غَازٛووٛ 2 - دٜڢْتٜرٜ اَللَّه ڢُلْڢُلْدٜ عَدَمَوَ1 مِنُمِ: بٛوطُّمْ! سٜيْ مِڢٛونْدَ ࢡٜرْندٜ عَمْ بٜى سٜيٛ، ندٜ مَاتَ کٛ وٛنِ بٜلْطُمْ؞ عَمَّا ندَا، کَنْجُمْ بٛو طُمْ مٜىٰرٜ؞ 2 مِوِعِ: جَلٜىٰطٜ طُمْ نغِنَّاکُ، سٜيٛ بٛو کٛ نَڢَتَ؟ 3 ندٜنْ مِحٛوعِ عَنِّيَ سٜيْنُغٛ ࢡَنْدُ عَمْ بٜى عِنَبٛوجَمْ، عَمَّا ࢡٜرْندٜ عَمْ تٛکّٛتٛ حِکْمَ؞ مِحٛوعِ عَنِّيَ بٛو تٛکَّاغٛ ڢَاتَارٜ، حَا مِيِعَ کٛ وٛوطَنِ ࢡِࢡّٜ عَادَمَ وَطُغٛ لٜسْ عَسَمَ وَکَّتِ نغٜىٰندَمْ مُوطُمْعٜنْ؞ 4 مِحُووِ کُوطٜ مَوْطٜ: مِࢩِࢡَنِ حٛورٜ عَمْ شُوطِ، مِجُبَنِ حٛورٜ عَمْ غٜسٜ عِنَبٛوجٜ؞ 5 مِوَطَنِ حٛورٜ عَمْ جَرْنٜ عٜ شُورَاطٜ نغَمْ وَانْشُغٛ؞ مِجُبِ تٛنْ لٜطّٜ دِمٛوجٜ ڢٜىٰرٜ ڢٜىٰرٜ؞ 6 مِوَطَنِ حٛورٜ عَمْ عٛکٛلٛوجٜ نغَمْ يَرْنُغٛ لٜکّٛنْ نجُبَاکٛنْ؞ 7 مِسٛودِ مَشُّࢡٜ عٜ حٛرْࢡٜ، مِمَرْنٛ بٛو جٜيَاࢡٜ دَࢩَاࢡٜ حَا سَارٜ عَمْ؞ مِمَرْنٛ نَعِ عٜ دَمّٛوجِ طُوطِّ کٛ ࢡُرِ عَارْتُنٛوࢡٜ يَمْ ندٜرْ عُرُسَلِيمَ ڢُو؞ 8 مِمٛوࢡْتَنِ حٛورٜ عَمْ شَرْدِ عٜ کَنغّٜىٰرِ عٜ ندٜسَاجٜ لَامِيࢡٜ عٜ ندٜسَاجٜ تَࢨٜ لٜسْدِ؞ مِحٜࢡَنِ حٛورٜ عَمْ يِمٛوࢡٜ وٛرْࢡٜ عٜ رٜوْࢡٜ، نٛنْ بٛو کٛ سٜيْنَتَ ࢡِࢡّٜ عَادَمَ، وَاتٛ رٜوْࢡٜ طُوطْࢡٜ ؞ 9 مِمَوْنِ کٛ ࢡُرِ عَارْتُنٛوࢡٜ يَمْ ندٜرْ عُرُسَلِيمَ ڢُو؞ حِکْمَ عَمْ بٛو طٛنْ وٛنْدِ بٜى عَمْ؞ 10 کٛ ڢٛتَّنِ غِتٜ عَمْ ڢُو، مِحٜࢡِ طُمْ، مِسَلَنَاکِ ࢡٜرْندٜ عَمْ سٜيٛ کٛو نغٛيٜ؞ نغَمْ ࢡٜرْندٜ عَمْ نَڢْتٛرِ تٛرَّ کُوغَلْ عَمْ، کَنْجُمْ وٛنِ غٜطَلْ عَمْ حَا تٛرَّ کُوغَلْ عَمْ ڢُو؞ 11 ندٜنْ مِنُمْتِ کُوطٜ طٜ جُوطٜ عَمْ کُووِ عٜ تٛرَّ کُوغَلْ نغَلْ کُووْمِ: ندَا، طُمْ ڢُو طُمْ مٜىٰرٜ، طُمْ نَنغُغٛ حٜنْدُ؞ وَلَا نَڢُودَ حَا کٛ کُووْمِ ندٜرْ دُنِيَارُ؞ 12 ندٜنْ مِنُمْتِ حَالَ حِکْمَ عٜ نغِنَّاکُ عٜ ڢَاتَارٜ؞ کَدِ طُمٜ لَامٛتٛوطٛ ࢡَاوٛ لَامِيطٛ وَطَتَ؟ کٛ ࢡٜمبَطِ دِغَ ࢡٛويْمَ! 13 تَوْمِ: نَڢُودَ حِکْمَ ࢡُرِ کَ ڢَاتَارٜ بَنَ نَڢُودَ جَيْنغٛلْ ࢡُرْدِ کَ ࢩِࢡْرٜ؞ 14 حِکْمَاجٛ عَنْدِ تٛيْ عٛيَحَتَ، عَمَّا ݠَاتَاطٛ طٛنْ يَحَ ندٜرْ ࢩِࢡْرٜ؞ مِعَنْدِ بٛو حٛدِّرٛورٜ وٛورٜ عُکَّنْتٛ طِطٛ ڢُو؞ 15 مِنُمِ مِوِعِ: ندٜ نِي حٛدِّرٛورٜ ندٜ عُکَّنْتٛ ݠَاتَاطٛ، طٛنْ عُکَّنٛ يَمْ مِنْ بٛو، کٛ ࢡُرْدَلْ حِکْمَ عَمْ نَڢِ؟ نغَمْ مَاجُمْ مبِعْمِ: کَنْجُمْ بٛو طُمْ مٜىٰرٜ؞ 16 نغَمْ حِکْمَاجٛ عٜ ݠَاتَاطٛ ݠٛتِ کَلْ، وَلَا مٛ سِڢْتٛرْتَ ࢡٜ حَا ڢٛرٛيْ؞ ندٜرْ ࢩَلْطٜ غَرَنْطٜ، لَوْ ࢡٜنغٜجِّتَنْ ࢡٜ طِطٛ ڢُو؞ کَيَّ، حِکْمَاجٛ مَايَنْ بَنَ ݠَاتَاطٛ! 17 نغَمْ مَاجُمْ مِوَࢩِ نغٜىٰندَمْ؞ نغَمْ ڢٛدّٜ نُمٛ عَمْ، کٛ حُووَ حَا دُنِيَارُ ڢُو وٛوطَايْ، نغَمْ طُمْ ڢُو طُمْ مٜىٰرٜ عٜ نَنغُغٛ حٜنْدُ؞ 18 مِوَࢩِ تٛرَّ کُوغَلْ عَمْ نغَلْ کُووْمِ حَا دُنِيَارُ ڢُو، نغَمْ دٛولٜ مِعَشَّنَ غٛطّٛ غَرَنْطٛ ࢡَاوٛ عَمْ کٛ کُووْمِ؞ 19 مٛيْ عَنْدِ تٛ عٛلَاتٛتٛ حِکْمَاجٛ مَلَّ ݠَاتَاطٛ؟ عَلْحَالِ بٛو، عٛمَرَنْ بَاوْطٜ دٛوْ کٛ کُووْمِ ندٜرْ تٛرَّ حَا دُنِيَارُ بٜى حِکْمَ! کَنْجُمْ بٛو طُمْ مٜىٰرٜ؞ 20 نغَمْ مَاجُمْ تٛرَّ کُوغَلْ نغَلْ کُووْمِ حَا دُنِيَارُ ڢُو نَسْتِنِ يَمْ ندٜرْ سٛويْندٜ تَمُّندٜ؞ 21 نٜطّٛ تٛرّٛتٛ بٜى حِکْمَ عٜ عَنْدَلْ عٜ غٛنِيکُ، عَمَّا عٛحٛکَّنْ غٜطَلْ مَاکٛ حَا غٛطّٛ مٛ تٛرَّاکِ؞ کَنْجُمْ بٛو طُمْ مٜىٰرٜ عٜ سَرُّ مَنغُ؞ 22 طُمٜ لَاتَنْتٛ نٜطّٛ نغَمْ تٛرَّ کُوغَلْ مُمْ نغَلْ عٛسُکْلِ حُووُغٛ حَا دُنِيَارُ ڢُو؟ 23 بَلْطٜ مَاکٛ ڢُو، سُکْلٜرٜ مَاکٛ وَدَّنَنْ مٛ مٜتّٜىٰنغَ عٜ بٛنٜ تَنْ؞ کٛو بٜى جٜمَّ ࢡٜرْندٜ مَاکٛ سِوْتَتَاکٛ؞ کَنْجُمْ بٛو طُمْ مٜىٰرٜ؞ 24 وَلَا حَيْرُ نغَمْ نٜطّٛ، سٛنَا ࢩَامُغٛ عٜ يَرُغٛ عٜ سٜيٛرَاغٛ نَڢُودَ تٛرَّ مُمْ؞ مِڢَامِ، کَنْجُمْ بٛو اَللَّه حٛکَّتَ طُمْ؞ 25 نغَمْ مٛيْ وَاوَتَ ࢩَامُغٛ عٜ سٜيَاغٛ تٛ اَللَّه حٛکَّايْ مٛ طُمْ؟ 26 عٛحٛکَّنْ نٜطّٛ ݠٛتَّنَنْطٛ مٛ حِکْمَ عٜ عَنْدَلْ عٜ سٜيٛ؞ عَمَّا حَکّٜىٰجٛ، اَللَّه سُکْلَنْ طُمْ بٜى مٛوࢡْتُغٛ عٜ سِغَاغٛ کُوجٜ، حَا طُمْ حٛکَّ طٜ ݠٛتَّنَنْطٛ اَللَّه؞ کَنْجُمْ بٛو طُمْ مٜىٰرٜ، طُمْ نَنغُغٛ حٜنْدُ؞ |
Fulfulde Bible Ajamiya © Bible Society of Cameroon, 2016.
Bible Society of Cameroon