لِمْلٜ 2 - دٜڢْتٜرٜ اَللَّه ڢُلْڢُلْدٜ عَدَمَوَ

نٛکُّوجٜ لٜعِ ندٜرْ سَنغٜىٰرٜ

¹ جَوْمِرَاوٛ وِعِ مُوسَى عٜ هَـٰرُونَ‏:

² «إِسْرَاءِيلَعٜنْ شَنغِنَنْ کٛو مٛيْ بَنغٜ تُوتَوَلْ يٜࢡْرٜ مُمْ، لٜسْ عَلَامَ سَارٜ مُمْ؞ سَنغٜىٰرٜ تَارٛ لَيْمَارُ ڢٛتِّرْدٜ، تِيتٛتِرَ بٜى مَارٜ؞

³ «شَنغِنَنْࢡٜ حَا ڢُونَانغٜ نغٛنَنْ لٜسْ تُوتَوَلْ يٜࢡْرٜ يَحُودَ، ڢٛدّٜ مٛوࢡٜ کٛنُ مُوطُمْعٜنْ بَنَ نِعِ‏: نَحَسُنُ ࢡِي عَمِّنَدَبُ طٛوَ لٜࢩٛلْ يَحُودَ؞

⁴ لِمْغَلْ حٛنٛوࢡٜ مَاغٛلْ وَطِ عُجِنٜ شَݠَّنْطٜ نجٛوٜىٰطِطٛ عٜ نَيٛ عٜ تٜىٰمٜطّٜ نجٛوٜىٰغٛ (74,600)؞

⁵ لٜࢩٛلْ عِسَّکَرْ سَنغِنَ کٛمْبِ مَࢡّٜ؞ نٜتَنٜيٜلْ ࢡِي شُعَرْ طٛوَ نغٛلْ؞

⁶ لِمْغَلْ حٛنٛوࢡٜ مَاغٛلْ وَطِ عُجِنٜ شَݠَّنْطٜ نجٛوٛ عٜ نَيٛ عٜ تٜىٰمٜطّٜ نَيٛ (54,400)؞

⁷ ندٜنْ لٜࢩٛلْ زَبُلٛنْ تٛکّٛتٛ؞ عٜلِيَبُ ࢡِي حٜلٛنْ طٛوَ نغٛلْ؞

⁸ لِمْغَلْ حٛنٛوࢡٜ مَاغٛلْ وَطِ عُجِنٜ شَݠَّنْطٜ نجٛوٛ عٜ نجٛوٜىٰطِطٛ عٜ تٜىٰمٜطّٜ نَيٛ (57,400)؞

⁹ لِمْغَلْ حٛنٛوࢡٜ وِنْدَاࢡٜ حَا يٜࢡْرٜ يَحُودَ ڢُو وَطِ عُجِنٜ تٜىٰمٜرّٜ عٜ شَݠَّنْطٜ نجٛوٜىٰتَتٛ عٜ نجٛوٜىٰغٛ عٜ تٜىٰمٜطّٜ نَيٛ (186,400)؞ کَمْࢡٜ عَرْدٛتٛ ندٜرْ جَحَالٜ؞

¹⁰ «حَا ڢٛمْبِنَ، يٜࢡْرٜ رُبٜنْ سَنغِنَ لٜسْ تُوتَوَلْ مُمْ، ڢٛدّٜ مٛوࢡٜ کٛنُ مَارٜ؞ عٜلِشُرُ ࢡِي سٜدٜوُرْ طٛوَ لٜࢩٛلْ رُبٜنْ؞

¹¹ لِمْغَلْ حٛنٛوࢡٜ مَاغٛلْ وَطِ عُجِنٜ شَݠَّنْطٜ نَيٛ عٜ نجٛوٜىٰغٛ عٜ تٜىٰمٜطّٜ نجٛوٛ (46,500)؞

¹² لٜࢩٛلْ سِمٜيٛنْ تٛکّٛتٛ؞ سٜلُمِيٜلْ ࢡِي شُرِسَدَّيْ طٛوَ نغٛلْ؞

¹³ لِمْغَلْ حٛنٛوࢡٜ مَاغٛلْ وَطِ عُجِنٜ شَݠَّنْطٜ نجٛوٛ عٜ نجٛوٜىٰنَيٛ عٜ تٜىٰمٜطّٜ تَتٛ (59,300)؞

¹⁴ ندٜنْ لٜࢩٛلْ غَدَ تٛکّٛتٛ؞ عٜلِيَسَڢْ ࢡِي رٜعُوٜلْ طٛوَ نغٛلْ؞

¹⁵ لِمْغَلْ حٛنٛوࢡٜ مَاغٛلْ وَطِ عُجِنٜ شَݠَّنْطٜ نَيٛ عٜ نجٛوٛ عٜ تٜىٰمٜطّٜ نجٛوٜىٰغٛ عٜ شَݠَّنْطٜ نجٛوٛ (45,650)؞

¹⁶ لِمْغَلْ حٛنٛوࢡٜ وِنْدَاࢡٜ حَا يٜࢡْرٜ رُبٜنْ ڢُو وَطِ عُجِنٜ تٜىٰمٜرّٜ عٜ شَݠَّنْطٜ نجٛوٛ عٜ نغٛعٛ عٜ تٜىٰمٜطّٜ نَيٛ عٜ شَݠَّنْطٜ نجٛوٛ (151,450)؞ يٜࢡْرٜ رُبٜنْ وٛنِ طِطَوْرٜ ندٜرْ جَحَالٜ؞

¹⁷ «ࢡَاوٛطٛنْ لٜوِعٜنْ تٛکّٛتٛ ندٜرْ جَحَالٜ، ࢡٜندٛونْدٛتٛ لَيْمَارُ ڢٛتِّرْدٜ؞ ࢡٜتٛکِّنْدِرَنْ بَنَ نٛ ࢡٜتَمِّ سَنغِنغٛ بٛو، کٛو مٛيْ ندٜرْ يٜࢡْرٜ مُمْ، ڢٛدّٜ تُوتَوَلْ مُمْ؞

¹⁸ «حَا حِيرْنَانغٜ، يٜࢡْرٜ عٜڢْرَيِمْ سَنغِنَ لٜسْ تُوتَوَلْ مُمْ، ڢٛدّٜ مٛوࢡٜ کٛنُ مُمْ‏: عٜلِيسَمَ ࢡِي عَمِّحُدُ طٛوَ لٜࢩٛلْ عٜڢْرَيِمْ؞

¹⁹ لِمْغَلْ حٛنٛوࢡٜ مَاغٛلْ وَطِ عُجِنٜ شَݠَّنْطٜ نَيٛ عٜ تٜىٰمٜطّٜ نجٛوٛ (40,500)؞

²⁰ لٜࢩٛلْ مَنَسَّ طٛنْ کٛمْبِ لٜࢩٛلْ عٜڢْرَيِمْ؞ غَمَلِيٜلْ ࢡِي ݠٜدَشُرُ طٛوَ نغٛلْ؞

²¹ لِمْغَلْ حٛنٛوࢡٜ مَاغٛلْ وَطِ عُجِنٜ شَݠَّنْطٜ تَتٛ عٜ طِطٛ عٜ تٜىٰمٜطّٜ طِطٛ (32,200)؞

²² ندٜنْ لٜࢩٛلْ بٜنْيَمِنْ تٛکّٛتٛ؞ عَبِدَنْ ࢡِي غِدِعٛنِ طٛوَ نغٛلْ؞

²³ لِمْغَلْ حٛنٛوࢡٜ مَاغٛلْ وَطِ عُجِنٜ شَݠَّنْطٜ تَتٛ عٜ نجٛوٛ عٜ تٜىٰمٜطّٜ نَيٛ (35,400)؞

²⁴ لِمْغَلْ حٛنٛوࢡٜ وِنْدَاࢡٜ حَا سَنغٜىٰرٜ عٜڢْرَيِمْ ڢُو وَطِ عُجِنٜ تٜىٰمٜرّٜ عٜ نجٛوٜىٰتَتٛ عٜ تٜىٰمٜرّٜ (108,100)؞ يٜࢡْرٜ عٜڢْرَيِمْ وٛنِ تَتَࢡْرٜ ندٜرْ جَحَالٜ؞

²⁵ «حَا وٛيْلَ بٛو، يٜࢡْرٜ دَنْ سَنغِنَ لٜسْ تُوتَوَلْ مُمْ، ڢٛدّٜ مٛوࢡٜ کٛنُ مُمْ؞ عَحِعٜزٜرْ ࢡِي عَمِّسَدَّيْ طٛوَ لٜࢩٛلْ دَنْ؞

²⁶ لِمْغَلْ حٛنٛوࢡٜ مَاغٛلْ وَطِ عُجِنٜ شَݠَّنْطٜ نجٛوٜىٰغٛ عٜ طِطٛ عٜ تٜىٰمٜطّٜ نجٛوٜىٰطِطٛ (62,700)؞

²⁷ لٜࢩٛلْ عَسٜرْ بٛو سَنغِنَ کٛمْبِ لٜࢩٛلْ دَنْ؞ ݠَغِيٜلْ ࢡِي عٛکْرَنْ طٛوَ نغٛلْ؞

²⁸ حٛنٛوࢡٜ مَاغٛلْ وَطِ عُجِنٜ شَݠَّنْطٜ نَيٛ عٜ نغٛعٛ عٜ تٜىٰمٜطّٜ نجٛوٛ (41,500)؞

²⁹ ندٜنْ لٜࢩٛلْ نٜڢْتَلِ تٛکّٛتٛ؞ عَحِيرَ ࢡِي عٜنَنْ طٛوَ نغٛلْ؞

³⁰ حٛنٛوࢡٜ مَاغٛلْ وَطِ عُجِنٜ شَݠَّنْطٜ نجٛوٛ عٜ تَتٛ عٜ تٜىٰمٜطّٜ نَيٛ (53,400)؞

³¹ لِمْغَلْ وِنْدَاࢡٜ حَا سَنغٜىٰرٜ دَنْ ڢُو وَطِ عُجِنٜ تٜىٰمٜرّٜ عٜ شَݠَّنْطٜ نجٛوٛ عٜ نجٛوٜىٰطِطٛ عٜ تٜىٰمٜطّٜ نجٛوٜىٰغٛ (157,600)؞ ࢡٜشَکِتِتّٛ ندٜرْ جَحَالٜ، کٛو مٛيْ ڢٛدّٜ تُوتَوَلْ يٜࢡْرٜ مُمْ؞»

³² کَمْࢡٜ نغٛنِ إِسْرَاءِيلَعٜنْ لِمَاࢡٜ ڢٛدّٜ شِعٜ مُوطُمْعٜنْ؞ لِمْغَلْ حٛنٛوࢡٜ ڢُو وَطِ عُجِنٜ تٜىٰمٜطّٜ نجٛوٜىٰغٛ عٜ تَتٛ عٜ تٜىٰمٜطّٜ نجٛوٛ عٜ شَݠَّنْطٜ نجٛوٛ (603,550)؞

³³ عَمَّا لٜوِعٜنْ لِمَاکَ شَکَ إِسْرَاءِيلَعٜنْ، بَنَ جَوْمِرَاوٛ عُمْرُنٛ مُوسَى؞

³⁴ إِسْرَاءِيلَعٜنْ مبَطِ کَلْ-کَلْ بَنَ جَوْمِرَاوٛ عُمْرُنٛ مُوسَى ڢُو؞ ࢡٜشَنغِنِ، کٛو مٛيْ بَنغٜ تُوتَوَلْ مُمْ، ࢡٜمبَطِ جَحَانغَلْ ڢٛدّٜ عَسْلِ مَࢡّٜ عٜ شِعٜ مَࢡّٜ؞