A Ɛsɩtɛɛr sɛbɛ na sɛb'ɩ a gɩrɛkɩ kɔkɔr a 8 - A SƐB-SÕW

¹ A ʋlɩ bibir tɔr za a, a nãà Artazɛrsɛsɩ tɩ de nɩ a gɛgɛra Haman bʋ̃-tɛrɩ za kʋ̀ a Ɛsɩtɛɛr. Lɛb waar, a Ɛsɩtɛɛr tɩ yel'a kʋ̀ a nãà k'aa Maadose ɩ n a ʋ nɩr. A nãà tɩ ƴãw na bɛ bʋɔl'ʋ, ʋ wa.

² Ʋ tɩ ír'ɩ a nũ-tʋʋr ʋ na tɩ lɛb de a Haman zie a, kʋ̀ a Maadose. Lɛb waar, a Ɛsɩtɛɛr tɩ ƴãw nɩ a Maadose ʋ kaarɛ a Haman bʋ̃-tɛrɩ zie.

A nãà kʋ̀ n sɔ́r a Zifʋ mɩnɛ kɛ́ bɛ zɛb faa bɛ tʋɔra

³ A Ɛsɩtɛɛr tɩ lɛb'a ƴɛ̀r a nãà zie. Ʋ tɩ lo na gbĩ dume a ʋ pile, ɛ́ zɛlɩ ʋ k'ʋʋ ta bɛr a Haman tɩɛr-faar ʋ na tɩ tɩɛrɩ a Zifʋ mɩnɛ ƴãw a tu ɛ.

⁴ A nãà tɩ tur'ɩ a ʋ salm-zɩɛ dabɔl a Ɛsɩtɛɛr, lɛ n'a a Ɛsɩtɛɛr tɩ lɛb ìr àr pɩɛlɩ a nãà.

⁵ Ʋ tɩ yel'ɩ a nãà: «Nãà a, fʋ̃ʋ wa nyɛ̃ a sɛw a, ɛ́ a fʋ pʋɔ pɛlɩ a ɩ̃ ƴãw a, fʋ̃ʋ ƴãw bɛ sɛb sɛb-yũo, yel k'aa sɛb-tʋɔlɩ al a Haman na tɩ sɛb a Zifʋ mɩnɛ na kpɩɛr a fʋ naalʋ-tẽw pʋɔ a kʋb ƴãw a bɛ cãà pʋɔ ɩ.

⁶ Ŋmɩŋmɩn za n'a ɩ̃ na tʋ̃ɔ́ jɩ́rɛ a ɩ̃ nɩ-bʋʋrɛ wone a tuo á ŋá taabɛ? Ŋmɩŋmɩn za n'a ɩ̃ na sàw cãà vʋʋrɛ bɛlɛ wa kʋrɛ a ɩ̃ nɩ-bʋʋrɛ pàwr pɛr a?»

⁷ A nãà tɩ sɔw nɩ a Ɛsɩtɛɛr: «Ɩ̃ sàw nɩ a lɛ za na pɛlɩ a fʋ pʋɔ a ƴãw bɛ yawlɩ a Haman a dàa zu kʋ, ʋ na tɩ bɔbr a Zifʋ mɩnɛ kʋb a ƴãw, ɩ̃ kʋ̀ b'ɩ a ʋ bome za. Bʋ̃ʋ n'ʋ fʋ lɛb bɔbr ƴãw pʋɔ?

⁸ Ƴɛ̀rʋ ɩ̃ na ƴãw bɛ sɛb a ɩ̃ yúor ƴãw, ɛ́ nɛ̃ a ɩ̃ nũ-tʋʋr ƴãw a, ɩ̃ kʋ̃ tʋ̃ɔ́ lɩɛb'ʋ bɛr ɛ. Ɛcɛ fʋ̃ʋ nɩ a Maadose, nyɩ mɩ̀ na tʋ̃ɔ́ na sɛb sɛb-tʋɔlɩ a ɩ̃ yúor ƴãw manɩ a lɛ nyɩ na nyɛ̃ a sɛw a, ɛ́ nɛ̃ a ɩ̃ nũ-tʋʋr ƴãw.»

⁹ Bɛ tɩ bʋɔl'ɩ a sɛ-sɛbrbɛ ɓã taa, a ʋlɩ yũon nɛ tɔr za cuw-dãw-niwn sob bibie lɩzɛr'ɩ ata, a pɛr lɛ k'aa Nɩsã cuw. Bɛ tɩ sɛb'ɩ sɛb-tʋɔlɩ kʋ̀ a Zifʋ mɩnɛ, manɩ a lɛ za bɛ na tɩ yel kʋ̀ a tẽ-kaarbɛ nɩ a nãà-lɩɛrbɛ na tone a naalʋ-tẽw tẽ-ŋma-kʋ̀rɩ lɩz'a ayʋɔb nɩ ayopõi (127) za pʋɔ a, na yi a Ɛ̃dɩ tɩ tɔ a Etiopi a. Bɛ tɩ sɛb'ɩ nɩ tẽ-ŋmãa-kʋ̀ra za nɩbɛ ƴɛ̀rʋ.

¹⁰ Bɛ tɩ sɛb'a baarɩ ɛ́ ƴãw a nãà yúor ɛ́ nɛ̃ a ʋ nũ-tʋʋr bãwfʋ ƴãw. Al pùorí bɛ tõ nɩbɛ kɛ́ bɛ cen nɩ tɩ tɩr.

¹¹ A sɛb-tʋɔlɩ á ŋá pʋɔ a, bɛ tɩ kʋ̀ n a Zifʋ mɩnɛ na be a naalʋ-tẽw tẽ-bɛrɛ za pʋɔ a sɔ́r, kɛ́ bɛ tuur a bɛl mɩŋa nɛ́ɛ, kɛ́ bɛ sõwne taa, ɛ́ ɩrɛ a bɛ dɔ̃ dem lɛ za bɛ na bɔbr a.

¹² A cuwr pie nɩ ayi sob, a pɛr lɛ k'aa a Adaar cuw, a bibie pie nɩ ata sob'a a tɩ tɛr sɔ́r kɛ́ bɛ tu à à ŋá bɛ na kʋ̀ bɛ a sɔ́r a, a Artazɛrsɛsɩ naalʋ-tẽw za pʋɔ.