ڢَرِلَّاجِ لٜوِعٜنْ 2 - دٜڢْتٜرٜ اَللَّه ڢُلْڢُلْدٜ عَدَمَوَ

دٛکَّلْ ࢩَامْدُ

¹ «تٛ غٛطّٛ يِطِ لِيعَنَاغٛ جَوْمِرَاوٛ دٛکَّلْ ࢩَامْدُ، سٜيْ عٛحٛوعَ کُرٛورِ طِغُّندِ، عٛوَطَ نٜبَّمْ دٛوْ مَارِ، عٛسَمِّنَ عُورْلٜ دٛوْ مَارِ بٛو؞

² ندٜنْ عٛيَحْرَ طُمْ حَا لِمَنْعٜنْ دَࢩْغٛلْ هَـٰرُونَ؞ لِمَنْجٛ حٛوعَ کُرٛورِ طِغُّندِ دٜيْدٜيْ تَمْندَندٜ عٜ نٜبَّمْ، عٛحٛوعَ بٛو عُورْلٜ مَنْ ڢُو، عٛوُلَ طُمْ دٛوْ حِرْسِرْدٜ، طُمْ غٜطَلْ شِڢْتِنٛرْغَلْ؞ عُورٜىٰنغٛلْ دٛکَّلْ مَنْ بٜلْنغٛلْ ڢٛتَّنَنْ جَوْمِرَاوٛ؞

³ عَمَّا لُتُّطُمْ دٛکَّلْ ࢩَامْدُ طُمْ غٜطَلْ هَـٰرُونَ عٜ دَࢩْغٛلْ مُمْ؞ طُمْ غٜطَلْ ࢡُرْنغَلْ سٜنَاغٛ حَا دٛکّٜ غُلٜتٜىٰطٜ نغَمْ جَوْمِرَاوٛ؞

⁴ «تٛ عَيِطِ لِيعَاغٛ دٛکَّلْ ࢩَامْدُ تَمْسَانغَلْ دِغَ کَاتَنٜ، تَا وَطْ طُمْ بٜى تَمْرٜ عُڢْنَاندٜ؞ سٜيْ طُمْ لَاتٛ تَمْسٜىٰجٜ طٜ کُرٛورِ طِغُّندِ نجِيࢡَاندِ بٜى نٜبَّمْ مَلَّ تَمْسٜىٰجٜ بٜتّٜ غُجَاطٜ نٜبَّمْ؞

⁵ «تٛ عَيِطِ لِيعَاغٛ تَمْسٜىٰجٜ شَعَاطٜ دٛوْ بٜطٛلْ نجَمْندِ، سٜيْ عَوَطَ طٜ بٜى جِيࢡَاطُمْ کُرٛورِ طِغُّندِ عٜ نٜبَّمْ؞

⁶ سٜيْ عَڢٜتَ طٜ، عَوَطَ نٜبَّمْ دٛوْ مَاجٜ؞ کَنْجُمْ وٛنِ دٛکَّلْ ࢩَامْدُ؞

⁷ «تٛ عَيِطِ لِيعَاغٛ دٜڢَاطُمْ ندٜرْ ڢَيَنْدٜ، سٜيْ عَوَطَ طُمْ بٜى جِيࢡَاطُمْ کُرٛورِ طِغُّندِ عٜ نٜبَّمْ؞

⁸ سٜيْ عَيَحْرَ دٛکّٜ ࢩَامْدُ بَنَ طٜعٜ يٜىٰسٛ جَوْمِرَاوٛ، عَحٛکَّ طٜ لِمَنْجٛ، کَنغْکٛ بٛو عٛࢡَدِنَ طٜ حَا حِرْسِرْدٜ؞

⁹ عٛحٛوعَ غٜطَلْ شِڢْتِنٛرْغَلْ، عٛوُلَ نغَلْ دٛوْ حِرْسِرْدٜ؞ عُورٜىٰنغٛلْ مَنْ بٜلْنغٛلْ ڢٛتَّنَنْ جَوْمِرَاوٛ؞

¹⁰ عَمَّا لُتُّطُمْ دٛکّٜ ࢩَامْدُ طُمْ غٜطَلْ هَـٰرُونَ عٜ دَࢩْغٛلْ مُمْ؞ طُمْ غٜطَلْ ࢡُرْنغَلْ سٜنَاغٛ حَا دٛکّٜ غُلٜتٜىٰطٜ نغَمْ جَوْمِرَاوٛ؞

¹¹ «دٛکّٜ ࢩَامْدُ ڢُو طٜ لِيعَنْتٛوطٛنْ جَوْمِرَاوٛ، تَا مبَطٜ طٜ بٜى عُڢْنِرْطُمْ؞ تَا ݠُونَاندِ مَلَّ نجُمْرِ تَوٜ ندٜرْ دٛکّٜ غُلٜتٜىٰطٜ نغَمْ جَوْمِرَاوٛ؞

¹² نغَدّٜ طُمْ يٜىٰسٛ جَوْمِرَاوٛ بَنَ غٜطَلْ عَرَنَلْ حَا ࢨَامْلٜ مٛنْ، عَمَّا تَا نغُلٜ طُمْ دٛوْ حِرْسِرْدٜ بَنَ دٛکَّلْ نغَلْ عُورٜىٰنغٛلْ مُمْ بٜلْنغٛلْ ڢٛتَّنْتَ جَوْمِرَاوٛ؞

¹³ شَمِّنٜ مَنْدَ دٛوْ دٛکَّلْ ࢩَامْدُ ڢُو، تَا دٛکَّلْ مٛنْ نغَکِّرَ مَنْدَ لَاتِيطَمْ عَلَامَ عَلْکَوَلْ حَکُّندٜ اَللَّه بٜى مٛوطٛنْ؞

¹⁴ تٛ عٛنْ نغِطِ لِيعَنَاغٛ جَوْمِرَاوٛ دٛکَّلْ ࢨَامْلٜ مٛنْ عَارْتُطٜ، سٜيْ عٛنْ لِيعٛ غَبّٜ عَلْکَمَارِ کٜسْرِ، شَعَاطٜ، نَمَاطٜ؞ کَنْجُمْ طُمْ لَاتِ بَنَ دٛکَّلْ مٛنْ حَا ࢨَامْلٜ مٛنْ عَارْتُطٜ؞

¹⁵ مبَطٜ نٜبَّمْ دٛوْ دٛکَّلْ مَنْ، ࢡٜسْدٜ عُورْلٜ بٛو؞ کَنْجُمْ وٛنِ دٛکَّلْ ࢩَامْدُ؞

¹⁶ لِمَنْجٛ حٛوعَ غٜطَلْ شِڢْتِنٛرْغَلْ حَا غَبّٜ عٜ نٜبَّمْ، وُلَ نغَلْ، نٛنْ بٛو عُورْلٜ ڢُو؞ طُمْ دٛکَّلْ غُلٜتٜىٰنغَلْ نغَمْ جَوْمِرَاوٛ؞»