يٜرٜمِيَ 2 - دٜڢْتٜرٜ اَللَّه ڢُلْڢُلْدٜ عَدَمَوَنغَابَ جَوْمِرَاوٛ بٜى إِسْرَاءِيلَعٜنْ تُورْتُࢡٜ 1 جَوْمِرَاوٛ وٛلْوَنِ يَمْ، وِعِ: 2 «يَحْ، وٛويْنُ حَا بٜرْنِوٛلْ عُرُسَلِيمَ: ندَا نِي جَوْمِرَاوٛ وِعِ: مِطٛنْ سِڢْتٛرَ عَدِلَاکُ مَ سَاعِ عَݠَاࢩٛ عٜ يِيدٜ مَ سَاعِ عَ مُويَاطٛ، نٛ عَتٛکّٛرِ يَمْ ندٜرْ لَدّٜ، ندٜرْ لٜسْدِ ندِ وَلَا عَاوْرٜ؞ 3 سَاعِ مَنْ إِسْرَاءِيلَعٜنْ لَاتَکٜنٛ سٜنَاࢡٜ نغَمْ جَوْمِرَاوٛ بَنَ ࢨَامْلٜ شٛدٛلْ مَاکٛ عَارْتُطٜ؞ کٛو مٛيْ ࢩَامِ طٜ، وَطِ عَيْبٜ، سَرُّ عُکَّنِ طُمْ؞» نٛنْ جَوْمِرَاوٛ وِعِ؞ 4 نَنٜ وٛلْدٜ جَوْمِرَاوٛ، عٛنٛنْ يِمْࢡٜ يَعْقُوبُ، عٛنٛنْ لٜعِ إِسْرَاءِيلَ ڢُو! 5 ندَا نِي جَوْمِرَاوٛ وِعِ: «عَيْبٜوٛلْ نغٛلٜ کَاکِرَاࢡٜ مٛنْ تَوِ حَا عَمْ حَا ࢡٜندَايْتِ يَمْ؟ ࢡٜتٛکِّ مٜىٰرٜىٰجُمْ، بَنَ نٛنْ ࢡٜلَاتِ کَمْࢡٜ بٛو مٜىٰرٜعٜنْ؞ 6 ࢡٜࢨَمَايْ: تٛيْ جَوْمِرَاوٛ مٛ وُرْتِنِ عٜنْ لٜسْدِ مِصْرَ، مٛ طٛوِ عٜنْ ندٜرْ لَدّٜ، ندٜرْ لٜسْدِ ݠٜرٜوْندِ، کٜىٰوْندِ غَسْطٜ، ندٜرْ لٜسْدِ نجٛورْندِ، ࢩِࢡُّندِ، ندِ وَلَا سَالٛتٛوࢡٜ کٛو جٛوطِيࢡٜ تٛنْ؟ 7 مِنْ وَدِّ عٛنْ ندٜرْ لٜسْدِ ندِمٛورِ حَا عٛنْ ࢩَامَ ࢡٜنْدَلٛوجٜ مَارِ عٜ کُوجٜ مَارِ بٛوطّٜ؞ عَمَّا عٛنٛنْ، ندٜ عٛنْ نَسْتِ ندِ، عٛنْ شٛࢡْنِ لٜسْدِ عَمْ، عٛنْ نغَرْتِرِ مَرَلْ عَمْ ࢩِدُّنغَلْ؞ 8 لِمَنْعٜنْ مٜىٰطَايْ ࢨَمُغٛ: تٛيْ جَوْمِرَاوٛ؟ ڢَسِّتِرٛوࢡٜ تَوْرٜىٰتَ عَنْدَا يَمْ، عَرْدِيࢡٜ تُورْتَنِ يَمْ، اَلنَّبِعٜنْ بٛو مبَطِ عَنَّبَاکُ بٜى عِنْدٜ بَعَلْ، تٛکِّ طٛوَنْتٜىٰࢡٜ ࢡٜنَڢَتَا؞ 9 نغَمْ مَنْ نغُلّٛتٛومِ عٛنْ ڢَحِنْ؞ مِطٛنْ وُلّٛ بٛو تَانِرَاࢡٜ مٛوطٛنْ؞» نٛنْ جَوْمِرَاوٛ وِعِ؞ 10 «نجٜحٜ حَا دُوطٜ کِتِّعٜنْ، ندَارٛيٜ؞ مَلَّ نٜلٜ نٜلَاࢡٜ حَا کٜىٰدَرْ، کَکِّلٜ بٛوطُّمْ، ندَارٜ تٜىٰمَ عِرِنْ طُعُمْ مٜىٰطِ لَاتَاغٛ! 11 وٛودِ عُمَّاتٛورٜ سَنْجُندٜ طٛوَنْتٜىٰࢡٜ مُوطُمْ نَ؟ کٛو ندٜ ࢡٜلَاتَاکِ طٛوَنْتٜىٰࢡٜ بٜى غٛونغَ! عَمَّا عُمَّاتٛورٜ عَمْ سَنْجِ تٜدُّنغَلْ مُوطُمْ بٜى طٛوَنْتٜىٰطٛ مٛ نَڢَتَا! 12 کَيْطِنٜ دَلِيلَ مَنْ، عٛنٛنْ عَسَمَنْجِ، ندِوْنٜ، کُلْتٛرٜ!» نٛنْ جَوْمِرَاوٛ وِعِ؞ 13 «نغَمْ عُمَّاتٛورٜ عَمْ وَطِ عَيْبٜ شٛوِ طِطِ: مِنْ مٛ سٜىٰࢡٛورٜ نغٜىٰندَمْ، ࢡٜعَشِّ يَمْ ࢡٜنغَسِ غَاوِ شٜىٰکْطِ طِ نجٛغَتَاکٛ ندِيَمْ نغَمْ کٛعٜ مَࢡّٜ؞ 14 «کَدِ إِسْرَاءِيلَ لَاتِ مَشُّطٛ مَلَّ عٛ دَࢩَاطٛ ندٜرْ نجٜيَانغُ نَ؟ کٛنِ عٛلَاتِ کٜࢡَلْ کٛنُ؟ 15 بَرٛوطٜ طٛنْ عُبَّ دٛوْ مَاکٛ، طٛنْ عُبَّ بٜى سٜمْبٜ، طٛنْ مبٛنَّ لٜسْدِ مَاکٛ؞ بٜرْنِيجِ مَاکٛ غُلَاطِ ݠٜرْوِ، وٛودَا غٛطّٛ حَا تٛنْ؞ 16 کٛو يِمْࢡٜ مٜمْڢِسْ عٜ تَحَݠَنٜسْ بٛو ݠٜمْبِ عٛنْ، لَاتِنِ عٛنْ مَشُّࢡٜ؞ 17 طُمْ ڢُو طُمْ لَاتَنِ عٛنْ نغَمْ عٛنْ عَشِّ جَوْمِرَاوٛ، اَللَّه مٛوطٛنْ يَاکٜ عٛطٛنّٛ طٛوَ عٛنْ؞ 18 کَدِ جٛنْتَ بٛو، کٛ لٛرْتَاغٛ مِصْرَ نغَمْ يَرُغٛ ندِيَمْ سِکٛرْ نَڢَتَ؟ مَلَّ کٛ يَحُغٛ عَسُّورَ نغَمْ يَرُغٛ ندِيَمْ عٜڢْرَتِسْ نَڢَتَ؟ 19 حَلّٜىٰندٜ مٛوطٛنْ، کَيْرٜ ࢡٛشَّتَ عٛنْ، تُورْتٛلْ مٛوطٛنْ بٛو طٛنْ دٛعَّ عٛنْ کِيتَ! عٛنْ عَشِّ يَمْ، مِنْ جَوْمِرَاوٛ، اَللَّه مٛوطٛنْ، عٛنْ عَشِّ حُلُغٛ يَمْ؞ عَنْدٜ، ݠَامٜ نٛ طُمْ حَلِّرِ مَسِنْ»، نٛنْ جَوْمِرَاوٛ اَللَّه حٛنٛوࢡٜ عَسَمَ وِعِ؞ 20 «دِغَ ࢡٛويْمَ عٛنْ تُورْتَنِ يَمْ، عٛنْ تٜىٰتِ، عٛنْ مبِعِ: مِنْ نجَغَّنْتَاکٛ مَ ڢَحِنْ! عَمَّا عٛنْ طٛنْ تُرِ بَنَ دَاکَارٜىٰجٛ دٛوْ تٛوْندِيجٜ ڢُو عٜ لٜسْ لٜطّٜ کٜشّٜ ڢُو؞ 21 مِجُبِ عٛنْ بَنَ عِنَبٛحِ شُࢡَاکِ، بَنَ ڢُطْنغٛ وٛوطْنغٛ؞ کٛ وَطِ مِطٛنْ يِعَ جٛنْتَ عٛنْ نغَيْلِ، عٛنْ لَاتِ عِنَبٛحِ بٛنِّيکِ، جَنَنْحِ؟ 22 کٛو تٛ عٛنْ نغِيوَکٜ بٜى کِلْبُ، تٛ عٛنْ طُطِّنِ لٛوتِرْدٜ، تُوندِ حَکّٜ مٛوطٛنْ طٛنْ لُتَّ يٜىٰسٛ عَمْ»، نٛنْ جَوْمِرَاوٛ اَللَّه وِعِ؞ 23 کٛنِ عٛنْ طٛنْ مبِعَ: «مِنْ شٛࢡَايْ، مِنْ تٛکَّاکِ بَعَلْجِ؞ ندَارٜ لَابِ مٛوطٛنْ ندٜرْ وَادِوٛلْ، عَنْدِتٜ کُوطٜ مٛوطٛنْ؞ عٛنْ لَاتِ بَنَ نغٜىٰلٛوبَ ندٜوَ ندٛغَّنْنغَ کٛو تٛيْ ڢُو، 24 بَنَ وَمْندٜ رٜوْرٜ وٛووْندٜ يٜىٰطُغٛ ندٜرْ لَدّٜ حَمَادَارٜ، لَاحَنْدٜ نغَمْ سُونٛ مَارٜ طُوطْنغٛ؞ مٛيْ نَنغْتَتَ ندٜ؟ وَلَا حَاجٜ وَمْندٜ وٛرْدٜ سٛمَ طَࢡِّتُغٛ ندٜ؞ ندٜ لٜوْرُ مَارٜ وَطِ، کٛو مٛيْ تَوَنْ ندٜ لَوْ؞ 25 ندِکَّ ندَرٛطٛنْ! تٛ نَا نٛنْ ݠَطٜ مٛوطٛنْ ݠَطِّتِتّٛ، کٛنْدٛنْدِ مٛوطٛنْ بٛو نجٛورَنْ! عَمَّا عٛنْ طٛنْ مبِعَ: عَاعَ، وٛودَا! مِنْ نغِطِ جَنَنْࢡٜ، مِنْ تٛکّٛتٛ ࢡٜ؞ 26 «بَنَ غُجّٛ طٛنْ سٜمْتَ تٛ عٛنَنغَامَ، بَنَ نٛنْ يِمْࢡٜ إِسْرَاءِيلَ طٛنْ شٜمْتَ، کَمْࢡٜ عٜ لَامِيࢡٜ مَࢡّٜ عٜ عَرْدِيࢡٜ مَࢡّٜ عٜ لِمَنْعٜنْ مَࢡّٜ عٜ اَلنَّبِعٜنْ مَࢡّٜ؞ 27 ࢡٜطٛنْ مبِعَ لٜغَّلْ: عَنْ وٛنِ بَابَ عَمِنْ! ࢡٜطٛنْ مبِعَ حَيْرٜ بٛو: عَنْ دَࢩِ مِنْ! نغَمْ ࢡٜنغَيْلِتَنِ يَمْ ࢡَاوٜ مَࢡّٜ، نَا غٜىٰسٜ مَࢡّٜ؞ عَمَّا تٛ ࢡٜنَسْتِ بٛنٜ، ࢡٜمبِعَنْ: عُمَّ، حِسْنُ مِنْ! 28 کَدِ تٛيْ طٛوَنْتٜىٰࢡٜ مٛوطٛنْ ࢡٜمبَطَنْطٛنْ کٛعٜ مٛوطٛنْ؟ سٜيْ ࢡٜعُمّٛ، ࢡٜکِسْنَ عٛنْ تٛ عٛنْ نَسْتِ بٛنٜ! عٛنٛنْ يِمْࢡٜ يَحُودَ، طٛوَنْتٜىٰࢡٜ مٛوطٛنْ طُوطِ بَنَ غُرٜ مٛوطٛنْ؞ 29 «کٛنِ نغُلّٛتٛنْ يَمْ؟ عٛنْ ڢُو عٛنْ تُورْتَنِ يَمْ؞» نٛنْ جَوْمِرَاوٛ وِعِ؞ 30 «مِࢡٛشِّ ࢡِࢡّٜ مٛوطٛنْ، عَمَّا طُمْ نَڢَايْ، ࢡٜنجَࢡَايْ عٜلْتٛ؞ کَاڢَحِ مٛوطٛنْ مبَرِ اَلنَّبِعٜنْ بَنَ مبَرٛوغَ زَمْبٛتٛووَ؞ 31 عٛنٛنْ يِدٜرٜ ندٜعٜ، کَکِّلَنٜ وٛلْدٜ جَوْمِرَاوٛ! کَدِ مِلَاتَنَکٜ إِسْرَاءِيلَ لَدّٜ مَلَّ لٜسْدِ ࢩِࢡْرٜ ࢡَلٜىٰرٜ نَ؟ کٛنِ عُمَّاتٛورٜ عَمْ طٛنْ وِعَ: مِنْ نجَحَنْ حَا مِنْ نغِطِ ڢُو، مِنْ لٛرْتَتَاکٛ حَا مَاطَ؟ 32 کَدِ ݠَاࢩٛ دٜبّٛ يٜجِّتَنْ ڢَوْنٜ مُوطُمْ نَ؟ ࢡَنغٜتٜىٰطٛ يٜجِّتَنْ تٛغّٛورٜ ࢡَنغَلْ مُوطُمْ نَ؟ عَمَّا عُمَّاتٛورٜ عَمْ يٜجِّتِ يَمْ، نٜىٰࢡِ؞ 33 «کَيَّ، عٛنْ عَنْدِ طَࢡِّتِتْغٛ يِطْࢡٜ عٛنْ! نغَمْ مَاجُمْ عٛنْ مبٛووِ وَطُغٛ زُنُوبَاجِ؞ 34 ࢨِيࢨَمْ لَاڢُࢡٜ ࢡٜنغَلَا عَيْبٜ طٛنْ حَا غَوَرْلٜ لِمْشٜ مٛوطٛنْ، کٛو ندٜ عٛنْ تَوَايْ ࢡٜطٛنْ نَسْتَ شُوطِ مٛوطٛنْ نغَمْ وُجُّغٛ؞ عَمَّا بٜى نٛنْ ڢُو 35 عٛنْ طٛنْ مبِعَ: مِنْ نغَلَا عَيْبٜ! سٜيْ عَعَشَّ تِکَّنْغٛ مِنْ! ندَا، مِحِيتٛتٛ عٛنْ نغَمْ عٛنْ مبِعِ: مِنْ مبَطَايْ حَکّٜ! 36 عٛنْ طٛنْ نغَيْلَ لَابِ مٛوطٛنْ بٜى کٛيْطُمْ! عٛنْ شٜمْتَنْ دَلِيلَ مِصْرَ، بَنَ عٛنْ شٜمْتِرِ دَلِيلَ عَسُّورَ؞ 37 عٛنْ لٛرٛتٛ دِغَ تٛنْ بٜى جُوطٜ مٛوطٛنْ دٛوْ کٛعٜ مٛوطٛنْ؞ نغَمْ يِمْࢡٜ ࢡٜکٛولٛتٛوطٛنْ، مِنْ جَوْمِرَاوٛ مِوُدِنِ ࢡٜ؞ عٛنْ کٜࢡَتَا حَيْرُ حَا مَࢡّٜ؞» |
Fulfulde Bible Ajamiya © Bible Society of Cameroon, 2016.
Bible Society of Cameroon