دَنِيٜلْ 2 - دٜڢْتٜرٜ اَللَّه ڢُلْڢُلْدٜ عَدَمَوَ

کٛيْطٛلْ نَبُکٛدٛنٛسٛرْ

¹ ندٜرْ ندُوࢡُ لَامُ مَاکٛ طِطَࢡُ، نَبُکٛدٛنٛسٛرْ حٛيْطِ؞ کٛيْطِ طِعِ شَکْلِمٛ، عٛوَاوَايْ طَانَاغٛ؞

² عٛعُمْرِ عٜوْنٛيَاغٛ لَارٛوࢡٜ عٜ وَطٛوࢡٜ حَتِّ عٜ وَطٛوࢡٜ حِيلَ عٜ کَلْدِيَعٜنْ حَا ࢡٜݠَامْتِنَ مٛ کٛيْطِ طِ عٛحٛيْطِ؞ ࢡٜنغَرِ، ࢡٜندَرِ يٜىٰسٛ لَامِيطٛ؞

³ عٛوِعِ ࢡٜ‏: «مِحٛيْطِ عٜ مِسَکْلِ، مِيِطِ ڢَامُغٛ کٛ مِحٛيْطِ؞»

⁴ کَلْدِيَعٜنْ نجَابِمٛ بٜى عَرَمِيَارٜ‏: «عَيٜىٰطَ حَا ڢٛرٛيْ، بَرْکَامَ‏! يٜشُّ مَشُّࢡٜ مَ کٛيْطٛلْ مَنْ، حَا مِنْ ݠَسِّتِرَنٜ نغٛلْ؞»

⁵ لَامِيطٛ جَابِ ࢡٜ‏: «ندَا کٛ ندَرْنُمِ‏: تٛ عٛنْ عَنْدِنَايْ يَمْ کٛيْطٛلْ عَمْ عٜ ڢَسَّرُويٜ مَاغٛلْ، مِعُمْرَنْ تَعُغٛ عٛنْ غٜࢡٜ غٜࢡٜ، وَرْتِرْغٛ شُوطِ مٛوطٛنْ بٛو بَنَ جِدّٜرٜ؞

⁶ عَمَّا تٛ عٛنْ عَنْدِنِ يَمْ نغٛلْ عٜ ڢَسَّرُويٜ مَاغٛلْ، ندٜنْ کَمْ مِحٛکَّنْ عٛنْ دٛکّٜ عٜ شَاحُوجِ عٜ تٜدُّنغَلْ طُوطْنغَلْ؞ عَنْدِنٜىٰطَمْ کٛيْطٛلْ عَمْ عٜ ڢَسَّرُويٜ مَاغٛلْ کَدِ؞»

⁷ ڢَحِنْ ࢡٜمبِعِ‏: «بَرْکَامَ، يٜشُّ مَشُّࢡٜ مَ کٛيْطٛلْ مَنْ تَوٛنْ، ندٜنْ مِنْ ݠَسِّتِرَنْ نغٛلْ؞»

⁸ لَامِيطٛ وِعِ‏: «جٛنْتَ مِعَنْدِ ڢَکَتْ، عٛنْ طٛنْ ݠَاسِتَ نغَمْ عٛنْ عَنْدِ کٛ ندَرْنُمِ؞

⁹ تٛ عٛنْ عَنْدِنَايْ يَمْ کٛيْطٛلْ عَمْ، کِيتَ نغٛوتَ لَاتَنْتٛ عٛنْ ڢُو؞ عٛنْ نَرِّ يٜشُّغٛ يَمْ بٛلّٜ ݠٜوٛوجٜ عٜ رِکِشِيجٜ، نغَمْ عٛنْ طٛنْ نُمَ تٜىٰمَ حَالَ مَنْ سَنْجَنْ؞ عَنْدِنٜىٰطَمْ کٛيْطٛلْ مَنْ، ندٜنْ کَمْ مِعَنْدَنْ عٛنْ مبَاوَنْ ڢَسِّتِرْغٛ نغٛلْ بٛو؞»

¹⁰ کَلْدِيَعٜنْ نجَابِ لَامِيطٛ‏: «وَلَا نٜطّٛ حَا دُنِيَارُ ڢُو وَاوَتَ عَنْدِنْغٛ مَ طُمْ، بَرْکَامَ؞ وَلَا لَامِيطٛ، نٛ عٛمَوْنِرِ، نٛ عٛمَرْدِ بَاوْطٜ ڢُو، مٜىٰطِ ࢨَمُغٛ عِرِنْ مَاجُمْ حَا لَارٛوࢡٜ عٜ وَطٛوࢡٜ حَتِّ عٜ کَلْدِيَعٜنْ؞

¹¹ کٛ ࢨَمْطَ، بَرْکَامَ، سَطِ مَسِنْ؞ وَلَا بَاوْطٛ عَنْدِنْغٛ مَ طُمْ، سٛنَا طٛوَنْتٜىٰࢡٜ؞ عَمَّا جٛوندٜ مَࢡّٜ وٛنَايْ شَکَ يِمْࢡٜ؞»

¹² ندٜنْ لَامِيطٛ تِکِّ مَسِنْ، عٛعُمْرِ مبَرُغٛ حِکْمَعٜنْ بَابِلَ ڢُو؞

¹³ عُمْرٛورٜ مبَرُغٛ ࢡٜعَنْدِنَامَ؞ ࢡٜتٜڢِ دَنِيٜلْ عٜ سٛوبَعٜنْ مُوطُمْ نغَمْ مبَرُغٛ ࢡٜ؞

اَللَّه وَنغِنَنِ دَنِيٜلْ مَانَ کٛيْطٛلْ لَامِيطٛ

¹⁴ ندٜنْ دَنِيٜلْ وٛلْوَنِ عَرِيٛکْ، حٛورٜىٰجٛ عَيْنٛوࢡٜ لَامِيطٛ، غُرْتِيطٛ نغَمْ مبَرُغٛ حِکْمَعٜنْ بَابِلَ؞ عٛوٛلْوَنِمٛ بٜى حَکِّيلٛ عٜ بٜى حِکْمَ،

¹⁵ عٛوِعِ‏: «نغَمْ طُمٜ عُمْرٛورٜ لَامِيطٛ سَاتِ بَنَ نِي؟» عَرِيٛکْ وِعِمٛ حَالَ مَنْ؞

¹⁶ دَنِيٜلْ يٜحِ حَا لَامِيطٛ، تٛرِمٛ وَکَّتِ سٜطَّ حَا عٛڢَسِّتِرَنَ مٛ کٛيْطٛلْ مَاکٛ؞

¹⁷ ندٜنْ دَنِيٜلْ حٛوتِ، يٜشِّ طُمْ سٛوبَعٜنْ مُوطُمْ حَنَنِيَ عٜ مِيسَيٜلْ عٜ عَزَرِيَ،

¹⁸ نغَمْ حَا ࢡٜتٛرٛ اَللَّه مٛ عَسَمَ، عٛحِنّٛ ࢡٜ، عٛوَنغِنَنَ ࢡٜسِرِّ مَاجُمْ، نغَمْ تَا ࢡٜمبَرْدَ دَنِيٜلْ عٜ سٛوبَعٜنْ مُوطُمْ بٜى حِکْمَعٜنْ بَابِلَ وٛطْࢡٜ؞

¹⁹ ندٜنْ اَللَّه وَنغِنَنِ دَنِيٜلْ سِرِّ مَنْ بٜى جٜمَّ ندٜرْ وَحَيُ؞ نغَمْ مَاجُمْ دَنِيٜلْ مَنغْتِ اَللَّه مٛ عَسَمَ،

²⁰ وِعِ‏: «يٜتّٛورٜ لَاتَنٛ عِنْدٜ اَللَّه ڢٛرٛيْ حَا عَبَدَ‏! نغَمْ عٛمَرِ حِکْمَ عٜ بَاوْطٜ؞

²¹ کَنغْکٛ وَيْلِتِتَّ وَکَّتِيجِ عٜ سَاعِيجٜ، کَنغْکٛ ࢡٛرْنَتَ لَامِيࢡٜ لَامُ، کَنغْکٛ ࢡٛرْتَتَ ࢡٜ، کَنغْکٛ حٛکَّتَ حِکْمَ حَا حِکْمَعٜنْ عٜ عَنْدَلْ حَا عَنْدُࢡٜ؞

²² کَنغْکٛ وَنغِنْتَ لُغُّطُمْ عٜ سِرِّيجُمْ، کَنغْکٛ وٛنِ عَنْدُطٛ کٛ ࢩُکِّ ندٜرْ ࢩِࢡْرٜ، أَلنّٛورَ طٛنْ وٛنْدِ بٜى مَاکٛ؞

²³ يَا اَللَّه کَاکِرَاࢡٜ عَمْ، مِمَنغْتِ مَ، مِيٜتِّ مَ، نغَمْ عَحٛکِّ يَمْ حِکْمَ عٜ بَاوْطٜ؞ عَوَنغِنَنِ يَمْ جٛنْتَ کٛ مِنْ تٛرِ مَ، عَعَنْدِنِ مِنْ کٛيْطٛلْ لَامِيطٛ؞»

²⁴ ࢡَاوٛ مَنْ دَنِيٜلْ يٜحِ حَا عَرِيٛکْ مٛ لَامِيطٛ عُمْرُنٛ طُمْ مبَرُغٛ حِکْمَعٜنْ بَابِلَ، وِعِمٛ‏: «تَا مبَرْ حِکْمَعٜنْ بَابِلَ؞ يَحْرَمْ حَا لَامِيطٛ حَا مِڢَسِّتِرَنَ مٛ کٛيْطٛلْ مَاکٛ؞»

²⁵ لَوْ عَرِيٛکْ يَحْرِ دَنِيٜلْ يٜىٰسٛ لَامِيطٛ، وِعِ‏: «بَرْکَامَ، مِتَوِ غٛطّٛ شَکَ دَحَاࢡٜ عِوْࢡٜ يَحُودَ، عٛڢَسِّتِرَنْتٜ کٛيْطٛلْ مَ؞»

²⁶ لَامِيطٛ ࢨَمِ دَنِيٜلْ، بِعٜتٜىٰطٛ بٜلْتٜسَشَرْ‏: «عَوَاوَنْ عَنْدِنْغٛ يَمْ کٛيْطٛلْ نغٛلْ کٛيْطُمِ عٜ مَانَ مَاغٛلْ نَ؟»

²⁷ دَنِيٜلْ جَابِ لَامِيطٛ‏: «بَرْکَامَ، سِرِّ کٛ ࢨَمْطَ مَانَ مُوطُمْ، حِکْمَعٜنْ عٜ لَارٛوࢡٜ عٜ وَطٛوࢡٜ حَتِّ عٜ عَنْدُࢡٜ حَالَ کٛودٜ مبَاوَتَا وَنغِنَنْغٛ مَ طُمْ؞

²⁸ عَمَّا وٛودِ اَللَّه مٛ عَسَمَ، کَنغْکٛ وَنغِنْتَ سِرِّيجِ؞ عٛحٛلِّ مَ، يَا لَامِيطٛ نَبُکٛدٛنٛسٛرْ، کٛ لَاتٛتٛ يٜىٰسٛ طٛ؞ کٛيْطٛلْ نغٛلْ کٛيْطُطَ عٜ وَحَيُوجِ طِ نغِعْطَ دٛوْ بٜعِّتّٜ مَ، ندَا طُمْ‏:

²⁹ سَاعِ عَطٛنْ وَالِ، بَرْکَامَ، عَنُمِ کٛ تَمِّ لَاتَاغٛ؞ بَنغِنٛووٛ سِرِّيجِ عَنْدِنِ مَ طُمْ؞

³⁰ عٛوَنغِنَنِ يَمْ سِرِّ مَنْ، نَا نغَمْ مِࢡُرْدِ يِمْࢡٜ وٛطْࢡٜ ڢُو حِکْمَ، عَمَّا نغَمْ مِڢَسِّتِرَنٜ، بَرْکَامَ، حَا عَڢَامَ نُمٛوجِ ࢡٜرْندٜ مَ؞

³¹ «ندٜرْ کٛيْطٛلْ مَ، بَرْکَامَ، عَيِعِ سُورَ مَکَّ؞ کَ مَاݠِنْدِيحَ، طٜلْکٛ مَاکَ ࢡُرِ سٜمْبٜ؞ کَ دَرِ يٜىٰسٛ مَ، جَاتِ مَاکَ کُلْنِيکَ؞

³² حٛورٜ سُورَ کَعَ وَطَامَ بٜى کَنغّٜىٰرِ لَاࢡْندِ، وِࢡّٜرٜ مَاکَ عٜ جُوطٜ مَاکَ بٜى شَرْدِ، رٜىٰدُ مَاکَ عٜ دَوْطٜ مَاکَ بٜى نجَمْندِ مبٛطٜىٰرِ،

³³ کٛرْلٜ مَاکَ بٜى نجَمْندِ ࢡَلٜىٰرِ، يٜࢡْرٜ تٜݠّٜ مَاکَ نجَمْندِ عٜ يٜࢡْرٜ بٛو لٛوݠٜ؞

³⁴ سَاعِ عَطٛنْ لَارَ، حَيْرٜ حٛࢡِّتِ ڢٜىٰرٜ مَارٜ – وَلَا جُنغٛ يٜرْࢡِ ندٜ؞ ندٜ تَݠِّ تٜݠّٜ سُورَ طٜ نجَمْندِ بٜى لٛوݠٜ غٛ، ندٜ نَمِ طٜ؞

³⁵ بَنَ نٛنْ کٛو طُمٜ ڢُو ڢُسِ‏: نجَمْندِ عٜ لٛوݠٜ عٜ نجَمْندِ مبٛطٜىٰرِ عٜ شَرْدِ عٜ کَنغّٜىٰرِ؞ طُمْ ڢُو طُمْ لَاتِ بَنَ ࢩَاندٜ دٛوْ لَارّٜ وَکَّتِ شٛدٛلْ، حٜنْدُ سَنغْکِتِ طُمْ، وَلَا کٛ لُتِّ؞ عَمَّا حَيْرٜ ڢُسْندٜ سُورَ غٛ، مَوْنِ، لَاتِ حٛوسٜىٰرٜ مَوْندٜ، ندٜ حٜىٰوِ دُنِيَارُ ڢُو؞

³⁶ «کَنْجُمْ وٛنِ کٛيْطٛلْ مَ، بَرْکَامَ، جٛنْتَ حَا مِنْ ݠَسِّتِرَنٜ نغٛلْ؞

³⁷ عَنْ، بَرْکَامَ، عَ لَامِيطٛ لَامْلَامْࢡٜ؞ اَللَّه مٛ عَسَمَ حٛکِّ مَ لَامُ عٜ بَاوْطٜ عٜ سٜمْبٜ عٜ تٜدُّنغَلْ؞

³⁸ کٛو تٛيْ ڢُو عٛمَرْنِ مَ يِمْࢡٜ عٜ دَبَّاجِ لَدّٜ عٜ شٛلِّ عَسَمَ؞ عٛلَامِنِ مَ دٛوْ تَغْلٜ طٜعٜ ڢُو؞ عَنْ وٛنِ حٛورٜ کَنغّٜىٰرِ غٛ؞

³⁹ ࢡَاوٛ مَاطَ لَامُ ڢٜىٰرٜ وَرَنْ، نغُ مَوْنَتَا بَنَ نغُ مَاطَ؞ ندٜنْ لَامُ تَتَࢡُ، نغُ نجَمْندِ مبٛطٜىٰرِ، لَامَنْتٛ دُنِيَارُ ڢُو؞

⁴⁰ لَامُ نَيَࢡُ مَرَنْ سٜمْبٜ بَنَ نجَمْندِ ࢡَلٜىٰرِ؞ بَنَ نٛ نجَمْندِ ࢡَلٜىٰرِ نَمِرْتَ عٜ ڢُسِرْتَ کٛو طُمٜ ڢُو، لَامُ نغُعُ بٛو نَمَنْ عٜ نَتِّنَنْ لَامُوجِ غٛطِّ ڢُو؞

⁴¹ عَيِعِ تٜݠّٜ، کٛولِ مَاجٜ، يٜࢡْرٜ طِ نجَمْندِ يٜࢡْرٜ بٛو طِ لٛوݠٜ؞ لَامُ مَنْ سٜنْدٛتٛ غٜࢡٜ غٜࢡٜ؞ نغُ مَرَنْ سٜمْبٜ بَنَ نجَمْندِ ࢡَلٜىٰرِ، نغَمْ عَيِعِ نجَمْندِ جِلِّنْدِرِ بٜى لٛوݠٜ؞

⁴² کٛولِ تٜݠّٜ يٜࢡْرٜ نجَمْندِ، يٜࢡْرٜ بٛو لٛوݠٜ، بَنَ وِعُغٛ‏: يٜࢡْرٜ وٛورٜ مَرَنْ سٜمْبٜ، عَمَّا يٜࢡْرٜ وٛطْندٜ مَرَتَا سٜمْبٜ؞

⁴³ عَيِعِ نٛ نجَمْندِ جِلِّنْدِرِ بٜى لٛوݠٜ نغَمْ لَامِيࢡٜ غٜࢡٜ ڢُو تٜعِنْدِرَنْ، عَمَّا ࢡٜکَوْتَتَا، کَلْ-کَلْ بَنَ نجَمْندِ حَوْتَتَا بٜى لٛوݠٜ؞

⁴⁴ سَاعِ لَامِيࢡٜ ࢡٜعٜ، اَللَّه مٛ عَسَمَ دَرْنَنْ لَامُ ڢٜىٰرٜ نغُ حَلْکَتَا حَا ڢٛرٛيْ؞ وَلَا عُمَّاتٛورٜ وٛطْندٜ حٛوسَتَ لَامُ مَنْ؞ نغُ نَتِّنَنْ لَامُوجِ غٛطِّ ڢُو، عَمَّا کَنغُ نغُ دُومٛتٛ؞

⁴⁵ نغَمْ مَاجُمْ نغِعْطَ نٛ حَيْرٜ حٛࢡِّتِرِ – وَلَا جُنغٛ يٜرْࢡِ ندٜ – نَمِ نجَمْندِ ࢡَلٜىٰرِ عٜ مبٛطٜىٰرِ عٜ لٛوݠٜ عٜ شَرْدِ عٜ کَنغّٜىٰرِ؞ اَللَّه مَوْطٛ وَنغِنَنِ مَ کٛ تَمِّ لَاتَاغٛ، بَرْکَامَ؞ کٛيْطٛلْ مَنْ تَبِتِ، مَانَ مَاغٛلْ بٛو لَاࢡِ؞»

⁴⁶ ندٜنْ لَامِيطٛ نَبُکٛدٛنٛسٛرْ حِݠِّ حَا يٜىٰسٛ دَنِيٜلْ، سُجِدَنِمٛ؞ ندٜنْ عٛعُمْرِ وَدَّنْغٛ مٛ دٛکّٜ ࢩَامْدُ عٜ عُورْلٜ؞

⁴⁷ لَامِيطٛ وِعِ دَنِيٜلْ‏: «ڢَکَتْ، اَللَّه مٛوطٛنْ وٛنِ طٛوَنْتٜىٰطٛ ࢡُرْطٛ طٛوَنْتٜىٰࢡٜ ڢُو، عٛ جَوْمِرَاوٛ لَامِيࢡٜ، عٛ بَنغِنٛووٛ سِرِّيجِ، نغَمْ عَحٜࢡِ بَاوْطٜ وَنغِنْغٛ سِرِّ کٛيْطٛلْ نغٛعٛلْ؞»

⁴⁸ ندٜنْ عٛتٜدِّنِ دَنِيٜلْ، عٛسَاحِمٛ دٛکّٜ مَوْطٜ طُوطّٜ؞ عٛوَطِمٛ نغٛمْنَ دٛوْ تَࢨْرٜ بَابِلَ عٜ عَرْدِيطٛ مَوْطٛ دٛوْ حِکْمَعٜنْ بَابِلَ ڢُو؞

⁴⁹ دٛوْ ࢨَمٛلْ دَنِيٜلْ، لَامِيطٛ وَطِ سَدَرَکْ عٜ مٜىٰسَکْ عٜ عَبٜدْ-نٜغٛ عَرْدِيࢡٜ مَوْࢡٜ دٛوْ تَࢨْرٜ بَابِلَ؞ عَمَّا دَنِيٜلْ بٜى حٛورٜ مُوطُمْ جٛوطِ حَا لَامٛرْدٜ؞