ፕልጵስዮሳ 3 - ጌሻ ማጻፋ

ቱሙ ጽሎተ

¹ ዉርሰን፥ ታናዳን ጾሳ ካልያዋንቶ፥ ጎዳይ ህንተንቶ ናሸቻ እሞ። ታን ካሰ ጻፌዳዋ ዛረደ ጻፍያዌ ታና ዋይሰና፤ ቃይ ሄ ጻፍያዌ ህንተና ናጋና።

² ኢታባ ኦያዋንቱፐ፥ ሄ ካናቱዋ ኤሻይ ደእያዋንቱፐ፥ ቃጻራይ ኮሼ ግያ አሳቱዋፐ ናገትተ።

³ አያዉ ጎፐ፥ ኑን ጾሳ ጌሻ አያናን ጾሳዉ ጎይንያ ድራዉነ ኑ ደኡዋን ጎዳ ክርስቶሳ የሱሳን ናሸትያ ድራዉ፥ ቱሙ ቃጻራ ቃጻረቴዳዋንታ፤ አሳተ ቦላ ኦሰትያዋን አማኖኮ።

⁴ ቃይ ታዉ ታ ሁጲያንካ ታ አሳተን አማነትያዌ ደኤ። አይ አሳይነ ባረ አሳተን አማነትያዌ ባረዉ ደኤ ጊደ ቆፖፐ፥ ታን አፐ ሎይ አይ።

⁵ ታን የለቶደፐ ሆስፑን ጋላሳን ቃጻረታድ። ታን የለታን እስራኤልያ፤ ቢንያማ ዛረ፤ ዋላካይ ባይና አይሁዳ አሳ። አይሁዳ ህግያ ናግያዋን ግዶፐ፥ ታን ፓርሳዌ፤

⁶ አይሁዳ አማኖ ሴላ ግዶፐ፥ ታን አማንያዋንታ ዋይሳድ፤ እት ኡራይ ሙሴ ህገዉ አዛዘቲደ ጽልያዋ ባጋ ግዶፐ፥ ታናን ፖኮባይ ቤትቤና።

⁷ ሽን ታና ጎእያ ሄ ኡባባ ክርስቶሳ ድራዉ ባዬዳዋዳን ፓይዳይ።

^8-9 ቱማካ፥ ሄዋንቱ ጻላላ ግደና፤ ታን ታ ጎዳ ክርስቶስ የሱሳ ኤርያዌ ኡባባፐ ሎይ አያ ድራዉ፥ ኡባባ ታና ሙለካ ጎኤናዋዳን ፓይዳይ፤ ታን አ ድራዉ ኡባባ የጋ ባሻድ። ክርስቶሳ ደማናዉነ አናና ደአናዉ ኡባባ ዎራ ኦሌዳዋዳን ፓይዳይ፤ ታን ሙሴ ህገዉ አዛዘታደ ደምያ ታ ሁጰ ጽሎተይ ታዉ ባዋ። ክርስቶሳ አማንና፥ ጾሳይ እምያ ጽሎተይ፥ አማኑዋን ጾሳ ማታፐ ይያ ጽሎተይ ታዉ ሀእ ደኤ።

^10-11 ታን ክርስቶሳነ አ ደንዱዋ ዎልቃ ኤራናዉ ኮያይ፤ ያታደ ታን ታ ሁጰዉ ሀይቁዋፐ ደንዳና ያግያዋን፥ አ ዋይያ አናና ዋየታናዉነ አ ሀይቁዋን አ ማላታናዉ አሞታይ።

ጋክያሳ ጋካናዉ ዎጽያዋ

¹² ታን ሀእ ደማ ድጋድ ዎይ ታናን ባል ባዋ ጊከ። ሽን ክርስቶስ የሱስ ታና ባረዉ ኦዳ ዎይታ ደማና ጋደ ኤሌላይ።

¹³ ታናዳን ጾሳ ካልያዋንቶ፥ ታን ሄዋ ደማ ድጋድ ጋደ ቆፕከ፤ ሽን ታን እትባ ኦይ፤ ታፐ ጉየና ደእያዋ ዶጋደ ስንን ደእያዋ ኦይቃናዉ ዋታይ።

¹⁴ ጾሳይ ክርስቶስ የሱሳ ባጋና ቦላ ደኦ ጼስያ ዎይታ አካናዉ፥ ታ ጋካናዉ ዎጻይ።

¹⁵ ስም ኑን አያናን ምኔዳዋንቱ ኡባቱ ሀዋ ቆፓናዉ በሴ፤ ቃይ ህንተፐ አማሬዳዋንቶ አያንነ ዱማ ቆፋይ ደኦፐ፥ ሄዋካ ጾሳይ ህንተንቶ ቆንጭሳና።

¹⁶ ግዶፐካ፥ ኑን ሀኖ ጋካናዉ ደኤዳ ማራዳን፥ አነ ስንዉ ሄ ማራ ካሎይተ።

¹⁷ ታናዳን ጾሳ ካልያዋንቶ፥ ታን ሀንያዋዳን ሀንተ። ኑን ህንተንቶ ሌምሱዋ ግዴዶ፤ ሄዋዳን ህንተካ ኑን ህንተንቶ ሌምሱዋ ግዴዳ ማራ ካልያዋንታ አኬክተ።

¹⁸ አያዉ ጎፐ፥ ታን ሄዋ ህንተንቶ ካሰ ጮራቶ ኦዳድ፤ ቃይ ሀእ ላኤንዋካ አፎጻደ ህንተንቶ ኦዳይ፤ ክርስቶስ ማስቃልያ ቦላ ምስማርያን ሸቲደ ሀይቄዳዎ ባረንቱ ሸምፑ ባረና ሞርከ ኦዳ ዳሮ አሳቱ ደኢኖ።

¹⁹ ኡንቱንቱ ዉርሰይ ባሻ፤ ኡንቱንቱ ኡሉ ኡንቱንቶ ጾሳ፤ ዬላታናዉ በስያዋን ኡንቱንቱ ኦቶረቲኖ፤ ቃይ ሀ ሳኣባ ጻላላ ቆፒኖ።

²⁰ አያዉ ጎፐ፥ ኑ ቢታይ ሳሉዋና፤ ኑን ቃይ ሳሉዋፐ ያና ኑና አሽያ ጎዳ የሱስ ክርስቶሳ ናጌቶ።

²¹ ክርስቶስ ኡባባ ባረፐ ጋርሳን ዎናዉ ዳንዳይያ ባረ ዎልቃን፥ ኑ ዳቡራንቻ አሳተ ላሚደ፥ ባረ ቦንቾ አሳተ ማላትሲደ ኦና።