عٜڢٜسُعٜنْ 3 - دٜڢْتٜرٜ اَللَّه ڢُلْڢُلْدٜ عَدَمَوَ

کُوغَلْ ݠٛلْ ندٜرْ عُمَّاتٛوجٜ

¹ نغَمْ مَنْ مِنْ ݠٛلْ، کَࢡَّاطٛ دَلِيلَ اَلْمَسِيحُ عِيسَى نغَمْ مٛوطٛنْ، عٛنٛنْ يِمْࢡٜ عُمَّاتٛوجٜ غٛطّٜ …

² عٛنْ مٜىٰطِ نَنُغٛ حَالَ کَلِيڢَاکُ نغُ اَللَّه حَلْڢِنِ يَمْ نغَمْ مٛوطٛنْ ڢٛدّٜ مٛعّٜرٜ ندٜ عٛمٛعَّنِ يَمْ؞

³ بٜى وَحَيُ عٛوَنغِنَنِ يَمْ عَنِّيَ مَاکٛ سِرِّيحَ، بَنَ کٛ عَارْتُمِ وِنْدَنغٛ عٛنْ بٜى بٛلّٜ سٜطَّ؞

⁴ تٛ عٛنْ نجَنغِ طُمْ، عٛنْ عَنْدَنْ نٛ مِڢَامِ سِرِّ اَلْمَسِيحُ؞

⁵ سِرِّ مَنْ عٛوَنغِنَنَايْنٛ يِمْࢡٜ ࢡٛويْمَ ندٜرْ غِدٜ شَالِيطٜ عَمَّا عٛوَنغِنِ طُمْ جٛنْتَ بٜى رُوحُ مَاکٛ حَا سٜنَاࢡٜ مُمْ نٜلَاࢡٜ عٜ اَلنَّبِعٜنْ مُمْ؞

⁶ ندَا سِرِّ عٛو‏: دَلِيلَ لِنْجِيلَ، يِمْࢡٜ عُمَّاتٛوجٜ غٛطّٜ بٛو لَاتٛتٛ رٛنٛوࢡٜ، ࢡٜلَاتٛتٛ تٜرْطٜ حَا ࢡَنْدُ اَلْمَسِيحُ، ࢡٜکٜࢡَنْ بٛو کٛ اَللَّه عِينَنِ إِسْرَاءِيلَ ندٜرْ عِيسَى اَلْمَسِيحُ؞

⁷ اَللَّه مٛعَّنِ يَمْ، وَطِ يَمْ جَغِّيطٛ مُمْ؞ بَنَ نِي عٛوَارِ طُمْ ندٜرْ عَمْ بٜى بَاوْطٜ مَاکٛ،

⁸ مِنْ لَاتِيطٛ ࢡَاوٛوجٛ ࢡَاوٛعٜنْ شَکَ سٜنَاࢡٜ ڢُو؞ عَمَّا اَللَّه مٛعَّنِ يَمْ، حَلْڢِنِ يَمْ وَازُ لِنْجِيلَ حَا عُمَّاتٛوجٜ، حَا مِعَنْدِنَ طٜ جٜيْنِتَارٜ اَلْمَسِيحُ طُوطْندٜ ندٜ حٜࢡْتَتَاکٜ سَمْ،

⁹ مِحٛلَّ طٜ ڢُو نٛ اَللَّه حِࢡِّنِرْتَ عَنِّيَ مُمْ سِرِّيحَ؞ اَللَّه، تَغْطٛ کُوجٜ ڢُو سُوطِنٛ کَ دِغَ زَمَنُوجِ شِوَا،

¹⁰ حَا عٛوَنغِنِرَ جٛنْتَ حِکْمَ مَاکٛ ڢٜىٰرٜ ڢٜىٰرٜىٰحَ بٜى جَمَعَارٜ نُطِّنْࢡٜ حَا مَوْࢡٜ عَسَمَ عٜ مَرْࢡٜ لَامُ ندٜرْ عَسَمَنْجِ؞

¹¹ اَللَّه وَطِ طُمْ ڢٛدّٜ نُڢَيٜىٰرٜ ندٜ عٛنُڢِنٛ دِغَ ࢡٛويْمَ، عٛتِمِّنِرَ ندٜ بٜى اَلْمَسِيحُ عِيسَى، جَوْمِرَاوٛ مٜىٰطٜنْ؞

¹² عٜنْ طٛنْ نُطِّنِمٛ، نغَمْ مَاجُمْ، حَا مَاکٛ کٜࢡْطٜنْ دُنغَيٜىٰرٜ يٛتَّاغٛ اَللَّه بٜى حٛولَارٜ؞

¹³ نغَمْ مَاجُمْ مِطٛنْ تٛرٛ عٛنْ، تَا عٛنْ تَمْݠَ نغَمْ دَلِيلَ بٛنٜىٰجِ طِ مِطٛنْ يَرَ نغَمْ مٛوطٛنْ، کَنْجِ نغٛنِ تٜدُّنغَلْ مٛنْ؞

يِيدٜ اَلْمَسِيحُ

¹⁴ نغَمْ مَنْ مِتُغِّ کٛݠِّ عَمْ يٜىٰسٛ بَابِرَاوٛ؞

¹⁵ حَا مَاکٛ، کٛ وِعٜتٜ سَارٜ ڢُو حَا عَسَمَ عٜ دٛوْ لٜسْدِ حٜࢡِ عِنْدٜ مُمْ؞

¹⁶ مِطٛنْ تٛرٛ اَللَّه ڢٛدّٜ جٜيْنِتَارٜ تٜدُّنغَلْ مُمْ، حَا عٛسٜمْبِطِنَ ࢡٜرْطٜ مٛوطٛنْ بٜى بَاوْطٜ رُوحُ مَاکٛ،

¹⁷ حَا اَلْمَسِيحُ جٛوطٛ ندٜرْ ࢡٜرْطٜ مٛنْ دَلِيلَ نُطِّنْکِ مٛنْ، عٛنْ تَبِتَ دٛوْ يِيدٜ، عٛنْ شٜمْبِطَ ندٜرْ مَارٜ،

¹⁸ نغَمْ حَا عٛنْ کٜࢡَ ڢَامُغٛ، عٛنٛنْ عٜ سٜنَاࢡٜ ڢُو نٛ يِيدٜ اَلْمَسِيحُ يَاجِرِ، جُوتِرِ، تٛوِرِ عٜ لُغِّرِ،

¹⁹ حَا عَنْدٛنْ يِيدٜ اَلْمَسِيحُ بٛو، کٛو تٛ ندٜ ࢡُرِ ڢَامُ نٜطّٛ، حَا اَللَّه حٜبِّنَ عٛنْ بٜى جٜيْنِتَارٜ مُوطُمْ ڢُو؞

²⁰ اَللَّه وَاوَنْ وَطُغٛ کٛ ࢡُرِ دٛعَاجٜ مٜنْ عٜ نُمٛوجِ مٜنْ ݠِوْ ڢٛدّٜ سٜمْبٜ حُووَاندٜ ندٜرْ مٜىٰطٜنْ؞

²¹ تٜدُّنغَلْ لَاتَنٛ مٛ ندٜرْ جَمَعَارٜ نُطِّنْࢡٜ، نٛنْ بٛو ندٜرْ عِيسَى اَلْمَسِيحُ، حَا غِدٜ ڢُو، حَا عَبَدَ عَبَدِنْ؞ عَامِينَ‏!