يٜرٜمِيَ 3 - دٜڢْتٜرٜ اَللَّه ڢُلْڢُلْدٜ عَدَمَوَ

¹ «تٛ غٛطّٛ سٜىٰرِ دٜبّٛ مُوطُمْ، دٜبّٛ عٛو بٛو دِلِّ، غٛطّٛ ڢٜىٰرٜ تٜعِمٛ؞ طُمْ دُنغَامَ حَا غٛرِيکٛ عَرَنٛ عٛو حٛوشَ مٛ ڢَحِنْ نَ؟ تٛ عٛحٛوشِتِمٛ، طُمْ سٛࢡْنَتَا لٜسْدِ نَ؟ عَمَّا عَنْ عَوَطِ دَاکَارٜىٰکُ بٜى وَايٜعٜنْ طُوطْࢡٜ؞ نٛيْ لٛرْتٛرْتٛطَ حَا عَمْ؟» نٛنْ جَوْمِرَاوٛ وِعِ؞

² «تِجَّ سٜطَّ حٜىٰدِ تٛوْندِيجٜ شٛوکٜ، لَارْ‏: وٛودِ نٛکُّورٜ حَا ࢡٜمبَالٛرَاکِ مَ نَ؟ عَجٛوطِنٛ حَا لَابِ، کَلْ-کَلْ بٜى غٛطّٛ عَرَبْجٛ ندٜرْ لَدّٜ؞ عَسٛࢡْنِ لٜسْدِ بٜى دَاکَارٜىٰکُ مَ عٜ حَلّٜىٰندٜ ندٜ مبَطَّ؞

³ نغَمْ مَاجُمْ کَطْمِ عِيٜىٰندٜ، عَحٜࢡَايْ عِيٜىٰندٜ رَغَرٜىٰرٜ؞ عَ دٜبّٛ دَاکَارٜىٰجٛ يٛورَ-غِتٜىٰجٛ، عَسَلِ سٜمْتُغٛ؞

⁴ جٛنْتَ بٛو عَطٛنْ وٛيَ يٜىٰسٛ عَمْ‏: بَابَ عَمْ، عَنْ وٛنِ سٛوبَاجٛ عَمْ دِغَ ندٜرْکَاکُ عَمْ‏!

⁵ عَنُمِ‏: عٛتِکَّنْتَمْ حَا ڢٛرٛيْ نَ، عٛلِمَنْتَمْ طُمْ عَيْبٜ حَا عَبَدَ نَ؟ بَنَ نِي مبِعْطَ، عَمَّا بٜى نٛنْ ڢُو عَتٛکِّ وَطُغٛ کَلُّطُمْ؞»

عٜوْنَاندُ إِسْرَاءِيلَ عٜ يَحُودَ نغَمْ تُوبُ

⁶ ندٜرْ زَمَنُ لَامِيطٛ يُسِيَ، جَوْمِرَاوٛ وٛلْوَنِ يَمْ‏: «عَيِعِ کٛ إِسْرَاءِيلَ، غُدِنْطٛ نُطِّنْکِ وَطِ نَ؟ عٛيٜحِ دٛوْ کٛوسٜىٰجٜ تٛوْطٜ ڢُو عٜ لٜسْ لٜطّٜ کٜشّٜ ڢُو، عٛوَطِ دَاکَارٜىٰکُ تٛنْ؞

⁷ مِتَمِّنٛ، ࢡَاوٛ عٛوَطِ طُمْ ڢُو، عٛوَرْتَنْ حَا عَمْ سِکٜ؞ عَمَّا عٛوَرْتَايْ؞ يَحُودَ، دٜىٰرْطِيکٛ زَمْبٛووٛ بٛو، يِعِ طُمْ؞

⁸ عٛيِعِ بٛو نٛ مِوُدِنِرِ إِسْرَاءِيلَ غُدِنْطٛ نُطِّنْکِ، نٛ مِحٛکِّرِمٛ طٜرٜىٰوٛلْ شٜىٰرْغَلْ نغَمْ عٛوَطْنٛ نجٜىٰنُ؞ عَمَّا يَحُودَ، دٜىٰرْطِيکٛ زَمْبٛتٛوطٛ، حُلَايْ؞ عٛيٜحِ کَنغْکٛ بٛو، عٛوَطِ دَاکَارٜىٰکُ؞

⁹ عٛنُمَايْ سَمْ، عٛسٛࢡْنِ لٜسْدِ بٜى دَاکَارٜىٰکُ مَاکٛ، عٛوَطِ نجٜىٰنُ بٜى رٜوُغٛ کَاعٜ عٜ لٜطّٜ؞

¹⁰ بٜى نٛنْ ڢُو يَحُودَ، دٜبّٛ زَمْبٛتٛوطٛ غٛ وَرْتَايْ حَا عَمْ بٜى غٛونغَ، سٜيْ بٜى ڢٜوْجٜرٜ؞» نٛنْ جَوْمِرَاوٛ وِعِ؞

¹¹ ندٜنْ جَوْمِرَاوٛ وِعِ يَمْ‏: «عَيْبٜ إِسْرَاءِيلَ غُدِنْطٛ نُطِّنْکِ مَوْنَايْ بَنَ عَيْبٜ يَحُودَ زَمْبٛتٛوطٛ؞

¹² يَحْ، وٛويْنُ بٛلّٜ طٜعٜ غَلْ وٛيْلَ‏: جَوْمِرَاوٛ وِعِ‏: عَنْ إِسْرَاءِيلَ غُدِنْطٛ نُطِّنْکِ، لٛرْتَ‏! مِعَشِّ لَارُغٛ عٛنْ بٜى تِکّٜرٜ، نغَمْ مِ کٛولْنِيطٛ، مِتِکَّتَا حَا ڢٛرٛيْ؞» نٛنْ جَوْمِرَاوٛ وِعِ؞

¹³ «عَنْدِتِتْ عَيْبٜ مَ تَنْ‏: عَتُورْتَنِ جَوْمِرَاوٛ اَللَّه مَاطَ، عَرٜوِ لَبِّ جَنَنِّ لٜسْ لٜطّٜ کٜشّٜ ڢُو، عَنَنَايْ بٛلّٜ عَمْ؞» نٛنْ جَوْمِرَاوٛ وِعِ؞

¹⁴ «لٛرْتٜ، عٛنٛنْ ࢡِࢡّٜ تُورْتُࢡٜ، نغَمْ مِنْ وٛنِ جَوْمُ مٛوطٛنْ؞» نٛنْ جَوْمِرَاوٛ وِعِ؞ «مِحٛوعَنْ عٛنْ، غٛوتٛ حَا وُرٛ، طِطٛ بٛو حَا بَنْدِرَاࢡٜ، مِوَرْتِرَنْ عٛنْ حَا سِيٛنَ؞

¹⁵ مِحٛکَّنْ عٛنْ وَيْنَاࢡٜ ڢٛتَّنَنْࢡٜ يَمْ، ࢡٜعَيْنَ عٛنْ بٜى حَکِّيلٛ عٜ ڢَامُ؞»

¹⁶ جَوْمِرَاوٛ وِعِ‏: «تٛ عٛنْ ࢡٜسْدَکٜ، عٛنْ طُوطِ ندٜرْ لٜسْدِ، سَاعِ مَنْ يِمْࢡٜ مبٛلْوَتَا حَالَ سُنْدُکْرُ عَلْکَوَلْ جَوْمِرَاوٛ، ࢡٜنُمَتَا حَالَ مَارُ، ࢡٜشِڢْتٛرْتَا ندُ، ࢡٜطَࢡِّتِتَّا ندُ؞ وَلَا بَطَنْطٛ حٜسْرُ بٛو؞

¹⁷ سَاعِ مَنْ ࢡٜعٜوْنٛتٛ عُرُسَلِيمَ لٜىٰسٛ لَامُ جَوْمِرَاوٛ؞ عُمَّاتٛوجٜ ڢُو مٛوࢡٛتٛ تٛنْ نغَمْ تٜدِّنْغٛ عِنْدٜ جَوْمِرَاوٛ حَا عُرُسَلِيمَ؞ ࢡٜمٜىٰتَتَا تٛکَّاغٛ نُمٛوجِ ࢡٜرْطٜ مَࢡّٜ کَلُّطٜ؞

¹⁸ سَاعِ مَنْ يِمْࢡٜ يَحُودَ نغَرْدَنْ بٜى يِمْࢡٜ إِسْرَاءِيلَ، ࢡٜ ڢُو مَࢡّٜ ࢡٜعُمّٛتٛ لٜسْدِ وٛيْلَ، ࢡٜنغَرَ ندٜرْ لٜسْدِ ندِ مَرْنُمِ کَاکِرَاࢡٜ مٛوطٛنْ؞

¹⁹ «مِوِعْنٛ‏: ڢَکَتْ مِلِمَنْ عٛنْ شَکَ ࢡِࢡّٜ، مِحٛکَّنْ عٛنْ لٜسْدِ مبٛوندِ، مَرَلْ ࢡُرْنغَلْ وٛوطُغٛ شَکَ عُمَّاتٛوجٜ؞ مِوِعْنٛ‏: عٛنْ عٜوْنٛتٛ يَمْ بَابِرَاوٛ، عٛنْ عَشَّتَا تٛکَّاغٛ يَمْ سَمْ؞

²⁰ عَمَّا بَنَ دٜبّٛ زَمْبٛرْتٛ غٛرُمْ، بَنَ نٛنْ عٛنْ زَمْبٛرَکٜ يَمْ، عٛنٛنْ يِمْࢡٜ إِسْرَاءِيلَ؞» نٛنْ جَوْمِرَاوٛ وِعِ؞

²¹ نَنٜ، بٛجِّ طٛنْ حَا تٛوْندِيجٜ شٛوکٜ؞ يِمْࢡٜ إِسْرَاءِيلَ طٛنْ مبٛيَ نغَمْ ࢡٜنغَيْلِ لَابِ مَࢡّٜ، ࢡٜنغٜجِّتِ جَوْمِرَاوٛ اَللَّه مَࢡّٜ‏!

²² «لٛرْتٜ، عٛنٛنْ ࢡِࢡّٜ تُورْتٛوࢡٜ، حَا مِحُرْغَ تُورْتٛلْ مٛوطٛنْ؞» يِمْࢡٜ مبِعِ‏: «ندَا مِنْ، مِنْ طٛنْ نغَرَ حَا مَاطَ، نغَمْ عَنْ وٛنِ جَوْمِرَاوٛ اَللَّه عَمِنْ؞

²³ ڢَکَتْ، سُجِدَنْغٛ لَبِّ حَا نٛکُّوجٜ تٛوْطٜ نَڢَتَا، حٛولٛ دٛوْ کٛوسٜىٰجٜ وٛنِ مٜىٰرٜ؞ ڢَکَتْ، کِسْندَمْ إِسْرَاءِيلَ طٛنْ حَا جَوْمِرَاوٛ اَللَّه عَمِنْ؞

²⁴ لَوْرُ سٜمْتِنِيندُ ࢩَامِ نَڢُودَ کُوغَلْ کَاکِرَاࢡٜ عَمِنْ دِغَ سَاعِ مِنْ دٜرْکٜعٜنْ تَوٛنْ، ندُ ࢩَامِ دَمّٛوجِ مَࢡّٜ عٜ نَعِ مَࢡّٜ عٜ ࢡِࢡّٜ مَࢡّٜ وٛرْࢡٜ عٜ رٜوْࢡٜ؞

²⁵ سٜيْ مِنْ مبَالٛ مِنْ سٜمْتُࢡٜ، تٛسْکَارٜ عَمِنْ سُدَّ مِنْ، نغَمْ مِنْ مبَطِ حَکّٜ دٛوْ مَاطَ، يَا جَوْمِرَاوٛ اَللَّه عَمِنْ، مِنِنْ عٜ کَاکِرَاࢡٜ عَمِنْ، دِغَ ندٜرْکَاکُ عَمِنْ حَا وَرْغٛ حَنْدٜ، مِنْ طٛوْتَنَاکِ جَوْمِرَاوٛ اَللَّه عَمِنْ؞»