A Ɛsɩtɛɛr sɛbɛ na sɛb'ɩ a gɩrɛkɩ kɔkɔr a 5 - A SƐB-SÕW

³ A nãà tɩ sowr'ʋ na: «Bʋ̃ʋ n'ʋ fʋ bɔbr Ɛsɩtɛɛr i? Bʋ̃ʋ zɛlʋ n'a fʋ waar a ɩ̃ zie? Alɛ mɩ̀ saa ɩ a ɩ̃ naalʋ-tẽw põ-zɛ̃-taa n'ʋ a, ɩ̃ na kʋ̀ b a.»

⁴ A Ɛsɩtɛɛr tɩ sɔw na: «A dɩ̃a bibir ɩ n bibi-kpɛ̃ɛ a ɩ̃ zie. Nãà a, fʋ̃ʋ wa nyɛ̃ a sɛw a, ɩ̃ bɔbr'a k'aa dɩ̃a tɔr za, fʋ̃ʋ nɩ a Haman wa dɩ a cuw-kpɛ̃ɛ ɩ̃ na cɔbrɩ a.»

⁵ Lɛ n'a a nãà tɩ tõ nɩr daadaalɛ k'ʋʋ tɩ tɛr a Haman wa n ʋ wa sàw a Ɛsɩtɛɛr bʋɔlʋ. Al pùorí bɛ za ayi tɩ lãw cen a cuw dɩb a Ɛsɩtɛɛr na bʋɔlɩ bɛ a.

⁶ Bɛ na wa dɩ baar'a, a nãà tɩ yel'ɩ a Ɛsɩtɛɛr: «Bʋ̃ʋ n'ʋ fʋ bɔbr, ɩ̃ Ɛsɩtɛɛr i? Bom nɛ za fʋ na na zɛlɩ a, fʋ na páw ʋ na.»

⁷ A Ɛsɩtɛɛr tɩ sɔw na: «A ʋlɩ bom nɛ ɩ̃ na bɔbr k'ɩ̃ɩ zɛlɩ a?

⁸ Nãà a, a fʋ pʋɔ wa pɛlɩ a ɩ ƴãw a, fʋ̃ʋ dãw bio lɛb wa, fʋ̃ʋ nɩ a Haman, a cuw-kpɛ̃ɛ dɩb ɩ̃ na na cɔbrɩ a nyɩ ƴãw mɛ̃ a dɩ̃a ɩ̃ na cɔbrɩ a.»

A Haman cɔbr'ɩ dàa k'ʋʋ yawlɩ a Maadose

⁹ A Haman tɩ yi n a nãà yir, nʋ̃ɔ̀ ɩrɛ ʋ, ɛ́ a suur nʋmɛ ʋ yaga za. Ɛcɛ a nãà yir davʋra pʋɔ a, ʋ tɩ nyɛ̃ nɩ a Zifʋ Maadose, a ʋ suur za ìr a ʋ ƴãw.

¹⁰ Ʋ tɩ kul'ɩ a ʋ yir tɩ ƴãw bɛ bʋɔlɩ a ʋ bárɩ nɩ a ʋ pɔw Zosara bɛ wa.

¹¹ Ʋ tɩ manɩ nɩ a ʋ na-bome yele kʋ̀ bɛ, nɩ a ƴãwfʋ al za a nãà na ƴãw ʋ, tɩ ɩ ʋ lɩɛbɩ a tõ-tõ-bi-bɛrɛ za niw-diere, ʋʋ kʋ̀ ʋ a naalʋ-tẽw kaafʋ a.

¹² Al pùorí, a Haman tɩ yel'a ƴãw pʋɔ: «Lɛb waar mɩ̀, mãa yõ n'ʋ a nãà pɔw Ɛsɩtɛɛr bʋɔlɩ a dɩ̃a, k'ɩ̃ɩ bɩɛlɩ a nãà a cuw dɩb ʋ na cɔbrɩ a ƴãw. Ʋʋ lɛb'a bʋɔlɛ mɛ̃ a bio.

¹³ Ɛcɛ à á ŋá za bɛ pɛlɩ a ɩ̃ pʋɔ ɩ, ɩ̃ na mɩ́ wa nyɛ̃ a Zifʋ Maadose ʋ tone a nãà davʋra pʋɔ a.»

¹⁴ Lɛ n'a a Haman pɔw Zosara nɩ a ʋ bárɩ tɩ yel ʋ: «Ƴãw bɛ cɔbrɩ mɛtɩr lɩzɛr'ɩ anũu dàa. Bio biɓaara a, fʋ na zɛlɩ nɩ a nãà k'ʋʋ ƴãw bɛ yawlɩ a Maadose a ʋ zu. Lɛ n'a fʋ na tʋ̃ɔ́ páw a nãà cen a cuw dɩb zie nɩ nʋ̃ɔ̀.» A yã ŋa tɩ pɛlɩ nɩ a Haman pʋɔ, ɛ̀ bɛ cɔbrɩ a dàa.