Kpojemi 4 - BAIBLO ALOO NGMAMI KLƆUKLƆU Ɔ

A ngɛ Mawu jae ngɛ hiɔwe

¹ Enɛ ɔ se ɔ, i na nina kpa. I na nɛ a bli sinya ko ngɔ fɔ si ngɛ hiɔwe. Nɛ gbi ɔ nɛ i nu nɛ pɛ kaa titimati, nɛ e kɛ mi ba tu munyu be ko ɔ de ke, “Ba hiɛ ɔ nɛ ma tsɔɔ mo níhi nɛ maa ba mi be kpiti mi.”

² Amlɔ ɔ, mumi ɔ ba ye nɔ. Nɛ hyɛ, matsɛ sɛ ko ji nɛ ɔ ngɛ hiɔwe nɛ nɔ ko hii si ngɛ nɔ.

³ Nɔ ɔ hɛ mi ngɛ kpɛe kaa yaspi kɛ sardi tɛhi nɛ a he jua wa. Alale nɛ e su ngɛ kaa emerald tɛ nɛ he jua wa po kɛ bɔle matsɛ sɛ ɔ.

⁴ Matsɛ sɛ nyingmi enyɔ kɛ eywiɛ kpa komɛ bɔle matsɛ sɛ ɔ kɛ kpe, nɛ nikɔtɔmahi nyingmi enyɔ kɛ eywiɛ hii si ngɛ a nɔ. A wo ní hiɔ, nɛ sika tsu jlasi fi a yi.

⁵ I na nɛ oslabai gba, nɛ i nu gbihi, nɛ hiɔwe hu si kɛ je matsɛ sɛ ɔ mi. Jatɛ kpaago nɛ a su, ngɛ tsoe ngɛ matsɛ sɛ ɔ hɛ mi; lɔ ɔ ɔmɛ ji mumi slɔɔto kpaago ɔmɛ nɛ sɔmɔɔ Mawu ɔ nɛ.

⁶ Nɔ́ ko hu nɛ ngɛ kaa wo, nɛ ngɛ kpɛe kaa ahuhuɛ nɛ a tsɛɛ kristolo ɔ ngɛ matsɛ sɛ ɔ hɛ mi. Hɛ kali eywiɛ daa si kɛ bɔle matsɛ sɛ ɔ kɔ nya amɛ tsuo a he kɛ kpe, nɛ a hɛ mi, kɛ a se tsuo hɛngmɛ sɔuu.

⁷ Kekleekle nɔ́ ɔ ngɛ kaa jata, nɛ nɔ́ nɛ ji enyɔ ɔ ngɛ kaa na ku. Hɛ kalɔ nɛ ji etɛ ɔ hɛ mi ngɛ kaa adesa hɛ mi, nɛ nɔ nɛ ji eywiɛ ɔ lɛɛ e ngɛ kaa kɔle nɛ te kɛ bee.

⁸ Hɛ kali eywiɛ ɔmɛ a ti nɔ tsuaa nɔ ngɛ pɛli ekpa, nɛ a mi mi je kɛ kpo nɔ je tsuo hɛngmɛ sɔuu. Nɛ nyɔ kɛ pia tsuo ɔ, a hii lae nɛ a kpa we ke, “Klɔuklɔu, klɔuklɔu, klɔuklɔu ji Nyɔmtsɛ Mawu Ope, nɔ nɛ ngɛ sa a, nɛ e ngɛ amlɔ nɛ ɔ, nɛ́ e maa ba a.”

⁹ Hɛ kali eywiɛ ɔmɛ laa yi jemi la, kɛ sina la, nɛ a kɛ woɔ nɔ nɛ hii si ngɛ matsɛ sɛ ɔ nɔ, nɛ ngɛ daa a hɛ mi nyami. Ke a wo la a nɔ kikɛ nɛ ɔ,

¹⁰ nikɔtɔma nyingmi enyɔ kɛ eywiɛ ɔmɛ ngɔɔ a hɛ mi kɛ buɔ si ngɛ nɔ nɛ hii si ngɛ matsɛ sɛ ɔ nɔ, nɛ ngɛ kɛ yaa neneene ɔ hɛ mi, nɛ a jaa lɛ. A ngɔɔ a jlasi ɔmɛ kɛ pueɔ matsɛ sɛ ɔ hɛ mi, nɛ a deɔ ke,

¹¹ “Wa Nyɔmtsɛ, kɛ wa Mawu! Mo ji nɔ nɛ sa kaa a ngɔ hɛ mi nyami, bu, kɛ he wami kɛ ha. Mo lɛ o bɔ níhi tsuo; o bɔ mɛ bɔ nɛ o suɔ kaa a hi. Nɛ a ngɛ ja pɛ!”