Tobi 2 - A SƐB-SÕW

A Tobi zɔ̃w na

¹ A Asaradɔ̃ naalʋ-dɩb daar a, ɩ̃ tɩ lɛb'a kul a ɩ̃ tẽw Nɩnɩɩvʋ, ɛ̀ bɛ tɩ lɛb kʋ̀ m a ɩ̃ pɔw Ana nɩ a ɩ̃ bidɛb Tobɩasɩ. A tɩ cuw na ɩ a Pãtɩcɔtɩ cuw a, a pɛr lɛ k'aa Dàrʋ cuw-sõw a, bɛ tɩ maal'ɩ bʋ̃-dɩ-nʋ̃ɔ̀ kãw kʋ̀ m. Ɩ̃ tɩ zɩ̃ na k'ɩ̃ɩ dɩ.

² Bɛ tɩ wa n nɩ bʋ̃-dɩ-nʋʋr yaga wa dɔwlɩ a tabal zu. Lɛ n'a ɩ̃ tɩ yel a ɩ̃ bidɛb Tobɩasɩ: «Ɩ̃ bie e, cen a tɩ yɛbr Ɩsɩrayɛl nɩbɛ bɛ na diw wa n a Nɩnɩɩvʋ tẽw pʋɔ ka a zie. Ƴãw fãw tɩ bɔ nyɔw a bɛ pʋɔ nã́w sob na tu a Sore bɛ lɛb pùor a, ɛ́ bʋɔl'ʋ k'ʋʋ wa lãw nɩ mɛ̃ dɩ. Ɩ̃ na gù na kɛ̀ fʋ tɩ lɛb wa.»

³ A Tobɩasɩ tɩ cen na k'ʋʋ tɩ bɔ nã́w sob kãw a tɩ yɛbr pʋɔ, ɛcɛ ʋ tɩ lɛb'a wa yere: «Ɩ̃ sãà a!» Ɩ̃ tɩ sɔw ʋ: «Ɛ́ bʋnʋ, ɩ̃ bie e?» Ʋ sɔw mɛ̃: «Ɩ̃ sãà a, a tɩ tẽw nɩr kãw n'ɩ ŋan bɛ kʋ. Bɛ fɩɩr'ʋ nɩ a kɔkɛɛ kʋ lɔb bɛr a nɩbɛ tuor-taa zie, ʋ cãà nɩ be à ŋá.»

⁴ Lɛ n'a ɩ̃ tɩ bɛr a ɩ̃ bʋ̃-dɩrɩ bɛ tɔ a ɩ, ɛ́ zɔ cen a zie nɛ tɩ de a kũu. Ɩ̃ tɩ ƴãw ʋ nɩ zãgala kãw pile gùre nɩ k'aa mʋ̃tɔ̃w kpɛ baarɩ ɩ̃ ũù ʋ.

⁵ Ɩ̃ na wa lɛb kul a, ɩ̃ tɩ so n kʋ̃ɔ k'ɩ̃ɩ pɛ́w a ɩ̃ dɛwr bɛr. Al pùorí ɩ̃ dɩ a ɩ̃ bʋ̃-dɩrɩ nɩ pʋ̃-sãwna.

⁶ Ɩ̃ tɩ lɛb'a bãwnɩ a ƴɛ̀rʋ a naaŋmɩn-ƴɛ̀r-manɛ Amɔsɩ na tɩ ƴɛ̀r càar'ɩ a Betɛl tẽw dem a: «A nyɩ cuwr na lɩɛb'ɩ wahala, ɛ́ a nyɩ yielu za lɩɛbɩ lãw-mʋɔlɛ.» Ɩ̃ɩ tɩ tĩ na kone.

⁷ Al pùorí, a mʋ̃tɔ̃w na wa kpɛ a, ɩ̃ tɩ cen na tɩ tuw bɔw, de a kũu ũù.

⁸ A ɩ̃ sɩman dem tɩ ɩrɛ mɛ̃ na laar yere nɩ: «Ʋ cãà bɛ zɔrɛ dɛ̃bɩ̃ɛ ʋ! Bɛ tɩ dãw na bɔ ʋ kɛ́ bɛ kʋ a yel ŋa tɔ ƴãw, ʋ tɩ zɔ, ɛ́ ʋlɛ n'ɩ ŋan lɛb maal tĩ ũùne a kũuni.»

⁹ A ʋlɩ tɩ̃ɩsɔw nɛ a, ɩ̃ tɩ so n kʋ̃ɔ k'ɩ̃ɩ pɛ́w a ɩ̃ dɛwr bɛr, ɛ́ tɩ yi a davʋra pʋɔ tɩ gã lanɩ a dacin, ɛ́ yuo a niwn bɛr, a tʋlʋ zũú.

¹⁰ Ɩ̃ bɛ tɩ bãw kɛ́ lili ganɛ nɩ a dacin zu a ɩ̃ zu-sɔw ɛ. A bin-tʋl-kpãkpã tɩ lo m'ɩ a mimie pʋɔ, ɩ bʋ̃-pɛlɛ kãw pàw a. Ɩ̃ mɩ́ tɩ cen nɩ a dɔwtarɩ zie k'ɩ̃ɩ tɩ sanɩ ɩ̃ tʋɔra. Ɛcɛ bɛ na baa tɩ ƴãwnɛ mɛ̃ a tɩ̃ɩnɩ a n'a a bʋ̃-pɛlɛ al tɩ lɛb bãw zɔ̃wnɛ mɛ̃, tɛr lɛɛɛ ɩ̃ tɩ zɔ̃w daadaa. Ɩ̃ tɩ zɔ̃w nɩ yome anaar. A ɩ̃ nɩbaalʋ tɩ kpɛ n a ɩ̃ yir nɩbɛ. A Ahikaar tɩ kaa nɩ a ɩ̃ zie yome ayi tɩ ta n a lɛn daar ʋ na cen a Elimayidɩ tẽw a.

¹¹ A lɛn daar a, a ɩ̃ pɔw Ana tɩ páw nɩ pɛn-wobru tome.

¹² Ʋ mɩ́ tɩ wob'ɩ a pɛnɛ kʋ̀ a bɛlɩ dem na mɩ́ tɩ yel k'ʋʋ wob a, ɛ́ bɛ ya ʋ. Ɛcɛ Dɩsɩtʋrɔsɩ cuw bibie ayopõi sob kãw, ʋ tɩ wob'ɩ pɛn kãw baarɩ kʋ̀ a ʋ nɩ-bɛrɛ. Bɛ tɩ ya ʋ nɩ a ʋ libie ɛ́ lɛb kʋ̀ ʋ bʋle ƴãw pʋɔ.

¹³ A bʋle na tɩ tarɛ pɩɛlɛ mɛ̃ a, ʋ tɩ tĩ na kone. Ɩ̃ tɩ bʋɔl'ɩ a ɩ̃ pɔw sowr'ʋ: «Nyɩnɛ n'a a bʋle ŋa yi? Bʋ̃-zura bɛ n'ʋ ɛ? Lɛb kʋ̀ ʋ a bɛlɩ dem na so ʋ a. Tɩ bɛ tɛr sɔ́r na dɩ bʋ̃-zura ɩ.»

¹⁴ A ɩ̃ pɔw tɩ sɔw mɛ̃ na: «Bʋ̃-kʋ̀ra n'ʋ bɛ kʋ̀ m ƴãw pʋɔ a ɩ̃ yar ƴãw!» Ɛcɛ ɩ̃ bɛ tɩ sàw a lɛ ʋ na yere a ɩ. Ɩ̃ tɩ fɛrɛ ʋ na k'ʋʋ lɛb'ɩ a bʋle tɩ kʋ̀ a bʋle dem. Ɛ́ à á ŋá ƴãw a, ɩ̃ tɩ nyɛ̃ nɩ ʋ nɩ suur. Lɛ n'a a ɩ̃ pɔw tɩ lɛb sɔw mɛ̃: «A fʋ nɩ-kɔmɛ sõwfʋ wa? A fʋ ɩ-vɩɛlɩ wa? A yele za na tarɛ fʋ a ɩ n cãà!»