A Ɛsɩtɛɛr sɛbɛ na sɛb'ɩ a gɩrɛkɩ kɔkɔr a 7 - A SƐB-SÕW

A Haman tome sãw na, ʋʋ kpi

¹ A nãà nɩ a Haman tɩ cen nɩ a nãà-pɔw yir kɛ́ bɛ tɩ dɩ a cuw-kpɛ̃ɛ

² a gb'a ayi sob ƴãw. Bɛ na wa dɩ baar'a, a nãà tɩ lɛb'a sowri a Ɛsɩtɛɛr: «Ɩ̃ pɔw Ɛsɩtɛɛr i, bʋ̃ʋ n'ʋ fʋ bɔbr? Bʋ̃ʋ n'ʋ fʋ zɛlɛ a ɩ̃ zie? Alɛ saa ɩ a ɩ̃ naalʋ-tẽw põ-zɛ̃-taa n'ʋ a, ɩ̃ na kʋ̀ b a.»

³ A nãà-pɔw tɩ sɔw na: «Nãà a, a fʋ pʋɔ wa pɛlɩ a ɩ̃ ƴãw a, fʋ̃ʋ bɛr a mãa mɩŋa ɩ̃ vʋʋrɛ, ɛ́ mɩ̀ bɛr a ɩ̃ nɩ-bʋʋrɛ bɛ vʋʋrɛ. A ɩ̃ zɛlʋ n'ɩ à ŋà.

⁴ Bʋ̃ʋ n'ʋ vɛ̃, bɛ kʋɔr'ɩ mãa nɩ a ɩ̃ nɩ-bʋʋrɛ, kɛ́ nɩbɛ kʋ tɩ pàw pɛr, ɛ́ za a tɩ bome, ɛ́ ƴãw tɩ lɩɛbɩ gbãgbaar, tɩɩm nɩ a tɩ bibiir. Ɩ̃ ɩ n gbili wa tɔ a dɩ̃a, ɛcɛ vĩ n'a k'aa gɛgɛra ŋa tɔ tɛr tõ-nɛ́ɛ a nãà yir pʋɔ.»

⁵ A nãà tɩ sowr'a: «Ãa n'ʋ sàw ɩ a ɩb ŋa tɔ?»

⁶ A Ɛsɩtɛɛr sɔw: «A tɩ dɔ̃ sob a, a Haman n'ʋ, a nɩsaal-faa ŋa!» A Haman tɩ tĩ na màwr a nãà nɩ a ʋ pɔw niŋé.

⁷ A nãà tɩ bɛr'ɩ a dɩb, ɛ́ tɔl yi a zaadɛ̃ pʋɔ. Lɛ n'a a Haman tɩ bãw k'aa yele kʋ̃ ɩ vla a ʋ zie ɩ, ɛ́ tĩ lɔbr nuru zɛlɛ nɩ a nãà-pɔw,

⁸ tɩ lo zɩ̃ a gado ʋl zu a Ɛsɩtɛɛr na tɩ be a. Lɛ n'a a nãà tɩ yi a zaadɛ̃ pʋɔ lɛb wa a dɩb dĩó. Ʋ tɩ ŋmɛ n cɛl yel: «Fʋ bɔbr'a kɛ́ fʋ fɛr gã nɩ a ɩ̃ pɔw ƴãw pʋɔ, a mãa mɩŋa yir pʋɔ ɔ?» Vĩ tɩ nyɔw nɩ a Haman, ʋ lɩɛbɩ a niwn bɛr zi-yoru.

⁹ Bugatan, a nãà dɛ-vár kãw, tɩ yel'ɩ a nãà: «Nãà a, a Haman tɔr za ƴãw na bɛ cɔbrɩ dàa a Maadose yawlʋ ƴãw, a nɩr ŋa na wo a nɩbɛ na tɩ bʋ taa a fʋ kʋb ƴãw a. A dàa ʋl bà na àr a Haman yir dɩ̃dɔrɩ́, ʋ kɛrɩ na ta mɛtɩr lɩzɛr'ɩ anũu.» A nãà tɩ yel'a: «Bɛ yawlɩ a Haman a ʋ zu!»

¹⁰ Bɛ tɩ yawl'ɩ a Haman a dàa ʋl zu ʋ na tɩ cɔbrɩ a Maadose ƴãw a. Lɛ n'a a nãà suur tɩ ɓãá.