مَلَکِيَ 2 - دٜڢْتٜرٜ اَللَّه ڢُلْڢُلْدٜ عَدَمَوَ

¹ «جٛنْتَ کَمْ، عٛنٛنْ لِمَنْعٜنْ، عُمْرٛورٜ ندٜعٜ طٛنْ نغَمْ مٛوطٛنْ‏:

² تٛ عٛنْ نَنَايْ، تٛ عٛنْ مبَطَايْ عَنِّيَ تٜدِّنْغٛ عِنْدٜ عَمْ، ندٜنْ کَمْ مِعُکَّنْ نَالٛورٜ دٛوْ مٛوطٛنْ، مِلَاتِنَنْ بَرْکَاجِ مٛنْ نَالٛورٜ؞ عٛوحٛ، مِنَالِ طِ، نغَمْ عٛنْ نغَلَا عَنِّيَ حَکِّلَنْغٛ کٛو طُمٜ؞» نٛنْ جَوْمِرَاوٛ حٛنٛوࢡٜ عَسَمَ وِعِ؞

³ «ندَا، مِڢُرْکِتِتّٛ دَࢩْغٛلْ مٛنْ، مِوِشَّنْ شٛووٛووٜ دَبَّاجِ طِ عٛنْ کِرْسَتَ ندٜرْ جُولْطٜ مٛنْ حَا غٜىٰسٜ مٛنْ، ࢡٜندُڢْدَنْ عٛنْ بٜى مَاجٜ ڢُو؞

⁴ ندٜنْ عٛنْ عَنْدَنْ مِنْ مِعُمْرِ عُمْرٛورٜ ندٜعٜ نغَمْ مٛوطٛنْ، حَا عَلْکَوَلْ عَمْ بٜى لٜࢩٛلْ لٜوِ تَبِتَ؞ نٛنْ جَوْمِرَاوٛ حٛنٛوࢡٜ عَسَمَ وِعِ؞

⁵ عَلْکَوَلْ عَمْ بٜى مَاکٛ لَاتِنٛ نغٜىٰندَمْ عٜ سَلَامَنْ؞ مِحٛکِّمٛ طُمْ طِطِ ڢُو نغَمْ حَا عٛحُلَمِّ؞ ندٜنْ عٛحُلِ يَمْ، عٛدِوْنِ نغَمْ عِنْدٜ عَمْ؞

⁶ کِيتَ غٛونغَاحَ وٛنّٛ حَا حُنْدُکٛ مَاکٛ؞ زَمْبَ وٛودَا حَا حُنْدُکٛ مَاکٛ؞ عٛتٛکِّ يَمْ بٜى حٛولَارٜ عٜ ࢡٜرْندٜ غٛونغَارٜ؞ عٛلٛرْتِنِ طُوطْࢡٜ دِغَ عَيْبٜىٰجِ مَࢡّٜ؞

⁷ نغَمْ کُوغَلْ لِمَنْجٛ طُمْ عٜکِّتِنْغٛ عَنْدَلْ اَللَّه؞ يِمْࢡٜ طَࢡِّتَنْ کِيتَ حَا مَاکٛ، نغَمْ عٛ نٜلَاطٛ جَوْمِرَاوٛ حٛنٛوࢡٜ عَسَمَ؞

⁸ عَمَّا عٛنٛنْ، عٛنْ شٜلِ لَاوٛلْ بٜى کِيتَ مٛنْ، عٛنْ ندٛعِّ طُوطْࢡٜ ندٜرْ حَکّٜ بٜى کِيتَ مٛنْ؞ عٛنْ ݠِيسْتِ عَلْکَوَلْ عَمْ بٜى لٜࢩٛلْ لٜوِ؞ نٛنْ جَوْمِرَاوٛ حٛنٛوࢡٜ عَسَمَ وِعِ؞

⁹ نغَمْ مَنْ مِيَوْنِ عٛنْ، مِتٛسْکِنِ عٛنْ يٜىٰسٛ عُمَّاتٛورٜ ڢُو، نغَمْ عٛنْ کَکِّلَنَايْ لَابِ عَمْ؞ ندٜ عٛنْ مبَطِ کِيتَ بٛو، عٛنْ کِيتَاکِ يِمْࢡٜ ڢُو کَلْ-کَلْ؞»

ڢٜلٛورٜ دٛوْ تٜىٰغَلْ بٜى جَنَنْࢡٜ عٜ شٜىٰرْغَلْ بٜى رٜوْࢡٜ سُکَاکُ

¹⁰ نَا عٜنْ ڢُو عٜنْ نغٛودِ بَابِرَاوٛ غٛوتٛ نَ؟ نَا اَللَّه غٛوتٛ تَغِ عٜنْ ڢُو نَ؟ کٛنِ عٜنْ زَمْبٛتِرْتَ؟ کٛنِ عٜنْ نجَوِ عَلْکَوَلْ نغَلْ اَللَّه حَࢡُّنٛ بٜى کَاکِرَاࢡٜ مٜىٰطٜنْ؟

¹¹ يَحُودَ وَطِ زَمْبَ ندٜرْ إِسْرَاءِيلَ عٜ ندٜرْ عُرُسَلِيمَ؞ يَحُودُعٜنْ کُووِ کُوطٜ ࢩِدُّطٜ؞ يَحُودَ سٛࢡْنِ نٛکُّورٜ سٜنِيندٜ ندٜ جَوْمِرَاوٛ يِطِ بٜى تٜعُغٛ ڢَاࢩْࢡٜ تٛکِّيࢡٜ طٛوَنْتٜىٰطٛ جَنَنّٛ؞

¹² مٛ حُووَتَ عِرِنْ طُعُمْ، جَوْمِرَاوٛ تَعُمَ دَࢩْغٛلْ مَاکٛ دِغَ جٛوطٛرْطٜ يَعْقُوبُ، تَا غٛطّٛ دَࢩْغٛلْ مَاکٛ يَحْرَ دٛکَّلْ يٜىٰسٛ جَوْمِرَاوٛ حٛنٛوࢡٜ عَسَمَ؞

¹³ وٛودِ بٛو حُوندٜ طِطَوْرٜ ندٜ عٛنْ مبَطَتَ‏: عٛنْ طٛنْ شُدَّ حِرْسِرْدٜ جَوْمِرَاوٛ بٜى غٛنْطِ عٜ بٛجِّ عٜ عُومَالِ، نغَمْ عٛڢَالَتَا دٛکّٜ مٛنْ، عٛجَࢡَتَا طٜ دِغَ جُوطٜ مٛنْ؞

¹⁴ عَمَّا عٛنْ طٛنْ ࢨَمَ‏: «نغَمْ طُمٜ؟» نغَمْ جَوْمِرَاوٛ لَاتِ شٜىٰدٛووٛ حَکُّندٜ مَاطَ عٜ دٜبّٛ سُکَاکُ مَ؞ دٜبّٛ عٛو وٛنِ کَوْتِطِّرَاوٛ مَ مٛ کَࢡُّطَ عَلْکَوَلْ بٜى مُوطُمْ، عَمَّا عَزَمْبِمٛ؞

¹⁵ نَا جَوْمِرَاوٛ لَاتِنِ عٛنْ غٛطّٛ غٛوتٛ ندٜرْ ࢡَنْدُ عٜ رُوحُ نَ؟ طُمٜ غٛطّٛ عٛو طَࢡَّتَ؟ نَا حٜࢡُغٛ ࢡِکّٛيْ کٛيْ اَللَّه حٛکَّتَ؟ نغَمْ مَاجُمْ کَکِّلَنٜ کٛعٜ مٛوطٛنْ؞ تَا غٛطّٛ زَمْبٛ دٜبّٛ سُکَاکُ مُوطُمْ؞

¹⁶ جَوْمِرَاوٛ اَللَّه مٛ إِسْرَاءِيلَ وِعِ‏: «مِطٛنْ وَࢩَ شٜىٰرْغَلْ بَنَ مِوَࢩِرْتَ غٛطّٛ مٛ سٛࢡْنِ لِمْشٜ مُمْ بٜى تٛوࢩَارٜ؞ نغَمْ مَاجُمْ کَکِّلَنٜ کٛعٜ مٛوطٛنْ؞ تَا عٛنْ مبَطَ زَمْبَ؞» نٛنْ جَوْمِرَاوٛ حٛنٛوࢡٜ عَسَمَ وِعِ؞

ڢٜلٛورٜ دٛوْ حَلِّنَنْࢡٜ عَدِلَاکُ اَللَّه

¹⁷ عٛنْ طٛنْ شٛمْنَ جَوْمِرَاوٛ بٜى بٛلّٜ مٛنْ؞ عَمَّا عٛنْ طٛنْ ࢨَمَ‏: «بٜى طُمٜ مِنْ شٛمْنِمٛ؟» بٜى وِعُغٛ‏: «وَطَنْࢡٜ حَلّٜىٰندٜ ڢُو طٛنْ ݠٛتَّنَ اَللَّه، عٛطٛنْ سٜيٛرٛ ࢡٜ؞» مَلَّ بٛو‏: «تٛيْ اَللَّه کِيتٛووٛ غٛونغَاجٛ وٛنِ؟»