ڢِلِݠِّعٜنْ 3 - دٜڢْتٜرٜ اَللَّه ڢُلْڢُلْدٜ عَدَمَوَ

عَدِلَاکُ نغُ اَللَّه يٜرْدٛتٛ

¹ دٜىٰرْطَمْعٜنْ، کٛ لُتِّ وِعٜىٰغٛ‏: شٜيٜ دَلِيلَ جَوْمِرَاوٛ؞ وِنْدَنغٛ عٛنْ حَالَ کَعَ ڢَحِنْ سَکْلَتَا يَمْ، عَمَّا طُمْ تَبِتِنَنْ عٛنْ؞

² ندٜىٰنْتٜ عٜ دَوَاطِعٜنْ‏! ندٜىٰنْتٜ عٜ وَطٛوࢡٜ حَلّٜىٰندٜ‏! ندٜىٰنْتٜ عٜ سَمْطِنَنْࢡٜ جُولْنٛلْ؞

³ عٜنٜنْ عٜنْ مَرِ جُولْنٛلْ غٛونغْطُنغٛلْ، نَا کَمْࢡٜ، عٜنٜنْ رٜوَنْࢡٜ اَللَّه بٜى بَلَّلْ رُوحُ مُوطُمْ؞ عٜنْ طٛنْ مَنْتٛرٛ عِيسَى اَلْمَسِيحُ نَا ࢡَلِّ مٜىٰطٜنْ؞

⁴ مِنْ بٛو مِطٛنْ بٜى جَرْڢُ مَنْتٛرَاغٛ ࢡَنْدُ عَمْ؞ وٛطْࢡٜ مَ تَمَّکٜ نغٛودِ دَلِيلَ مَنْتٛرَاغٛ کٛعٜ مُوطُمْعٜنْ، سَکّٛ مِنْ نَ؟

⁵ ࢩَنْدٜ جٛوٜىٰتَتَࢡْرٜ عَمْ نجُولْنَامِ؞ مِ غٛطّٛ عَسْنغٛلْ إِسْرَاءِيلَ، لٜࢩٛلْ بٜنْيَمِنْ، مِ عِبْرَنِنغْکٜىٰجٛ عَسْلِيجٛ، وَکٜىٰرٜ تَوْرٜىٰتَ بٛو، مِ ڢَرِسَاجٛ؞

⁶ وَکٜىٰرٜ تِينَارٜ، مِتٛوࢩٛووٛنٛ جَمَعَارٜ نُطِّنْࢡٜ؞ ڢٛدّٜ عَدِلَاکُ تَوْرٜىٰتَ بٛو، مِ لَاࢡْطٛ؞

⁷ کُوجٜ طٜعٜ ڢُو، ࢡٛويْمَ مِلَارِنٛ طٜ بَنَ رِبَ؞ عَمَّا جٛنْتَ مِطٛنْ لَارَ طٜ بَنَ عَسَرْ، نغَمْ دَلِيلَ اَلْمَسِيحُ؞

⁸ نَا کُوجٜ طٜعٜ تَنْ، عَمَّا مِطٛنْ لَارَ کٛو طُمٜ ڢُو بَنَ عَسَرْ، نغَمْ مِحٜࢡِ کٛ ࢡُرِ طُمْ ڢُو‏: طُمْ عَنْدُغٛ عِيسَى اَلْمَسِيحُ، جَوْمِرَاوٛ عَمْ؞ نغَمْ دَلِيلَ مَاکٛ نغُدِنْمِ کٛو طُمٜ ڢُو؞ مِطٛنْ لَارَ طُمْ بَنَ مبُووْرِ مٜىٰرٜ، نغَمْ حَا مِحٜࢡَ اَلْمَسِيحُ،

⁹ مِحَوْتَ بٜى مَاکٛ مِمَرَ عَدِلَاکُ نغُ عِوَايْ حَا طٛوْتَارٜ عَمْ حٜىٰدِ تَوْرٜىٰتَ، عَمَّا حَا اَللَّه مٛ تَبِتِنِ طُمْ دٛوْ نُطِّنْکِ ندٜرْ اَلْمَسِيحُ؞

¹⁰ نغَمْ کٛ نغِطْمِ، طُمْ عَنْدُغٛ اَلْمَسِيحُ عٜ بَاوْطٜ اَللَّه مٛ عُمِّتِنِمٛ دِغَ مَايْدٜ عٜ کَوْتَلْ بٜى مَاکٛ ندٜرْ تٛرَّاجِ مَاکٛ، مِلَاتٛ نَنْدُطٛ بٜى مَاکٛ ندٜرْ مَايْدٜ مَاکٛ،

¹¹ نغَمْ حَا مِنْ بٛو مِيٛتّٛ عُمِّتِنٜىٰکِ مَايْࢡٜ، تٛ حٜࢡٛتٛ؞

کٜىٰرٛلْ دَطَ-دَطَ

¹² نَا مِحٜࢡِ طُمْ ڢُو مَلَّ مِلَاتَکٜ تِمُّطٛ؞ عَمَّا مِطٛنْ دٛغَّ نغَمْ حَا مِنَنغَ طُمْ، نغَمْ عِيسَى اَلْمَسِيحُ بٛو نَنغِ يَمْ؞

¹³ ڢَکَتْ، دٜىٰرْطَمْعٜنْ، مِلَارَايْ حٛورٜ عَمْ بَنَ مِنَنغِ طُمْ؞ ندَا کٛ مبَطَنْمِ‏: مِحٛوعِ عَنِّيَ يٜجِّتِتْغٛ کٛ عَشُّمِ ࢡَاوٛ، مِطٛنْ تِيتٛ کٛ وٛنِ يٜىٰسٛ،

¹⁴ مِطٛنْ حَࢡْدَ يٛتَّاغٛ کٜىٰرٛلْ دَطَ-دَطَ، حَا مِحٜࢡَ کٜࢡَلْ عٜوْنَاندُ ندُ اَللَّه عٜوْنٛرِ يَمْ ندٜرْ عِيسَى اَلْمَسِيحُ؞

¹⁵ سٜيْ عٜنْ نُمَ بَنَ نٛنْ تٛ عٜنْ لِمِ کٛعٜ مٜنْ ندٜرْ تِمُّࢡٜ؞ کٛو تٛ وٛودِ کٛ ݠَامْرٛتٛنْ بٜى لَاوٛلْ ڢٜىٰرٜ، اَللَّه لَࢡِّنَنَنْ عٛنْ طُمْ؞

¹⁶ بٜى نٛنْ ڢُو، ندٜ نِي عٜنْ نجٛتَّکٜ دَرْندٜ ندٜعٜ، نجَحْدٜنْ ڢٛدّٜ دَرْندٜ مَنْ حَوْتَادٜ؞

¹⁷ مبَطٜ کٛ مِوَطَتَ، عٛنٛنْ دٜىٰرْطَمْعٜنْ، شُتٜ تٛکِّيࢡٜ مِسَالُوٛلْ نغٛلْ کٜࢡْطٛنْ حَا عَمِنْ؞

¹⁸ کٛ مبِعْمِ عٛنْ ندٜ طُوطُّمْ، جٛنْتَ مبِعَنْمِ طُمْ بٜى غٛنْطِ‏: طُوطْࢡٜ لَاتَکٜ کٛنّٜعٜنْ غَاڢَانغَلْ اَلْمَسِيحُ، يَحْدُ مَࢡّٜ طٛنْ حٛنَ نغَلْ؞

¹⁹ رَغَرٜ مَࢡّٜ طُمْ حَلْکٜرٜ؞ دٜىٰطِ مَࢡّٜ لَاتِ طٛوَنْتٜىٰطٛ مَࢡّٜ؞ ࢡٜطٛنْ مَنْتٛرٛ کُوطٜ مَࢡّٜ شٜمْتِنِيطٜ؞ ࢡٜطٛنْ شُکْلَنٛ کُوجٜ دُنِيَارُ تَنْ؞

²⁰ عَمَّا عٜنٜنْ کَمْ، حَا عَسَمَ وُرٛ مٜنْ وٛنِ؞ دِغَ تٛنْ بٛو کِسْنٛووٛ عٜنْ، جَوْمِرَاوٛ عِيسَى اَلْمَسِيحُ مٛ مِنْ ندٜىٰنَتَ عِوٛيْتَ؞

²¹ کَنغْکٛ عٛوَيْلَنْ ࢡَلِّ مٜنْ تَمْݠُطِ لٜىٰسْطِ، حَا طِ لَاتٛ بَنَ ࢡَنْدُ مَاکٛ مَرْندُ تٜدُّنغَلْ، ڢٛدّٜ بَاوْطٜ مَاکٛ، وَاتٛ بَاوْطٜ دٛولُغٛ کُوجٜ ڢُو طٛوْتَنٛ مٛ؞