान्चितेङहिलि हेन्जाङ खाचो हि। 25 इदोइ काथा का जातिङको खान्धुर पाखा। इदोइखातिर नेलाइहेङ खान्धुरता बोल्याका बान्हाइलि रो नेलाइको सुकाका बार्हेपालि का सिन्हुतेङ हितेङ नेलाइदोफाङ ह्याङका दोअ्तेङ का गेखा। 26 कालाउ का आरोङ नेलाइदोफा दोफाङ हिका खातिर नेलाइ ख्रिस्ट इसुहेङ आरोङ हेन्जाङ बाखिन स्वाना। 27 मुल काथाचाहिँ इदोङ दोङ एइ, ख्रिस्टको रेम्काबानालहेङ सोबाइका नेलाइको आनिबानि ज्याको। कालाउ का नेलाइहेङ दुसुलाउ बुङ, मादुसुलाउ बुङ नेलाइ एलोङदोङ बिचारहोइ थिर जेङतेङ एलोङदोङ लाल्साहोइ हेन्जाङ द्याङगेलाइ रेम्काबानालहेङ खान्धुर पाको दोअ्तेङ भेम्ति ह्याअ्पातेङ काम पादोङसुखेना दोअ्का का हिङलि निनाको। 28 नेलाइ ताइको बाइरिगेलाइदोफा हेअ्लाउ बुङ माथिसु। इदोइ काथाहोइ नेलाइको दुस्मनगेलाइहेङ परमेस्वर मुअ्पाका रो नेलाइहेङ बान्चेपाका काथाको दासि प्यावा। वा इदोइ गोताङ काथा पावा। 29 हाइदोनु परमेस्वर नेलाइहेङ ख्रिस्टता खान्धुर पालिको भाअ्सिङ खिनिङ माको, कालाउ वाको भाअ्सिङ तु: पिर भोगितेङ वाकोङ चाकर पाका एल्का माउका बुङ पिका हि। 30 नेलाइ लाङ दिनागेलाइता काङको भोगेका तु: पिरगेलाइ तिङकाङ हिसुन्हा रो एला थिकापा बुङ तु: पिरगेलाइ भोगितेङ हिका हिङदोङ सुखेना। इन्सिकाङ तु: पिरगेलाइ नेलाइ बुङ भोगेदोङ सुखेना। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.