Tobi 7 - A SƐB-SÕW

A Tobɩasɩ kul-taa

¹ Bɛ na wa ta a Ɛkɩbatan a, a Tobɩasɩ tɩ yel'ɩ a malkɩ: «Ɩ̃ yɛb Azarɩasɩ i, tɛr mɛ̃ cen nɩ daadaa a tɩ yɛb Araguwɛl yir.» A malkɩ tɩ tɛr ʋ na cen nɩ a Araguwɛl yir. Bɛ tɩ nyɛ̃ ʋ na ʋ zɩ̃ a ʋ davʋra dɩ̃dɔr ƴãw, bɛ de niwn puor'ʋ. A Araguwɛl tɩ sɔw bɛ na: «Nyɩ sɔ́r yãanɩ, ɩ̃ yɛbr i, nyɩ kpɛmɛ na a?» Ɛ́ tɩ tɛr bɛ kpɛ n a dĩó.

² Ʋ tɩ yel'ɩ a ʋ pɔw Ɛdɩna: «Nyɛ̃ pɔlbile na ŋmɛ̃ taa nɩ a ɩ̃ yɛb Tobi a wɛ!»

³ A Ɛdɩna tɩ sowri bɛ na: «Ɩ̃ yɛbr i, nyɩnɛ n'a nyɩ yi?» Bɛ tɩ sɔw ʋ na: «Tɩ yi n a Nɛfɩtali dɔwlʋ nɩbɛ bɛl bɛ na diw cen nɩ a Nɩnɩɩvʋ tẽw a pʋɔ.»

⁴ Ʋ tɩ sowri bɛ na: «Nyɩ bãw nɩ a tɩ yɛb Tobi i?» Bɛ sɔw ʋ: «Ʋ̃ʋ, tɩ bãw ʋ na.»

⁵ Ʋ tɩ lɛb'a sowri bɛ: «Ʋ kpɛmɛ na a?» Bɛ tɩ sɔw ʋ na: «Ʋ̃ʋ, ʋ kpɛmɛ na, ʋ cãà na vʋʋrɛ.» A Tobɩasɩ tɩ yel'a ƴãw pʋɔ: «A ɩ̃ sãà n'ʋ!»

⁶ Lɛ n'a a Araguwɛl tɩ vaa ìr, nyɔw ʋ weri kone nɩ. Al pùorí, ʋ yel ʋ: «Ɩ̃ bie e, a Naaŋmɩn, ʋ maalɩ fʋ! Fʋ tɛr'ɩ sãà-vla. Bʋ̃ʋ baw-bio n'a k'aa nɩ-mɩŋa ŋa tɔ nɩ nɩr na sõwne a nan dem yaga za a wa tɩ zɔ̃w à ŋá!» A Araguwɛl tɩ lɛb'a nyɔw a Tobɩasɩ weri ɛ́ lɛb tĩ kone.

⁷ A ʋ pɔw Ɛdɩna nɩ a ʋ pɔwyaa Saara mɩ̀ tɩ kone na tɩɛrɛ nɩ a Tobi yele.

⁸ Al pùorí, a Araguwɛl tɩ ƴãw na bɛ kʋ pʋ́ra a ʋ píir pʋɔ de nɩ bɛ a sãánʋ nɩ nɔ̃wfʋ yaga za.

⁹ Bɛ na wa so a kʋ̃ɔ pɛ́w a bɛ dɛwr bɛr baarɩ, ɛ́ zɩ̃ kɛ́ bɛ dɩ a, a Tobɩasɩ tɩ yel'ɩ a Arafayɛl: «Ɩ̃ yɛb Azarɩasɩ i, zɛlɩ a Araguwɛl k'ʋʋ kʋ̀ m a ɩ̃ yeepuule Saara ɩ̃ kul.»

¹⁰ A Araguwɛl na tɩ wõ a ƴɛ̀rʋ ŋa a, ʋ yel'ɩ a pɔlbile: «A ƴɛrɛŋa ƴãw a, dɩ ɛ́ nyũ ɛ́ wõ nʋ̃ɔ̀ a tɩ̃ɩsɔw ŋa. Fʋ̃ʋ bɛ wa n'ʋ a, nɩr bɛ tɛr sɔ́r na kul a ɩ̃ pɔwyaa Saara ɩ. Ɩ̃ bɛ tɛr sɔ́r na kʋ̀ ʋ nɩ-yũo a bɛ ɩ a fʋ̃ʋ ɛ, bʋ̃ʋ n'ʋ vɛ̃, fʋ̃ʋ n'ʋ ɩ a ɩ̃ sãà yir nɩr na pɩɛlɩ mɛ̃ a. Ɛcɛ ɩ̃ na yel'ɩ a yel-mɩŋa za kʋ̀ b.

¹¹ Ɩ̃ tɩ dãw na de ʋ kʋ̀ dɛbr ayopõi a tɩ yɛbr pʋɔ, bɛ kul ʋ tu taa. Ɛcɛ bɛ za tɩ kpi n a kul-taa tɩ̃ɩsɔw nɛ, a lɛn daar bɛ na mɩ́ tɩ bɔbr kɛ́ bɛ lãw gã a. Ɛcɛ ƴɛrɛŋa a, ɩ̃ bie e, dɩ ɛ́ nyũ: a Sore na wul nyɩ nɩ a ʋ nɔ̃wfʋ.»

¹² Ɛcɛ a Tobɩasɩ tɩ yel'a: «Ɩ̃ bɛ be za na dɩ bom, bɩɩ nyũ bom a ka, fʋ̃ʋ bɛ wa tɩ yel bom a Saara ƴãw a ɩ.» A Araguwɛl tɩ yel ʋ na: «Ɛ́ lɛɛ ɩ̃ na yel'a, fʋ̃ʋ so ʋ mɛ̃ a lɛ a Moyiir wulu na ƴãw a, Naaŋmɩn n'ʋ kʋ̀rɛ fʋ. De ʋ mɛ̃ a fʋ pɔw a. Ƴɛrɛŋa a, fʋ ɩ n a ʋ sɩr, ʋʋ ɩ a fʋ pɔw, fʋ̃ʋ so ʋ a dɩ̃a nɩ kʋralɛ. Ɩ̃ bie e, a Sore na be a salom zu a na ɩ na a nyɩ yele za cen vla a tɩ̃ɩsɔw ŋa. Ʋ zɔ a nyɩ nɩbaalʋ ɛ́ kʋ̀ nyɩ a ʋ ƴã-ɓaarʋ!»

¹³ Al pùorí, a Araguwɛl tɩ bʋɔl'ɩ a ʋ pɔwyaa Saara. Ʋ na wa ta a, ʋ nyɔw nɩ a ʋ nũu ƴãw a Tobɩasɩ nũú ɛ́ yel: «De ʋ k'ʋ ɩ a fʋ pɔw mɛ̃ a lɛ a Moyiir wulu na ƴãw a, tɛr ʋ nɩ ƴã-ɓaarʋ kul'ɩ a fʋ sãà yir. A Naaŋmɩn na be a salom zu a, ʋ tɛr nyɩ ɛ́ ɩ nyɩ wone nʋ̃ɔ̀!»

¹⁴ Al pùorí, ʋ tɩ bʋɔl'ɩ a Saara mã yel ʋ: «De bom bɛ na na tʋ̃ɔ́ sɛb'ɩ a wa n.» Ʋ tɩ maal'ɩ a kul-taa sɛbɛ à ŋá: «A Araguwɛl kʋ̀rɛ nɩ a ʋ pɔwyaa Saara a Tobɩasɩ k'ʋʋ kul, mɛ̃ a lɛ a Moyiir wulu na ƴãw a.» Al pùorí, bɛ tɩ nyɔw nɩ a dɩb nɩ a nyub.

A kul-taa bibir tɩ̃ɩsɔw

¹⁵ A Araguwɛl tɩ bʋɔl'ɩ a ʋ pɔw Ɛdɩna yel ʋ: «Ɩ̃ yeepuule e, cɔbrɩ a di-ganɩ ayi sob, ɛ́ tɛr a tɩ pɔwyaa kpɛ n a be.»

¹⁶ Ʋ tɩ cen na tɩ cɔbrɩ gado a di-gana pʋɔ, mɛ̃ a lɛ a ʋ sɩr na tɩ yel kʋ̀ ʋ a. Ʋ tɩ tɛr'ɩ a ʋ pɔwyaa cen nɩ ɛ́ tɩ kone tɩɛrɛ nɩ ʋ, ɛcɛ ʋ wa fɩɛl'ɩ a ʋ mʋta-kʋ̃ɔ bɛr ɛ́ yel ʋ:

¹⁷ «Ɩ̃ pɔwyaa a, dɩ kanyir, a Sore na be a salom zu a, ʋ ɩ a fʋ pʋ-sãwna lɩɛbɩ nʋ̃ɔ̀! Ɩ̃ pɔwyaa a, dɩ kanyir!» Ɛ́ tɔl yi.