Tobi 4 - A SƐB-SÕW

A TOBI NA TÕ A Ʋ BIDƐB TOBƖASƖ A 4—8 A wulu a Tobi na tɛr a ʋ bidɛb zie a

¹ A ʋlɩ bibir nɛ a, a Tobi tɩ lɛb'a bãwnɩ a libie ʋ na tɩ bin a Gabayɛl zie, a Aragɛsɩ tẽ-kpɛ̃ɛ na be a Medi tẽw a pʋɔ.

² Lɛ n'a ʋ tɩ yel a ʋ mɩŋa zie à ŋá: «Ɩ̃ na faa zɛlɩ a kũu a, a na vɩɛl'a k'ɩ̃ɩ bʋɔlɩ a ɩ̃ bidɛb Tobɩasɩ wa manɩ a libie á ŋá yele kʋ̀ ʋ, ɛ́ bãw kpi.»

³ Lɛ n'a ʋ tɩ bʋɔlɩ a ʋ bidɛb Tobɩasɩ, ʋ wa a ʋ zie, ʋ wa yel ʋ à ŋá: «Mãa wa kpi a, fʋ̃ʋ ũù mɛ̃ mɛ̃ a lɛ na sɛw taa nɩ a. Ƴãwnɛ a fʋ mã. Taa wa zawrɛ ʋ bɛrɛ lɛn daar za ʋ na na cãà a ɩ. Ɩrɛ lɛ za na pɛlɩ a ʋ pʋɔ a. Ƴãw fãw ʋ tɛr su-nʋ̃ɔ̀, taa ɩrɛ bom na na ƴãw ʋ pʋ-sãwna pʋɔ a ɩ.

⁴ Ɩ̃ bie e, cãà bãwnɩ a kũu-pire al za a fʋ mã na tɩ cɛ a lɛn daar ʋ na tɩ tɛr a fʋ pʋɔ a. Ʋlɛ wa kpi a, fʋ̃ʋ ũù ʋ pɩɛlɩ mɛ̃ yaa-bɔw-been pʋɔ.

⁵ Ɩ̃ bie e, taa wa yiire a Sore bɛrɛ towtow a fʋ cãafʋ daar za ɩ. Gù fʋ tʋɔra taa wa maalɛ yel-bier bɩɩ zawrɛ a ʋ nɛ-ƴãwnɩ ɛ. A fʋ cãafʋ daar za a, tɛr mɩnʋ ɩ-ɩrɩ, ɛ́ taa wa lore a faa sɔ́r towtow ɛ.

⁶ Bʋ̃ʋ n'ʋ vɛ̃, a bɛlɩ dem na vʋʋrɛ a yel-mɩŋa pʋɔ a, a bɛ yele na mɩ́ maal'ɩ vla.

⁷ Mɩ́ ír a fʋ bʋ̃-tɛrɩ nɩ pʋ-pla sõw nɩ a bɛlɩ dem na tuur a mɩnʋ a, ɛ́ nãá-bãw-kɛ́-lɛ ta ka be ɩ. Taa wa ŋmɛlɛ kpaar cɔwr nã́w sob ɛ, lɛ mɩ̀ n'a Naaŋmɩn kʋ̃ ŋmɛlɩ kpaar cɔw fʋ ɛ.

⁸ Mɩ́ sõw a fʋ tɔ man nɩ a fʋ bʋ̃-tɛrɩ, alɛ saa yãwmɛ bɩɩ bɛ saalɩ a. Fʋ̃ʋ saa tɛr bʋ̃-pʋrɩ a, fʋ̃ʋ taa bʋ́nɛ nɩ a pʋrɩ al fʋ na tɛr a tɩrʋ ɛ.

⁹ À ŋá n'a fʋ na tɛr na-bʋ̃-vla gùre nɩ a kpɩɛrʋ bibie.

¹⁰ Yel-mɩŋa, sob nɛ na kʋ̀rɛ bom a nan dem a bɛ kpiir ɛ, a ʋ nã́w-sob-sõwfʋ bɛ mɩ́ sàw ʋ na siw a yaa-bɔw-lige pʋɔ ɩ.

¹¹ Nɩr za na kʋ̀rɛ bom a nan dem a, kʋ̀rɛ nɩ de-kʋ̀b bom na vɩɛl a, a Naaŋmɩn-na-do-saa-bɛ-pɩɛl-a.

¹² Ɩ̃ bie e, gù fʋ tʋɔra a kul-taa na bɛ tu a Naaŋmɩn wulu a ƴãw. Zuo a za, de pɔw a fʋ bʋʋrɛ pʋɔ. Taa dier pɔw na bɛ yi a fʋ sãà dɔwlʋ pʋɔ, ɛ́ ɩ dɔwlʋ yũo pɔw a ɩ. Bʋ̃ʋ n'ʋ vɛ̃, tɩ ɩ n naaŋmɩn-ƴɛ̀r-manbɛ bʋʋrɛ. Ɩ̃ bie e, lɛb tɩɛrɩ a Nowe, a Abraham, a Ɩzaakɩ nɩ a Zakɔb yele, a bɛl na ɩ a tɩ sãàkʋm-kore a pɛr-tib daar a, bɛ za tɩ de nɩ pɔwbɛ a bɛ nɩbɛ pʋɔ, ɛ́ lɛ n'a Naaŋmɩn tɩ maalɩ bɛ, kʋ̀ bɛ bibiir, ɛ́ a bɛ dɔwlʋ n'ʋ na de a tẽw so ʋ.

¹³ A na ɩ à ŋá a, ɩ̃ bie e, tu a fʋ yɛbr, a Ɩsɩrayɛl nɩbɛ. Ta ɩrɛ pɔ̀lʋ a fʋ nɩbɛ zie ɩ! Ta ɩrɛ pɔ̀lʋ a fʋ nɩ-bʋʋrɛ dɛbr nɩ pɔwbɛ zie bɛ́ tɩ sàw na de pɔw a bɛ pʋɔ ɩ. Bʋ̃ʋ n'ʋ vɛ̃, a pɔ̀lʋ bɔrɛ nɩ a nɩbɛ ɛ́ lore bɛ. Lɛ mɩ̀ n'a a ƴã-tuolu mɩ̀ ɩ nã́w nɩ nãw-woro yib zie. Ʋ̀ ɩ n a kɔ̃ mã.

¹⁴ Ta mɩ́ gù a bio daarɩ́ fʋ ya a fʋ tõ-tõ-bie ɩ, mɩ́ ya ʋ daadaalɛ. Fʋ̃ʋ wa tone a Naaŋmɩn à à ŋá a, ʋ mɩ̀ na ya b'a. Tɛr maal-ɩb a fʋ ɩ-ɩrɩ za pʋɔ, ɩ̃ bie e. Wul a fʋ cenu pʋɔ kɛ́ fʋ páw nɩ wulu na vɩɛl a.

¹⁵ Ʋlɩ bom nɛ fʋ na bɛ nɔnɛ a, ta ɩ ʋ kʋ̀ nɩr ɛ. Ta mɩ́ nyũ a divɛ̃ tɩ kuoli ɛ, ɛ́ ta mili nɩ a dãa kuolu ɛ.

¹⁶ Mɩ́ ɩ a fʋ bʋ̃-dɩrɩ kʋ̀ a bɛlɩ dem a kɔ̃ na kpɩɛr a, ɛ́ kʋ̀ a fʋ bʋ̃-suuri a bɛlɩ dem na bɛ tɛr a a. A bome al fʋ na tɛr a zuo a, mɩ́ de a kʋ̀ a nan dem ɛ́ nãá-bãw-kɛ́-lɛ ta ka be ɩ.

¹⁷ Mɩ́ cen nɩ bʋ̃-dɩrɩ tɩ kʋ̀ a bɛlɩ dem na kone nɩ-mɩŋa kuor a, ɛ́ taa wa tɩrɛ a yel-bier-maalɛ ƴãw ɛ.

¹⁸ Mɩ́ sàw nɩr za na ɩ yã-bãwnɛ a ʋ wul fʋ, ɛ́ taa wa gùre pùor cɔwr yã-vla ɩ.

¹⁹ Vuo za pʋɔ a, mɩ́ danɩ a Sore fʋ Naaŋmɩn, ɛ́ zɛlɩ ʋ k'ʋʋ tɛr fʋ sɔr-vla zu, ɛ́ ɩ a yele fʋ na tɩɛrɩ bin a nɩ a bom nɛ fʋ na ɩrɛ a, a tu vla. Bʋ̃ʋ n'ʋ vɛ̃, nɩ-bʋʋrɛ kãw za bɛ so a yã-bãwfʋ ɛ. A Sore yõ n'ʋ mɩ́ tɩr bʋ̃-vla za, ɛcɛ ʋ mɩ́ siwr'ɩ sob nɛ ʋ na bɔbr a tɩ ta n a kpɩmɛ tẽw. Ƴɛrɛŋa a, ɩ̃ bie e, cãà bãwnɩ a wulu á ŋá, taa wa yiire a bɛrɛ towtow ɛ.

²⁰ Ƴɛrɛŋa a, ɩ̃ bie e, ɩ̃ yere na kʋ̀rɛ fʋ: ɩ̃ bin nɩ salm-pla libi-ɓɛlɛ kilo kɔbr ata (300) Gabiri bidɛb Gabayɛl zie, a Aragɛsɩ na be a Medi tẽw a.

²¹ Yel-mɩŋa n'a, ɩ̃ bie e, tɩ lɩɛb'ɩ nan dem, ɛcɛ a taa wa ƴãwnɛ fʋ tɩɛrʋ ɛ. Fʋ tɛr'ɩ na-bʋ̃-kpɛ̃ɛ fʋ̃ʋ wa sàwr a Sore fʋ Naaŋmɩn nʋɔr, fʋ̃ʋ wa dɛrɛ yel-bier za ɛ́ ɩrɛ a lɛ za na pɛlɩ a ʋ pʋɔ a.»