لِمْلٜ 3 - دٜڢْتٜرٜ اَللَّه ڢُلْڢُلْدٜ عَدَمَوَ

ࢡِࢡّٜ هَـٰرُونَ

¹ ندَا دَࢩْغٛلْ هَـٰرُونَ عٜ نغٛلْ مُوسَى وَکَّتِ جَوْمِرَاوٛ وٛلْوَنِ مُوسَى دٛوْ حٛوسٜىٰرٜ سِنَ؞

² ندَا عِنْطٜ ࢡِࢡّٜ هَـٰرُونَ‏: نَدَبْ، عَڢٛ مَاکٛ عٜ عَبِحُ عٜ عٜلِعَزَارُ عٜ عِتَمَرْ؞

³ ࢡٜ مٛيْتَاࢡٜ عٜ ࢡٜ حَلْڢِتِنَاࢡٜ کُوغَلْ لِمَنْکُ؞

⁴ عَمَّا نَدَبْ عٜ عَبِحُ مَايِ يٜىٰسٛ جَوْمِرَاوٛ ندٜرْ لَدّٜ سِنَ ندٜ ࢡٜنغَدِّ يِيتٜ نغٜ سٜنَاکَ يٜىٰسٛ مَاکٛ؞ ࢡٜنغَلَا ࢡِکّٛيْ؞ عٜلِعَزَارُ عٜ عِتَمَرْ کُووِ کُوغَلْ لِمَنْکُ دٛوْ عَرْدَانغَلْ بَابَ مُوطُمْعٜنْ هَـٰرُونَ؞

کُوغَلْ لٜوِعٜنْ

⁵ جَوْمِرَاوٛ وِعِ مُوسَى‏:

⁶ «عُمْرُ يِمْࢡٜ لٜࢩٛلْ لٜوِ ࢡَدِتٛ؞ دَرْنُ ࢡٜ يٜىٰسٛ هَـٰرُونَ لِمَنْجٛ حَا ࢡٜمبَلَّ مٛ؞

⁷ ࢡٜکُووَنَنْ مٛ عٜ ࢡٜکُووَنَنْ بٛو جَمَعَارٜ ڢُو حَا لَيْمَارُ ڢٛتِّرْدٜ؞ ࢡٜکُووَنْ ندٜرْ جٛوطٛرْدٜ؞

⁸ ࢡٜعَيْنَنْ کُووْرُطٜ غٛنْطٜ ندٜرْ لَيْمَارُ ڢٛتِّرْدٜ، ࢡٜکُووَنَنْ إِسْرَاءِيلَعٜنْ ڢُو؞ ࢡٜکُووَنْ ندٜرْ جٛوطٛرْدٜ؞

⁹ حٛکُّ لٜوِعٜنْ حَا هَـٰرُونَ عٜ ࢡِࢡّٜ مُمْ، ࢡٜلَاتَنٛ ࢡٜ دٛکَّلْ شَکَ إِسْرَاءِيلَعٜنْ؞

¹⁰ عَمَّا هَـٰرُونَ عٜ ࢡِࢡّٜ مُمْ، دَرْنُ ࢡٜ حَا ࢡٜکُووَ کُوغَلْ لِمَنْکُ؞ تٛ غٛطّٛ ڢٜىٰرٜ ࢡَدِتَکٜ نغَمْ حُووَ کُوغَلْ مَࢡّٜ، عٛ مبَرٜتٜىٰطٛ؞»

¹¹ جَوْمِرَاوٛ وِعِ مُوسَى‏:

¹² «ندَا، مِنْ مِحٛوعِ لٜوِعٜنْ شَکَ إِسْرَاءِيلَعٜنْ مبَتُّدِ عَڢْࢡٜ ڢُو، مبَتُّدِ عَڢْࢡٜ إِسْرَاءِيلَعٜنْ؞ لٜوِعٜنْ مِنْ جٜيِ،

¹³ نغَمْ عَڢْࢡٜ ڢُو مِنْ جٜيِ؞ وَکَّتِ مِمبَرِ عَڢْࢡٜ ڢُو ندٜرْ لٜسْدِ مِصْرَ، مِسٜنِ عَڢْࢡٜ عٜ عَڢِ ڢُو ندٜرْ إِسْرَاءِيلَ؞ عَڢْࢡٜ يِمْࢡٜ مَلَّ عَڢِ دَبَّاجِ، مِنْ جٜيِ؞ مِنْ وٛنِ جَوْمِرَاوٛ؞»

لِمْکِ لٜوِعٜنْ

¹⁴ جَوْمِرَاوٛ وٛلْوَنِ مُوسَى ندٜرْ لَدّٜ سِنَ، وِعِ‏:

¹⁵ «لِمٜ لٜوِعٜنْ ڢٛدّٜ عَسْلِ عٜ شِعٜ مُوطُمْعٜنْ؞ لِمٜ وٛرْࢡٜ ڢُو، دِغَ مٛ لٜوْرُ عٜ کٛ ࢡُرِ؞»

¹⁶ مُوسَى لِمِ ࢡٜ بَنَ جَوْمِرَاوٛ عُمْرِمٛ؞

¹⁷ ندَا عِنْطٜ ࢡِࢡّٜ لٜوِ‏: غٜرْسٛنْ عٜ کٜحَتْ عٜ مٜرَارِ؞

¹⁸ ندَا عِنْطٜ ࢡِࢡّٜ غٜرْسٛنْ ڢٛدّٜ شِعٜ مُوطُمْعٜنْ‏: لِبْنِ عٜ سِمْعِ؞

¹⁹ ندَا عِنْطٜ ࢡِࢡّٜ کٜحَتْ ڢٛدّٜ شِعٜ مُوطُمْعٜنْ‏: عَمْرَمْ عٜ يِشٜحَرْ عٜ حٜبُرُونْ عٜ عُزِّيٜلْ؞

²⁰ ندَا عِنْطٜ ࢡِࢡّٜ مٜرَارِ ڢٛدّٜ شِعٜ مُوطُمْعٜنْ‏: مَحَلِ عٜ مُسِ؞ کَمْࢡٜ نغٛنِ شِعٜ لٜوِعٜنْ؞

²¹ وٛودِ شِعٜ غٜرْسٛنِعٜنْ طِطِ‏: سَارٜ لِبْنِ عٜ ندٜ سِمْعِ؞

²² لِمْغَلْ وِنْدَاࢡٜ مَࢡّٜ ڢُو وَطِ عُجِنٜ نجٛوٜىٰطِطٛ عٜ تٜىٰمٜطّٜ نجٛوٛ (7,500)، وٛرْࢡٜ ࢡٜ لٜوْرُ عٜ کٛ ࢡُرِ؞

²³ شِعٜ غٜرْسٛنِعٜنْ شَنغِنِ ࢡَاوٛ جٛوطٛرْدٜ، حَا حِيرْنَانغٜ؞

²⁴ عٜلِيَسَڢْ ࢡِي لَيٜلْ وٛنِ بَابَ-سَارٜ مَࢡّٜ؞

²⁵ ندٜرْ لَيْمَارُ ڢٛتِّرْدٜ، غٜرْسٛنِعٜنْ حَلْڢِتِنَاࢡٜ جٛوطٛرْدٜ بٜى لَيْمَارُ مَارٜ عٜ سُدَّارٜ مَارٜ عٜ وِيرْندَلّٛ وٛنْنغٛ حَا نَسْتِرْدٜ لَيْمَارُ مَنْ،

²⁶ نٛنْ بٛو وِيرْندَلّٛوجِ دَلْدَلْ عٜ وِيرْندَلّٛ حَا نَسْتِرْدٜ دَلْدَلْ تَارِيندٜ جٛوطٛرْدٜ عٜ غُلْدُطُمْ عُورْلٜ عٜ ࢡٛغِّ مَارٜ عٜ کُوغَلْ مَنْ ڢُو؞

²⁷ وٛودِ شِعٜ کٜحَتِعٜنْ نَيِ‏: سَارٜ عَمْرَمْ، سَارٜ يِشٜحَرْ، سَارٜ حٜبُرُونْ عٜ سَارٜ عُزِّيٜلْ؞

²⁸ لِمْغَلْ وٛرْࢡٜ ࢡٜ لٜوْرُ عٜ کٛ ࢡُرِ ڢُو وَطِ عُجِنٜ نجٛوٜىٰتَتٛ عٜ تٜىٰمٜطّٜ نجٛوٜىٰغٛ (8,600)، ࢡٜکُووَنْ حَا نٛکُّورٜ سٜنِيندٜ؞

²⁹ شِعٜ کٜحَتِعٜنْ شَنغِنِ حَا وَکٜىٰرٜ جٛوطٛرْدٜ ڢٛمْبِنَارٜ؞

³⁰ عٜلِشَڢَنْ ࢡِي عُزِّيٜلْ وٛنِ بَابَ-سَارٜ مَࢡّٜ؞

³¹ ࢡٜ حَلْڢِتِنَاࢡٜ سُنْدُکْرُ عَلْکَوَلْ عٜ تَابَلْ عٜ جٛعِّنِرْطُمْ ݠِتِّرْلَاجِ عٜ غُلْدُطُمْ عُورْلٜ عٜ کِرْسِرْطٜ عٜ کُووْرُطٜ طٜ لِمَنْعٜنْ کُووْتِنِرْتَ حَا نٛکُّورٜ سٜنِيندٜ، نٛنْ بٛو وِيرْندَلّٛ عٜ کُوغَلْ مَنْ ڢُو؞

³² عٜلِعَزَارُ ࢡِي هَـٰرُونَ لِمَنْجٛ وٛنِ حٛورٜىٰجٛ لٜوِعٜنْ مَوْطٛ، عٛ عَيْنٛووٛ حُووٛوࢡٜ حَا نٛکُّورٜ سٜنِيندٜ؞

³³ وٛودِ شِعٜ مٜرَارِعٜنْ طِطِ‏: سَارٜ مَحَلِ عٜ سَارٜ مُسِ؞

³⁴ لِمْغَلْ وِنْدَاࢡٜ ڢُو وَطِ عُجِنٜ نجٛوٜىٰغٛ عٜ تٜىٰمٜطّٜ طِطٛ (6,200)، وٛرْࢡٜ ࢡٜ لٜوْرُ عٜ کٛ ࢡُرِ؞

³⁵ شُرِيٜلْ ࢡِي عَبِحَيِلْ وٛنِ بَابَ-سَارٜ مٜرَارِعٜنْ؞ ࢡٜشَنغِنِ حَا وَکٜىٰرٜ جٛوطٛرْدٜ وٛيْلَارٜ؞

³⁶ ࢡٜ حَلْڢِتِنَاࢡٜ کَاتَاکٛوجٜ جٛوطٛرْدٜ، لٜطّٜ غَاڢٛتٛوطٜ، دَنغْرَنغٜ بٜى کٛسْطٜ مَاجٜ، کُووْرُطٜ عٜ کُوغَلْ مَنْ ڢُو؞

³⁷ نٛنْ بٛو دَنغْرَنغٜ دَلْدَلْ بٜى کٛسْطٜ مَاجٜ، تِغِّرْطٜ عٜ ࢡٛغِّ؞

³⁸ مُوسَى عٜ هَـٰرُونَ بٜى ࢡِࢡّٜ مُوطُمْعٜنْ شَنغِنِ يٜىٰسٛ لَيْمَارُ ڢٛتِّرْدٜ، حَا ڢُونَانغٜ؞ ࢡٜ حَلْڢِتِنَاࢡٜ کُوغَلْ حَا نٛکُّورٜ سٜنِيندٜ نغَمْ إِسْرَاءِيلَعٜنْ؞ تٛ غٛطّٛ ڢٜىٰرٜ ࢡَدِتَکٜ نغَمْ حُووَ کُوغَلْ مَࢡّٜ، عٛ مبَرٜتٜىٰطٛ؞

³⁹ لِمْغَلْ لٜوِعٜنْ وٛرْࢡٜ، ࢡٜ لٜوْرُ عٜ کٛ ࢡُرِ ࢡٜ مُوسَى عٜ هَـٰرُونَ لِمِ ڢٛدّٜ شِعٜ مُوطُمْعٜنْ عٜ ڢٛدّٜ عُمْرٛورٜ جَوْمِرَاوٛ وَطِ عُجِنٜ نٛوغَسْ عٜ طِطٛ (22,000)؞

لِمْکِ عَڢْࢡٜ

⁴⁰ جَوْمِرَاوٛ وِعِ مُوسَى‏: «لِمْ عَڢْࢡٜ وٛرْࢡٜ ڢُو ندٜرْ إِسْرَاءِيلَ، وِنْدُ ࢡٜ عِنْدٜ عِنْدٜ، دِغَ مٛ لٜوْرُ عٜ کٛ ࢡُرِ؞

⁴¹ مِنْ وٛنِ جَوْمِرَاوٛ؞ حٛوعَنَمْ لٜوِعٜنْ مبَتُّدِ عَڢْࢡٜ إِسْرَاءِيلَعٜنْ ڢُو، نٛنْ بٛو دَبَّاجِ لٜوِعٜنْ مبَتُّدِ عَڢِ دَبَّاجِ إِسْرَاءِيلَعٜنْ ڢُو؞»

⁴² مُوسَى لِمِ عَڢْࢡٜ وٛرْࢡٜ ڢُو ندٜرْ إِسْرَاءِيلَ، بَنَ جَوْمِرَاوٛ عُمْرُنٛ مٛ؞

⁴³ لِمْغَلْ لِمَاࢡٜ، دِغَ ࢡِنغٜلْ نغٜلْ لٜوْرُ عٜ کٛ ࢡُرِ وَطِ عُجِنٜ نٛوغَسْ عٜ طِطٛ عٜ تٜىٰمٜطّٜ طِطٛ عٜ شَݠَّنْطٜ نجٛوٜىٰطِطٛ عٜ تَتٛ (22,273)؞

⁴⁴ ندٜنْ جَوْمِرَاوٛ وِعِ مُوسَى‏:

⁴⁵ «حٛوعُ جٛنْتَ لٜوِعٜنْ مبَتُّدِ عَڢْࢡٜ وٛرْࢡٜ ڢُو ندٜرْ إِسْرَاءِيلَ عٜ دَبَّاجِ لٜوِعٜنْ مبَتُّدِ عَڢِ دَبَّاجِ إِسْرَاءِيلَعٜنْ؞ لٜوِعٜنْ مِنْ جٜيِ؞ مِنْ وٛنِ جَوْمِرَاوٛ؞

⁴⁶ عَمَّا سٜيْ عَسٛوتَّ عَڢْࢡٜ إِسْرَاءِيلَعٜنْ تٜىٰمٜطّٜ طِطٛ عٜ شَݠَّنْطٜ نجٛوٜىٰطِطٛ عٜ تَتٛ (273)، يٛوَاࢡٜ دٛوْ لِمْغَلْ لٜوِعٜنْ؞

⁴⁷ عَحٛوعَ نغَمْ کٛو مٛيْ مَࢡّٜ شٜىٰدٜ شَرْدِ جٛوِ، ڢٛدّٜ عٜتِرْغَلْ سُودُ سٜنِيندُ‏: تٜدّٜىٰنغَ سُلٜيْجٜ تٜىٰمٜرّٜ ڢُو وَطَنْ بَاکِنْ کِلٛ غٛوتٜلْ؞

^48-49 حٛکُّ هَـٰرُونَ عٜ ࢡِࢡّٜ مُمْ شٜىٰدٜ شٛوتَّارِ نغَمْ يٛوَاࢡٜ دٛوْ لِمْغَلْ لٜوِعٜنْ غٛ؞» مُوسَى جَࢡِ شٜىٰدٜ مَنْ؞

⁵⁰ شٛوتَّارِ عَڢْࢡٜ إِسْرَاءِيلَ مَنْ وَطِ شٜىٰدٜ شَرْدِ عُجِنٜىٰرٜ عٜ تٜىٰمٜطّٜ تَتِ عٜ شَݠَّنْطٜ جٛوٜىٰغٛ عٜ جٛوِ (1,365) ڢٛدّٜ عٜتِرْغَلْ سُودُ سٜنِيندُ؞

⁵¹ عٛحٛکِّ طٜ هَـٰرُونَ عٜ ࢡِࢡّٜ مُمْ، بَنَ جَوْمِرَاوٛ عُمْرُنٛ مٛ؞