Tobi 3 - A SƐB-SÕW

A Tobi puoru

¹ Pʋ-sãwna tɩ tɛr mɛ̃ nɩ yaga za, ɩ̃ kone tɛr'ɩ a 'woi 'woi. Al pùorí, ɩ̃ tɩ tĩ na puore à ŋá tɛr'ɩ a 'woi 'woi:

² «Fʋ ɩ n nɩ-mɩŋa, Sore e, a fʋ ɩ-ɩrɩ za tu n mɩnʋ, a fʋ sɛ́ɛ za ɩ n nɔ̃wfʋ nɩ yel-mɩŋa, fʋ̃ʋ n'ʋ dɩrɛ nɩ a tẽ-daa a ƴɛ̀rʋ.

³ A lɛ pʋɔ a, Sore e, taa yiire mɛ̃ bɛrɛ ɩ, jɩ́r mɛ̃ kaa ɛ́ taa dɔwrɛ mɛ̃ a ɩ̃ yel-bebe zũú, nɩ a sãwna mãa nɩ a ɩ̃ sãàkʋm-kore na bɛ bãwnɩ ɛ́ sãw fʋ a ɩ.

⁴ Bʋ̃ʋ n'ʋ vɛ̃, tɩ bɛ tu a fʋ nɛ-ƴãwnɩ ɛ, alɛ so fʋ sàw a tɩ dɔ̃ dem za a tɩ bome, ɛ́ tɛr tɩ tɩ ɩ gbãgbaar, ɛ́ kʋrɛ tɩ. A nɩ-bʋʋr-yoru bɛl pʋɔ fʋ na diw tɩ yaarɩ a, bɛ ɩrɛ tɩ na laar ɛ́ tʋʋr tɩ.

⁵ A fʋ ƴɛ̀rʋ za fʋ na dɩ a pʋɔ a, fʋ wul'ɩ a fʋ mɩnʋ. Fʋ tɛr'ɩ yel-mɩŋa fʋ na dɔwrɩ mɛ̃ a ɩ̃ yel-bebe nɩ a ɩ̃ sãàkʋm-kore dem ƴãw a. Bʋ̃ʋ n'ʋ vɛ̃, tɩ bɛ tu a fʋ nɛ-ƴãwnɩ ɛ, tɩ bɛ cen dẽdẽ a fʋ niŋé ɩ.

⁶ Ɛcɛ ƴɛrɛŋa a, ɩ m lɛ za fʋ na bɔbr a. Lɛb de a ɩ̃ nyɔ-vʋʋrʋ! Ɩ̃ bɔbr'a k'ɩ̃ɩ yi a tẽw ŋa zu lɛb lɩɛbɩ a tanɛ. Mãa zie a, a kũu sa a nyɔ-vʋʋrʋ, bʋ̃ʋ n'ʋ vɛ̃, ɩ̃ wõ n zʋmɛ ɩ̃ na bɛ sɛwnɩ a. Pʋ-sãwna tɛr mɛ̃ na bɛ dɩ vuo ɩ. Sore e, faa mɛ̃ a kpɩɛrʋ ŋa pʋɔ, bɛr mɛ̃ ɩ̃ cen a pɩ̃ɛnʋ na be kʋralɛ a pʋɔ. Sore e, ta lɩɛb kpaar cɔw mɛ̃ ɩ, mãa kpi a, alɛ sa ɩ̃ na na cãà vʋʋrɛ a kpɩɛrʋ ŋa tɔ pʋɔ wone a zʋmɛ á ŋá taabɛ a.»

A Saara tõ-tõ-bi-pɔw tʋ ʋ na

⁷ A ʋlɩ bibir nɛ tɔr za a, a Medi tẽw Ɛkɩbatan tẽ-kpɛ̃ɛ pʋɔ a, Araguwɛl pɔwyaa, Saara, tɩ wõ n a ʋ sãà tõ-tõ-bi-pɔw kãw na tɩ tʋ ʋ a.

⁸ Bʋ̃ʋ n'ʋ vɛ̃, a Saara tɩ kul'ɩ sɩr gb'a ayopõi, ɛ́ kʋralɛ a kɔ̃tɔ̃-faa Asɩmode mɩ́ tɩ kʋ a sɩr ʋʋ bɛ lãw nɩ a ʋ pɔw sɛr, mɛ̃ a lɛ a na ɩrɛ dɛb nɩ pɔw na kul taa a zie ɩ. A ɩ a lɛ a tõ-tõ-bi-pɔw tɩ yel a Saara: «Fʋ̃ʋ n'ʋ kʋrɛ a fʋ sɩrbɛ! Nɩbɛ ayopõi n'ɩ bɛ ŋa fʋ kul ɛ́ bɛ tɛr a bɛ kãw za yúor ɛ!

⁹ Bʋ̃ʋ n'ʋ so fʋ dɔwrɛ tɩ a bɛ kũu ƴãw? Cen tɩ páw bɛ ɛ́ nɩr taa nyɛrɛ fʋ fʋ dɔwr bidɛb bɩɩ pɔwyaa kãw za ɩ!»

¹⁰ A ʋlɩ bibir nɛ a, pʋ-sãwna kpɛ̃ɛ tɩ tɛr'ɩ a Saara, ʋ tɩ tĩ kone dúor'ɩ a ʋ sãà bɔwpɩɛ pʋɔ, tɩɛrɛ nɩ k'ʋʋ tɩ yawlɩ ʋ tʋɔra. Ɛcɛ a ʋ tɩɛrʋ pʋɔ a, ʋ tɩ yel'ɩ à ŋá: «Bɛ kʋ̃ʋ wa tʋʋr a ɩ̃ sãà yere nɩ: Fʋ tɩ tɛr'ɩ pɔwya-been fʋ na nɔnɛ yaga za a, ʋʋ wa yawlɩ ʋ tʋɔra a ʋ kpɩɛrʋ zũú! À kpɩɛrʋ ɩ̃ na na ƴãw a ɩ̃ sãà-nyãw à à ŋá a na ɩ na ʋ kpi n pʋ-sãwna. Ɩ̃ na ƴãw nɩ fãw nɩ̃ɛ ta yawlɩ ɩ̃ tʋɔra ɩ, ɛ́ zɛlɩ a Sore yãayãa k'ʋʋ ɩ ɩ̃ kpi, lɛ n'a ɩ̃ kʋ̃ lɛb wõ zʋmɛ a ɩ̃ cãafʋ daar ɛ.»

A Saara puoru

¹¹ A pɛr nɛ pʋɔ a, a Saara tɩ lɩɛb'a tori a tokoro vʋɔr, zɛw a nuru puori à ŋá: «Ɩ̃ danɛ fʋ na, nɩbaal-zɔrɛ Naaŋmɩn i! Fʋ̃ʋ so danʋ kʋrakʋralɛ! A fʋ bʋ̃-íri za, a yiele danɛ nɩ fʋ kʋrakʋralɛ!

¹² Ƴɛrɛŋa a, fʋ̃ʋ zie n'a ɩ̃ lɩɛbɩ a ɩ̃ niwn cɔw, fʋ̃ʋ n'ʋ ɩ̃ úore.

¹³ Ɩ ɩ̃ yi a tẽw ŋa zu, ta cãà wone a zʋmɛ á ŋá taabɛ ɩ.

¹⁴ Sore e, fʋ bãwnɩ a na, ɩ̃ bɛ tɛr dɛwr ɛ, dɛb kãw za bɛ páw mɛ̃ ɩ.

¹⁵ Ɩ̃ bɛ sãw a ɩ̃ yúor nɩ a ɩ̃ sãà yúor a tẽw ŋa pʋɔ bɛ na diw mɛ̃ wa n a ɩ. Ɩ̃ ɩ n a ɩ̃ sãà pɔwya-been, ʋ bɛ tɛr bi-yũo ʋ na dɩ a ʋ gbãw ɛ. Ʋ bɛ tɛr yɛb, bɛ tɛr ʋ nɩr kãw na na tʋ̃ɔ́ kul mɛ̃ a ɩ. Ɩ̃ ũù nɩ sɩrbɛ ayopõi baarɩ: bʋnʋ ƴãw n'a ɩ̃ na cãà vʋʋrɛ? Ɛcɛ Sore e, fʋ̃ʋ bɛ wa nɔnɛ kɛ́ fʋ ɩ ɩ̃ kpi a, fʋ̃ʋ ƴãw tobr a zʋmɛ bɛ na tʋʋr mɛ̃ a ƴãw.»

A Naaŋmɩn de nɩ a Saara nɩ a Tobi puoru

¹⁶ A ʋlɩ pɛr nɛ pʋɔ a, a Naaŋmɩn na tɛr yúor-vɩɛlʋ-danʋ a tɩ wõ n a Tobi nɩ a Saara puoru,

¹⁷ ɛ́ tõ malkɩ Arafayɛl k'ʋʋ tɩ sanɩ bɛ za ayi: a tɩ fɛr'a k'ʋʋ ír a bʋ̃-pɛlɛ al bɛr a Tobi mimie pʋɔ, k'ʋ tʋ̃ɔ́ lɛb nyɛ̃ a Naaŋmɩn cãà. A mɩ̀ tɩ fɛr'a k'ʋʋ diw a kɔ̃tɔ̃-faa Asɩmode bɛr a Araguwɛl pɔwyaa Saara zie, ɛ́ de ʋ kʋ̀ a Tobɩasɩ ʋ kul. Bʋ̃ʋ n'ʋ vɛ̃, a Tobɩasɩ n'ʋ a tɩ sɛw k'ʋʋ de niwn kul ʋ, ɛ́ bɛr a dɛbr bɛl za na tɩ bɔbr ʋ a. A pɛr nɛ pʋɔ a, a Tobi tɩ yi n a davʋra pʋɔ kpɛ a ʋ dĩó, ɛ́ a Araguwɛl pɔwyaa, Saara, yi a bɔwpɩɛ pʋɔ siw.