ڢَرِلَّاجِ لٜوِعٜنْ 3 - دٜڢْتٜرٜ اَللَّه ڢُلْڢُلْدٜ عَدَمَوَ

کِرْسٜتٜىٰطِ نغَمْ کَوْتَلْ يِمْࢡٜ بٜى اَللَّه

¹ «تٛ غٛطّٛ يِطِ لِيعَاغٛ کِرْسٜتٜىٰنغَ نغَمْ کَوْتَلْ يِمْࢡٜ بٜى اَللَّه، سٜيْ عٛحٛوعَ نغَارِ ندِ وَلَا عَيْبٜ مَلَّ نَغّٜ نغٜ وَلَا عَيْبٜ؞

² سٜيْ عٛيٛوَ جُنغٛ مَاکٛ دٛوْ حٛورٜ ندَبَّاوَ مَنْ، عٛحِرْسَ نغَ حَا دَمُّغَلْ لَيْمَارُ ڢٛتِّرْدٜ؞ لِمَنْعٜنْ دَࢩْغٛلْ هَـٰرُونَ مبِشَّ ࢨِيࢨَمْ مَاغَ حَا بَکٜىٰجٜ حِرْسِرْدٜ مَنْ نَيِ ڢُو؞

³ ندٜنْ ࢡٜلِيعَنٛ جَوْمِرَاوٛ غٜطَلْ غُلٜتٜىٰنغَلْ حَا کِرْسَانغَ نغَمْ کَوْتَلْ يِمْࢡٜ بٜى اَللَّه‏: ࢡٜلّٜرٜ سُدُّندٜ کُوجٜ رٜىٰدُ عٜ ࢡٜلّٜرٜ وٛنْدٜ دٛوْ تٜتٜکِ ڢُو

⁴ عٜ ࢡٛوࢨٜ بٜى ࢡٜلّٜرٜ وٛنْدٜ دٛوْ مَاجٜ عٜ ࢡٜلّٜرٜ دٛوْ حٜنغْرٜ؞

⁵ لِمَنْعٜنْ نغُلَ طُمْ ندٜرْ يِيتٜ حِرْسِرْدٜ، حَوْتَادٜ بٜى غُلٜتٜىٰطِ؞ عُورٜىٰنغٛلْ مَنْ بٜلْنغٛلْ ڢٛتَّنَنْ جَوْمِرَاوٛ؞

⁶ «تٛ غٛطّٛ يِطِ لِيعَنَاغٛ جَوْمِرَاوٛ ندَمّٛووَ نغَمْ کَوْتَلْ يِمْࢡٜ بٜى اَللَّه، سٜيْ عٛحٛوعَ نغٛرْغَ مَلَّ ندٜوَ، نغَ وَلَا عَيْبٜ؞

⁷ تٛ مبَالُ وٛنِ دٛکَّلْ مَاکٛ، سٜيْ عٛيَحْرَ نغُ يٜىٰسٛ جَوْمِرَاوٛ؞

⁸ عٛيٛوَ جُنغٛ مَاکٛ دٛوْ حٛورٜ مَاغُ، عٛحِرْسَ نغُ حَا دَمُّغَلْ لَيْمَارُ ڢٛتِّرْدٜ؞ لِمَنْعٜنْ دَࢩْغٛلْ هَـٰرُونَ مبِشَّ ࢨِيࢨَمْ مَاغُ حَا بَکٜىٰجٜ حِرْسِرْدٜ نَيِ ڢُو؞

⁹ ندٜنْ ࢡٜلِيعَنٛ جَوْمِرَاوٛ غٜطَلْ غُلٜتٜىٰنغَلْ حَا کِرْسَانغَ نغَمْ کَوْتَلْ يِمْࢡٜ بٜى اَللَّه‏: وَاتٛ ࢡٜلّٜرٜ عٜ وِشّٛ تَعَانغٛ حَا سٜنغٛرْدٜ عٜ ࢡٜلّٜرٜ سُدُّندٜ کُوجٜ رٜىٰدُ عٜ ࢡٜلّٜرٜ وٛنْدٜ دٛوْ تٜتٜکِ ڢُو

¹⁰ عٜ ࢡٛوࢨٜ بٜى ࢡٜلّٜرٜ وٛنْدٜ دٛوْ مَاجٜ عٜ ࢡٜلّٜرٜ دٛوْ حٜنغْرٜ؞

¹¹ لِمَنْجٛ وُلَ طُمْ ڢُو دٛوْ حِرْسِرْدٜ، طُمْ ࢩَامْدُ وُلٜتٜىٰندُ نغَمْ جَوْمِرَاوٛ؞

¹² «تٛ دٛکَّلْ مَاکٛ وٛنِ مبٜىٰوَ، سٜيْ عٛيَحْرَ نغَ يٜىٰسٛ جَوْمِرَاوٛ،

¹³ عٛوَلِّنَ جُنغٛ مَاکٛ دٛوْ حٛورٜ مَاغَ، عٛحِرْسَ نغَ حَا دَمُّغَلْ لَيْمَارُ ڢٛتِّرْدٜ؞ لِمَنْعٜنْ دَࢩْغٛلْ هَـٰرُونَ مبِشَّ ࢨِيࢨَمْ مَاغَ حَا بَکٜىٰجٜ حِرْسِرْدٜ نَيِ ڢُو؞

¹⁴ ندٜنْ ࢡٜلِيعَنٛ جَوْمِرَاوٛ غٜطَلْ کِرْسَانغَ مَنْ غُلٜتٜىٰنغَلْ، وَاتٛ ࢡٜلّٜرٜ سُدُّندٜ کُوجٜ رٜىٰدُ عٜ ࢡٜلّٜرٜ وٛنْدٜ دٛوْ تٜتٜکِ ڢُو

¹⁵ عٜ ࢡٛوࢨٜ بٜى ࢡٜلّٜرٜ وٛنْدٜ دٛوْ مَاجٜ عٜ ࢡٜلّٜرٜ دٛوْ حٜنغْرٜ؞

¹⁶ لِمَنْجٛ وُلَ طُمْ ڢُو دٛوْ حِرْسِرْدٜ، طُمْ ࢩَامْدُ وُلٜتٜىٰندُ نغَمْ جَوْمِرَاوٛ، عُورٜىٰنغٛلْ مَنْ بٜلْنغٛلْ ڢٛتَّنَنْ مٛ؞ ࢡٜلّٜرٜ ڢُو جَوْمِرَاوٛ جٜيِ؞

¹⁷ تَا عٛنْ ࢩَامَ ࢡٜلّٜرٜ عٜ ࢨِيࢨَمْ سَمْ؞ کٛو تٛيْ نجٛوطٛتٛنْ ڢُو، طُمْ لَاتِ ڢَرِلَّ ندُومِيکَ حَا غِدٜ مٛنْ ڢُو؞»