A Ɛsɩtɛɛr sɛbɛ na sɛb'ɩ a gɩrɛkɩ kɔkɔr a 6 - A SƐB-SÕW

A Haman bãw na gù ƴãw a Maadose

¹ A ʋlɩ tɩ̃ɩsɔw nɛ a, a Sore tɩ ɩ na a gʋ̃ɔ zawrɩ a nãà Artazɛrsɛsɩ. Ʋ tɩ yel'ɩ a ʋ sɛ-sɛbrɛ k'ʋʋ de a naalʋ-tẽw Yele-sɛbr wa n wa kanɩ kʋ̀ ʋ.

² A sɛ-sɛbrɛ tɩ kanɩ nɩ a sɛbɛ zie ʋl na manɛ a lɛ a Maadose na tɩ wo a nãà dɛ-vaɩ ayi bɛl, na tɩ bʋ taa a nãà kʋb ƴãw a bɛ zie gub tome daar a.

³ Lɛ n'a a nãà tɩ sowri: «Bʋ̃ʋ n'ʋ tɩ ɩ kʋ̀ a Maadose yáa a san? Ŋmɩŋmɩn n'a tɩ ƴãw ʋ?» A ʋ tõ-tõ-biir sɔw: «Fʋ bɛ kʋ̀ ʋ bom za ɩ.»

⁴ Zɩ̃ k'aa lɛn daar a nãà na tɩ sowre a Maadose tõ-vɩɛlɩ yele a, a Haman tɩ ta n a nãà yir davʋrá. A nãà tɩ sowr'a: «Ãa n'ʋ be a davʋrá?» A Haman tɩ wa na k'ʋʋ wa zɛlɩ a nãà, ʋ ƴãw bɛ yawlɩ a Maadose a dàa ʋl ʋ na ƴãw bɛ cɔbrɩ a zu.

⁵ A tõ-tõ-biir tɩ sɔw na: «Haman n'ʋ be be.» A nãà lɛb yel: «Ʋ kpɛ!»

⁶ A nãà tɩ sowr'ɩ a Haman: «Bʋ̃ʋ n'ʋ ɩ̃ na ɩ nɩr ɩ̃ na bɔbr k'ɩ̃ɩ ƴãw a zie?» Lɛ n'a a Haman tɩ tɩɛr'ɩ ʋ pʋɔ: «Ãa n'ʋ a nãà pãa bɔbr k'ʋʋ ƴãw, a bɛ ɩ mãa n'ʋ?»

⁷ Lɛ n'a ʋ tɩ sɔw a nãà: «Fʋ̃ʋ wa bɔbr kɛ́ fʋ ƴãw nɩr a,

⁸ fʋ̃ʋ ƴãw a fʋ tõ-tõ-biir wa n lɛ̃ pɛn kparʋ fʋ na suur a, nɩ wur fʋ na zɔmnɛ a.

⁹ Bɛ wa de a kʋ̀ a fʋ bá kãw na do yaga za a. Ʋ na de nɩ a nãà kparʋ su a sob ʋl a nãà na nɔnɛ a, ʋ na ƴãw na ʋ zɔm a fʋ wur, ʋʋ de ʋ niwn tawr ʋ cɔlɛ nɩ a tẽw nɩbɛ tuor-taa ziir hiere yere nɩ: nyɩ nyɛ̃ lɛ a nãà na na ɩ nɩr za ʋ na bɔbr k'ʋʋ ƴãw a!»

¹⁰ A nãà tɩ yel'ɩ a Haman: «Fʋ ƴɛ̀r'ɩ vla! Ɩ à à ŋá tɔr za a Maadose ƴãw, a Zifʋ nɩr ʋl na tone a ɩ̃ davʋra pʋɔ a. Taa cɩɛr bʋ̃-cãpile kãw za a lɛ fʋ na yel a pʋɔ ɩ.»

¹¹ Lɛ n'a a Haman tɩ cen tɩ de a kparʋ nɩ a wur. Ʋ tɩ su n a Maadose a kparʋ ɛ́ ƴãw ʋ zɔm a wur, al pùorí ʋ taw ʋ cɔlɩ nɩ a tẽw nɩbɛ tuor-taa ziir hiere yere nɩ: «Nyɩ nyɛ̃ a lɛ a nãà na mɩ́ ɩ nɩr za ʋ na bɔbr k'ʋʋ ƴãw a!»

¹² Al pùorí, a Maadose tɩ lɛb'a cen a ʋ tome zie a nãà yir davʋrá, ɛ́ a Haman tɩ pàw a ʋ niwn kul'ɩ, k'ʋʋ sɔwlɩ a ʋ vĩ.

¹³ Ʋ tɩ manɩ nɩ bom nɛ na ɩ ʋ a kʋ̀ a ʋ pɔw Zosara nɩ a ʋ bárɩ. Bɛ za tɩ yel ʋ na: «A Maadose ŋa niŋé bɛ na tĩ yàalɛ fʋ, ʋ na ɩ Zifʋ nɩr a zũú a, fʋ na lore na tɩ lo a ʋ niŋé. Fʋ kʋ̃ tʋ̃ɔ́ pɩ́r ʋ bɛr a fʋ sɔ́r zu ɛ, bʋ̃ʋ n'ʋ vɛ̃, Naaŋmɩn na vʋʋrɛ a be n a ʋ lõbowrí.»

¹⁴ Bɛ tɩ cãà na ƴɛ̀rɛ, ɛ́ a nãà dɛ-vaɩ wa ta, tɛr a Haman daadaalɛ cen nɩ a Ɛsɩtɛɛr cuw-kpɛ̃ɛ dɩb zie.