بَلْندِ 2 - دٜڢْتٜرٜ اَللَّه ڢُلْڢُلْدٜ عَدَمَوَ

مبَرْجَارِ طَࢡِّتِتْکِ حِکْمَ

¹ ࢡِنغٜلْ عَمْ، تٛ عَجَࢡِ بٛلّٜ عَمْ، تٛ عَسِغَکٜ عُمْرٛوجٜ عَمْ حَا مَاطَ،

² تٛ عَحَکِّلَنِ کٛ حِکْمَ عٜکِّتِنْتَ، عَحُوشِتِنِ ࢡٜرْندٜ مَ حٜىٰدِ ڢَامُ،

³ تٛ عَتٛرَکٜ حَکِّيلٛ، عَعٜوْنَکٜ بٜى سَوْتُ حَا عَحٜࢡَ ڢَامُ،

⁴ تٛ عَطَࢡِّتِ نغُ بَنَ شَرْدِ، عَتٜڢِ نغُ بَنَ ندٜسَاجٜ ࢩُکِّيطٜ،

⁵ ندٜنْ کَمْ عَڢَامَنْ کٛ وٛنِ کُلٛلْ جَوْمِرَاوٛ، عَحٜࢡَنْ عَنْدَلْ اَللَّه؞

⁶ نغَمْ جَوْمِرَاوٛ حٛکَّتَ حِکْمَ، عَنْدَلْ عٜ ڢَامُ عِوَنْ حَا حُنْدُکٛ مَاکٛ؞

⁷ کَنغْکٛ عٛطٛنْ وَلَّ غٛونغَعٜنْ، عٛطٛنْ عَيْنَ حُووَنْࢡٜ بٜى لَاࢡٜىٰنغَ ࢡٜرْندٜ؞

⁸ عٛطٛنْ عَيْنَ وَطَنْࢡٜ کٛ ڢٛتِّ، عٛطٛنْ عَيْنَ حٛولَاࢡٜ مَاکٛ؞

⁹ تٛ عَنَنَنِ يَمْ، عَڢَامَنْ کٛ ڢٛتِّ، کٛ غٛونغْطِ، کٛ وٛوطِ، عَعَنْدَنْ حُووُغٛ کُوطٜ بٛوطّٜ ڢُو؞

¹⁰ کَنْجُمْ حِکْمَ نَسْتَنْ ࢡٜرْندٜ مَ، عَنْدَلْ بٛو سٜيْنَنْ يٛنغْکِ مَ؞

¹¹ کِرْسٜىٰکُ رٜىٰنٜتٜ، ڢَامُ بٛو عَيْنٜتٜ،

¹² نغَمْ دَايْتِنغٛ مَ عٜ لَاوٛلْ حَلُّࢡٜ، عٜ وٛلْوَنْࢡٜ ݠٜوٜ؞

¹³ ࢡٜعَشِّ لَابِ دَرْنُطِ، نغَمْ تٛکَّاغٛ ࢩِࢡْرٜ؞

¹⁴ ࢡٜطٛنْ شٜيٛرٛ وَطُغٛ کَلُّطُمْ، دَبَرٜىٰجِ کَلُّطِ لَاتِ وٜلْوٜلٛ مَࢡّٜ؞

¹⁵ ࢡٜشٜلِ غٛونغَ، ࢡٜطٛنْ تٛکّٛ لَابِ لٜلِيطِ؞

¹⁶ عَحِسَنْ بٛو دٜبّٛ جٜىٰنٛووٛ، عٜسْتَنْطٛ مَ بٜى بٛلّٜ بٜلْطٜ،

¹⁷ مٛ عَشِّ غٛرْکٛ مُوطُمْ، مٛ يٜجِّتِ عَلْکَوَلْ تٜىٰغَلْ نغَلْ عٛحَࢡِّنٛ يٜىٰسٛ اَللَّه؞

¹⁸ لَاوٛلْ حَا سُودُ مَاکٛ طُمْ لَاوٛلْ مَايْدٜ، نَسْتُغٛ ندُ طُمْ ࢡَدِتَاغٛ جٛوندٜ مَايْࢡٜ؞

¹⁹ نَسْتُࢡٜ حَا مَاکٛ نغَرْتَتَا، ࢡٜلٛرَتَاکٛ حَا لَاوٛلْ نغٜىٰندَمْ؞

²⁰ نغَمْ مَاجُمْ تٛکَّ لَاوٛلْ وٛوطْࢡٜ، تَا سٜلْ لَاوٛلْ عَدِلِعٜنْ؞

²¹ نغَمْ غٛونغَعٜنْ نجٛوطٛتٛ ندٜرْ لٜسْدِ، ࢡٜنغَلَا ڢٜلٛورٜ لُتَّنْ ندٜرْ مَارِ؞

²² عٛعِتَّنْ زَمْبٛتٛوࢡٜ ندٜرْ مَارِ، ࢡٜ نغُدِنْتٜىٰࢡٜ دَايِيطُمْ بَنَ لٜطّٜ؞