ڢِلِݠِّعٜنْ 4 - دٜڢْتٜرٜ اَللَّه ڢُلْڢُلْدٜ عَدَمَوَ

شٜيٛرٜ کَوْتَلْ مٛنْ بٜى جَوْمِرَاوٛ

¹ عٛنٛنْ دٜىٰرْطَمْعٜنْ يِطَاࢡٜ، نغَمْ مَنْ تَبِتٜ بَنَ نٛنْ ندٜرْ کَوْتَلْ مٛنْ بٜى جَوْمِرَاوٛ؞ مِطٛنْ يٜنْوَ عٛنْ مَسِنْ، عٛنٛنْ يِطَاࢡٜ عَمْ، عٛنْ لَاتِ دَلِيلَ سٜيٛ عَمْ عٜ تٜدُّنغَلْ عَمْ؞

² مِطٛنْ تٛرٛ عٜوٛدِيَ عٜ سِنْتِکٜ حَا ࢡٜنَرَّ دَلِيلَ جَوْمِرَاوٛ؞

³ عَنْ بٛو، کُووْدِطِّرَاوٛ عَمْ کٛولَاطٛ، مِطٛنْ تٛرٛ مَ عَوَلَّ رٜوْࢡٜ ࢡٜعٜ، نغَمْ ࢡٜکَوْتِ بٜى عَمْ ندٜرْ حَࢡْرٜ نغَمْ لِنْجِيلَ، کَمْࢡٜ عٜ کٜلٜمَنْ عٜ لُتُّࢡٜ حُووْدِطِّرَاࢡٜ عَمْ؞ عِنْطٜ مَࢡّٜ ڢُو مبِنْدَامَ ندٜرْ دٜڢْتٜرٜ نغٜىٰندَمْ؞

⁴ شٜيٜ ڢٛرٛيْ نغَمْ دَلِيلَ جَوْمِرَاوٛ؞ مِوِعَنْ طُمْ ڢَحِنْ‏: شٜيٜ‏!

⁵ سٜيْ مُࢩَلْ مٛنْ وَنغَنَ يِمْࢡٜ ڢُو؞ جَوْمِرَاوٛ ࢡَدَکٜ وَرْغٛ؞

⁶ تَا شَکْلَنٜ کٛو طُمٜ، عَمَّا عَنْدِنٜ اَللَّه حَاجٜ مٛنْ ڢُو ندٜرْ دٛعَ عٜ تٛرْندٜ، بٜى يٜتّٛورٜ بٛو؞

⁷ ندٜنْ کَمْ سَلَامَنْ اَللَّه ࢡُرْکَ ڢَامُ نٜطّٛ ڢُو، عَيْنَنْ ࢡٜرْطٜ مٛنْ عٜ نُمٛوجِ مٛنْ ندٜرْ کَوْتَلْ بٜى عِيسَى اَلْمَسِيحُ؞

⁸ دٜىٰرْطَمْعٜنْ، ندَا کٛ لُتِّ وِعٜىٰغٛ‏: کٛ غٛونغْطِ ڢُو، کٛ حَانْدِ سَمْطِنٜىٰغٛ ڢُو، کٛ لَاتِ عَدِلِيجُمْ ڢُو، کٛ لَاࢡِ ڢُو، کٛ حٜعِ يِطٜىٰغٛ ڢُو، کٛ حٜعِ تٜدِّنٜىٰغٛ ڢُو، کٛ ڢٛتِّ ڢُو عٜ کٛ حٜعِ مَنغْتٜىٰغٛ ڢُو، کَکِّلَنٜ طُمْ؞

⁹ مبَطٜ کٛ عٛنْ عٜکِّتِ، کٛ عٛنْ کٜࢡِ، کٛ عٛنْ نَنِ عٜ کٛ عٛنْ نغِعِ حَا عَمْ؞ ندٜنْ کَمْ، اَللَّه دٛکّٛووٛ سَلَامَنْ وٛنْدَنْ بٜى مٛوطٛنْ؞

يٜتّٛورٜ نغَمْ بَلَّلْ

¹⁰ مِحٜࢡِ سٜيٛ طُوطْنغٛ دَلِيلَ جَوْمِرَاوٛ، نغَمْ عٛنْ نغِطِ وَلُّغٛ يَمْ ڢَحِنْ؞ کٛو نَانٜ مَا، عٛنْ نغٜلِنٛ طُمْ، عَمَّا عٛنْ کٜࢡَايْنٛ لَاوٛلْ وَطُغٛ طُمْ؞

¹¹ مِوِعَايْ طُمْ نغَمْ دَلِيلَ سٛويْندٜ نغَمْ مِعٜکِّتِ حٜࢨْنِتَاغٛ بٜى کٛ کٜࢡْمِ ڢُو؞

¹² مِعَنْدِ جٛوطَاغٛ ندٜرْ لٜىٰسْتِنَارٜ بَنَ نٛ مِعَنْدِرِ جٛوطَاغٛ ندٜرْ طُوطٜىٰنغَ؞ مِعٜکِّتِ حٜࢨْنِتَاغٛ کٛو تٛيْ عٜ کٛو نٛيْ، کٛو مِطٛنْ ندٜرْ حَارَنْدٜ مَلَّ وٜىٰلٛ، کٛو ندٜرْ طُوطٜىٰنغَ مَلَّ سٛويْندٜ؞

¹³ مِوَاوِ وَطُغٛ طُعُمْ ڢُو، نغَمْ اَلْمَسِيحُ طٛنْ سٜمْبِطِنَمِّ؞

¹⁴ بٜى نٛنْ ڢُو عٛنْ مبَطِ بٛوطُّمْ بٜى حَوْتَنْغٛ يَمْ ندٜرْ ࢡِلَّارٜ عَمْ؞

¹⁵ عٛنٛنْ ڢِلِݠِّعٜنْ عٛنْ عَنْدِ بٛو، سَاعِ مِنْ ݠُطِّ وَازِنغٛ لِنْجِيلَ، ندٜ نغُرْتِيمِ مَکٜدٛنِيَ، وَلَا جَمَعَارٜ نُطِّنْࢡٜ وَلِّ يَمْ بٜى حٛکُّغٛ حُوندٜ مَلَّ نغٜىٰنَارِ، سٜيْ عٛنٛنْ تَنْ؞

¹⁶ نغَمْ دِغَ مِ طٛنّٛ حَا تٜسَّلٛنِيکِ مَا، عٛنْ نٜلْدِ يَمْ وَلِّيندٜ، نَا ندٜ وٛورٜ تَنْ؞

¹⁷ تَا نُمٜ دٛکّٜ مِطَࢡَّتَ؞ عَمَّا مِيِطِ جَوْدِ مٛوطٛنْ حٜࢡَنَ عٛنْ رِبَ؞

¹⁸ مِحٜࢡِ دٛکَّلْ نغَلْ نٜلْدُطٛنْ بٜى جُنغٛ عٜݠَڢْرٛدِتْ؞ مِحٜࢡِ کٛ مِمَرِ حَاجٜ ڢُو، حَا طُمْ ࢡُرِ حَاجٜ عَمْ، مِطٛنْ ندٜرْ جٜيْنِتَارٜ؞ طُمْ لَاتِ بَنَ دٛکَّلْ عُورْدِ مبٜلْندِ، کِرْسَاطُمْ کٛ اَللَّه سٜيٛرْتٛ، يٜرْدٛتٛ؞

¹⁹ اَللَّه عَمْ حُمْتَنَنْ عٛنْ حَاجٜىٰجِ مٛنْ ڢُو ڢٛدّٜ رِسْکُ مُوطُمْ، ندٜرْ تٜدُّنغَلْ، بٜى عِيسَى اَلْمَسِيحُ؞

²⁰ تٜدُّنغَلْ لَاتَنٛ اَللَّه، بَابِرَاوٛ مٜنْ حَا عَبَدَ عَبَدِنْ؞ عَامِينَ‏!

کٛوڢْلِ

²¹ کٛوڢْنٜ سٜنَاࢡٜ ڢُو بٜى عِنْدٜ عِيسَى اَلْمَسِيحُ؞ دٜىٰرْطِرَاࢡٜ وٛنْدُࢡٜ بٜى عَمْ کٛوڢْنِ عٛنْ؞

²² سٜنَاࢡٜ وٛنْࢡٜ حَا طٛ ڢُو کٛوڢْنِ عٛنْ، سَکّٛمَا يِمْࢡٜ وٛنْࢡٜ ندٜرْ سَارٜ کَيْسَرَ؞

²³ مٛعّٜرٜ جَوْمِرَاوٛ مٜنْ عِيسَى اَلْمَسِيحُ وٛنْدُ بٜى مٛوطٛنْ ڢُو‏!