جَبُورَ 2 - دٜڢْتٜرٜ اَللَّه ڢُلْڢُلْدٜ عَدَمَوَ

لَامِيطٛ مٛ اَللَّه سُࢡِ طُمْ

¹ کٛنِ عُمَّاتٛوجٜ عُمِّنْتَ حَالَ، کٛنِ جَمَعَاجٜ نُڢٛتٛ نُمٛوجِ مٜىٰرٜىٰجِ؟

² لَامِيࢡٜ دُنِيَارُ طٛنْ تَاسْکِ وَطُغٛ ڢِتِنَ، تٜدُّࢡٜ بٛو طٛنْ کَࢡَّ دَبَرٜ دٛوْ جَوْمِرَاوٛ عٜ لَامِيطٛ مُمْ مٛ عٛمٛيْتِ؞

³ ࢡٜطٛنْ مبِعَ‏: «سٜيْ عٜنْ تَعَ کَࢡّٛرْلِ مَࢡّٜ، عٜنْ شَکِّنَ ࢡٛغِّ مَࢡّٜ دَايِيطُمْ‏!»

⁴ عَمَّا جٛوطِيطٛ حَا عَسَمَ طٛنْ جَلَ ࢡٜ، جَوْمِرَاوٛ طٛنْ جَنْشَ ࢡٜ؞

⁵ ندٜنْ عٛوٛلْوَنَنْ ࢡٜ بٜى تِکّٜرٜ، عٛحُلْنَنْ ࢡٜ بٜى ࢡٜرْنُکِ مَاکٛ، عٛوِعَنْ‏:

⁶ «مِنْ مِلَامِنِ لَامِيطٛ عَمْ دٛوْ سِيٛنَ، حٛوسٜىٰرٜ عَمْ سٜنِيندٜ؞»

⁷ مِوٛويْنَنْ کٛ جَوْمِرَاوٛ تَيْنٛرِ؞ عٛوِعِ يَمْ‏: «عَنْ وٛنِ ࢡِطّٛ عَمْ، حَنْدٜ مِدَࢩِ مَ؞

⁸ ࢨَمَمْ، مِحٛکّٜتٜ عُمَّاتٛوجٜ دُنِيَارُ حَا يٛتّٛ کٜىٰرِ مَارُ ڢُو، عَرٛنَ طٜ؞

⁹ عَطِغِّنَ طٜ بٜى سَوْرُ نجَمْندِ، عَسَمْݠِتَ طٜ بَنَ ݠَيَنْطٜ لٛوݠٜ؞»

¹⁰ جٛنْتَ کَمْ، عٛنٛنْ لَامِيࢡٜ، لَاتٜ حِکْمَعٜنْ‏! عٛنٛنْ حِيتٛوࢡٜ دُنِيَارُ، نجَࢡٜ ڢٜلٛورٜ‏!

¹¹ نجَغَّنٜ جَوْمِرَاوٛ بٜى کُلٛلْ، نغٛنٜ ندٜرْ سٜيٛ عٜ دِوْنغٛلْ‏!

¹² کٜبّٜ ࢡِطّٛ عٛو، نغَمْ تَا عٛࢡٜرْنَ، ندٜنْ عٛنْ کَلْکَ حَا لَاوٛلْ مٛنْ؞ نغَمْ نِي سٜطَّ عٛࢡٜرْنَنْ؞ سٜيٛ لَاتَنِ ࢩُکّٛتٛوࢡٜ حَا مَاکٛ؞