عٜڢٜسُعٜنْ 2 - دٜڢْتٜرٜ اَللَّه ڢُلْڢُلْدٜ عَدَمَوَ

دِغَ مَايْدٜ حَا نغٜىٰندَمْ

¹ نَانٜ کَمْ عٛنْ مَايْࢡٜنٛ نغَمْ دَلِيلَ عَيْبٜىٰجِ عٜ حَکّٜىٰجِ مٛنْ؞

² عٛنْ نغٜىٰطِنٛ ندٜرْ مَاجِ ڢٛدّٜ جَحَرْغَلْ دُنِيَارُ ندُعُ عٜ ڢٛدّٜ عَرْدِيطٛ لَامُ نغٛنْنغُ ندٜرْ حَوَ؞ کٛو جٛنْتَ بٛو عٛطٛنْ حُووَ ندٜرْ تُورْتُࢡٜ دٛوْ عُمْرٛوجٜ اَللَّه؞

³ عٜنْ ڢُو عٜنْ لَاتِنٛ بَنَ مَࢡّٜ، عٜنْ تٛکِّنٛ سُونٛوجِ ࢡَلِّ مٜنْ؞ عٜنْ مبَطِنٛ کٛ ࢡَلِّ مٜنْ عٜ حَکِّيلٛوجِ مٜنْ طَࢡِّ ڢُو؞ ندٜ نٛنْ عٜنْ مبَانٛ، تِکّٜرٜ اَللَّه طٛنّٛ دٛوْ مٜىٰطٜنْ بَنَ دٛوْ يِمْࢡٜ وٛطْࢡٜ ڢُو؞

⁴ عَمَّا اَللَّه عٛ طُوطَ-حِنُّيٜىٰجٛ؞ دَلِيلَ يِيدٜ مَاکٛ مَوْندٜ ندٜ عٛيِطِرِ عٜنْ،

⁵ کٛو ندٜ عٜنْ مَايْࢡٜنٛ دَلِيلَ عَيْبٜىٰجِ مٜىٰطٜنْ، عٛيٜىٰطِتِنِ عٜنْ حَوْتَادٜ بٜى اَلْمَسِيحُ – بٜى مٛعّٜرٜ مَاکٛ کٜࢡْرُطٛنْ کِسْندَمْ؞

⁶ اَللَّه عُمِّتِنِ عٜنْ حَوْتَادٜ بٜى اَلْمَسِيحُ، جٛعِّنِ عٜنْ حَوْتَادٜ بٜى مَاکٛ حَا عَسَمَنْجِ،

⁷ نغَمْ حٛلَّنغٛ زَمَنُوجِ غَرَنْطِ مٛعّٜرٜ مَاکٛ طُوطْندٜ، وَاتٛ مبٛوطٜىٰنغَ نغَ عٛوٛونَنِ عٜنْ ندٜرْ عِيسَى اَلْمَسِيحُ؞

⁸ نغَمْ بٜى مٛعّٜرٜ مَاکٛ کٜࢡْرُطٛنْ کِسْندَمْ نغَمْ عٛنْ نُطِّنِ؞ طُمْ عِوَايْ حَا مٛوطٛنْ، طُمْ دٛکَّلْ اَللَّه؞

⁹ طُمْ عِوَايْ بٛو حَا کُوطٜ مٛنْ، نغَمْ تَا غٛطّٛ جُرٛرٛ؞

¹⁰ نغَمْ اَللَّه بٜى حٛورٜ مُمْ تَغِ عٜنْ؞ عٛتَغِ عٜنْ ندٜرْ عِيسَى اَلْمَسِيحُ حَا عٜنْ کُووَ کُوطٜ بٛوطّٜ؞ کَنْجٜ بٛو، اَللَّه عَارْتِ تَاسْکِتِنِ طٜ حَا عٜنْ کُووَ طٜ؞

لَاتِيࢡٜ ࢡَنْدُ وٛورُ

¹¹ شِڢْتٛرٜ طُعُمْ‏: نَانٜ عٛنْ يِمْࢡٜ عُمَّاتٛوجٜ غٛطّٜنٛ ڢٛدّٜ طَبِيَ نٜطّٛ؞ يَحُودُعٜنْ، جُولْنِيࢡٜ طٛنْ مبِعَ عٛنْ، عٛنْ سَادٛونِعٜنْ؞ جُولْنٛلْ مَࢡّٜ، طُمْ جُولْنٛلْ ࢡَنْدُ نغٛلْ يِمْࢡٜ مبَطَتَ؞

¹² سَاعِ مَنْ عٛنْ نغٛنَايْنٛ ندٜرْ اَلْمَسِيحُ، عٛنْ لَاتَاکِنٛ يِمْࢡٜ عُمَّاتٛورٜ إِسْرَاءِيلَ، عٛنْ جَنَنْࢡٜنٛ، عٛنْ نَسْتَايْنٛ ندٜرْ عَلْکَوَلْجِ طِ اَللَّه حَࢡُّنٛ بٜى عُمَّاتٛورٜ مُمْ، عٛنْ کٜࢡَايْنٛ عِينَوٛلْ اَللَّه؞ عٛنْ طٛنّٛ نجٛوطِ ندٜرْ دُنِيَارُ ندُعُ بِلَا تَمُّندٜ عٜ بِلَا اَللَّه،

¹³ عَمَّا جٛنْتَ ندٜرْ کَوْتَلْ بٜى عِيسَى اَلْمَسِيحُ، عٛنٛنْ دَايِنٛوࢡٜ بٜى اَللَّه غٛ، عٛنْ ࢡَدِتِنَامَ دَلِيلَ ࢨِيࢨَمْ اَلْمَسِيحُ؞

¹⁴ نغَمْ کَنغْکٛ وٛنِ سَلَامَنْ مٜىٰطٜنْ، عٛوَرْتِرِ يَحُودُعٜنْ عٜ ࢡٜنْ لَاتَاکِنٛ يَحُودُعٜنْ ڢُو عُمَّاتٛورٜ وٛورٜ؞ بٜى مَايْدٜ مَاکٛ عٛيِبِّنِرِ مَحٛلْ شٜنْدُنغٛلْ شَکَ مٜىٰطٜنْ عٜ عٛتِمِّنِ کٛنَّاغُ شَکَ مٜىٰطٜنْ؞

¹⁵ عٛوِلِ تَوْرٜىٰتَ بٜى عُمْرٛوجٜ مُمْ عٜ ڢَرِلَّاجِ مُمْ، حَا عٛحَوْتَ عَسْلِيجِ طِطِ طِعِ، عٛلَاتِنَ طِ غٛطّٛ کٜسٛ غٛوتٛ ندٜرْ مَاکٛ، عٛتَبِتِنَ سَلَامَنْ،

¹⁶ عٛسُلْحِنْدِرَ عَسْلِيجِ طِطِ طِعِ بٜى اَللَّه، ندٜرْ ࢡَنْدُ وٛورُ بٜى مَايْدٜ مَاکٛ دٛوْ لٜغَّلْ غَاڢَانغَلْ، عٛعِتَّ کٛنَّاغُ؞

¹⁷ عٛوَرِ وَازِنغٛ کُبَرُوٛلْ بٜلْنغٛلْ، نغٛلْ سَلَامَنْ حَا مٛوطٛنْ، عٛنٛنْ دَايِيࢡٜ عٜ ࢡَدِيࢡٜ ڢُو؞

¹⁸ نغَمْ دَلِيلَ مَاکٛ عٜنْ ڢُو عٜنْ کٜࢡِ لَاوٛلْ يٛتَّاغٛ بَابِرَاوٛ ندٜرْ رُوحُ غٛوتٛ؞

¹⁹ نغَمْ مَاجُمْ جٛنْتَ کَمْ، عٛنٛنْ يِمْࢡٜ عُمَّاتٛوجٜ، نَا عٛنْ جَنَنْࢡٜ مَلَّ حٛطْࢡٜ ڢَحِنْ، عَمَّا عٛنْ کَوْتِ بٜى سٜنَاࢡٜ وٛطْࢡٜ، عٛنْ طٛنْ ندٜرْ عُمَّاتٛورٜ اَللَّه، عٛنْ يِمْࢡٜ سَارٜ اَللَّه بٛو؞

²⁰ عٛنْ نجٛعِّنَامَ دٛوْ شَࢡَّاجٜ نٜلَاࢡٜ عٜ اَلنَّبِعٜنْ؞ عِيسَى اَلْمَسِيحُ بٜى حٛورٜ مُمْ وٛنِ حَيْرٜ تَلْکُمٛورٜ؞

²¹ ندٜرْ مَاکٛ غٜࢡٜ ࢩِࢡَالٛ مَنْ ڢُو طٛنْ ݠٛتّٛتِرَ، حَا نغٛلْ مَوْنَ، نغٛلْ لَاتَنٛ جَوْمِرَاوٛ حَيْکَلِيرُ سٜنِيندُ؞

²² ندٜرْ کَوْتَلْ بٜى مَاکٛ عٛنٛنْ بٛو عٛنْ طٛنْ مَحٜ حَوْتَادٜ بٜى مَࢡّٜ نغَمْ حَا ࢩِࢡَالٛ نغٛعٛ لَاتٛ جٛوطٛرْدٜ ندٜ رُوحُ اَللَّه جٛوطٛتٛ حَا مُوطُمْ؞