2 تٜسَّلٛنِکِعٜنْ 2 - دٜڢْتٜرٜ اَللَّه ڢُلْڢُلْدٜ عَدَمَوَ

نٜطّٛ ࢡُرْدُطٛ حَلُّغٛ

¹ کٛ لَارَنِ لٛرَاکِ جَوْمِرَاوٛ مٜىٰطٜنْ عِيسَى اَلْمَسِيحُ عٜ مٛوࢡْتَاغٛ مٜىٰطٜنْ حَا مَاکٛ، مِنْ طٛنْ تٛرٛ عٛنْ، عٛنٛنْ دٜىٰرْطِرَاࢡٜ‏:

² تَا حَکِّيلٛوجِ مٛوطٛنْ عُمّٛ لَوْ، تَا کُلْتٛرٜ بٛو تٛ غٛطّٛ وِعِ عٛنْ ࢩَلَادٜ جَوْمِرَاوٛ وَرِ؞ تٜىٰمَ غٛطّٛ وَطَنَنْ عٛنْ عَنَّبَاکُ مَلَّ عٛوَازِنَنْ عٛنْ مَلَّ عٛوِعَنْ مِنِنْ مبِنْدِ طُمْ ندٜرْ بَتَاکٜوٛلْ؞

³ تَا غٛطّٛ عٜسْتَ عٛنْ کٛو نٛيْ؞ نغَمْ ࢩَلَادٜ ندٜعٜ وَرَتَا، سٛنَا يِمْࢡٜ طُوطْࢡٜ عَارْتَ تُورْتَنَ اَللَّه تَوٛنْ، نٜطّٛ ࢡُرْدُطٛ حَلُّغٛ بٛو وَنغَ، مٛ حٛدِّرَنَامَ حَلْکٜرٜ؞

⁴ کَنغْکٛ عٛدَرْتَنْتٛ کٛو طُمٜ کٛ لَاتِ شٜنِيطُمْ مَلَّ کٛ يِمْࢡٜ شُجِدَنْتَ؞ عٛࢡُرْنَنْ حٛورٜ مَاکٛ دٛوْ مَنْ ڢُو؞ عٛجٛوطٛتٛ مَا ندٜرْ حَيْکَلِيرُ اَللَّه، عٛوِعَنْ کَنغْکٛ وٛنِ اَللَّه؞

⁵ سَاعِ مِ طٛنّٛ وٛنْدِ بٜى مٛوطٛنْ، مِوِعِ عٛنْ طُمْ؞ عٛنْ شِڢْتٛرَايْ نَ؟

⁶ عٛنْ عَنْدِ کٛ حَطَتَ نٜطّٛ ࢡُرْدُطٛ حَلُّغٛ عٛو جٛنْتَ؞ عَمَّا تٛ سَاعِيرٜ دَرْنَاندٜ وَطِ، عٛوَنغَنْ؞

⁷ بَاوْطٜ مَاکٛ سِرِّيجٜ طٛنْ کُووَ کٛو جٛنْتَ بٛو؞ عَمَّا سٛنَا تٛ کَطَنْطٛ مٛ سٛتِّ؞

⁸ ندٜنْ نٜطّٛ ࢡُرْدُطٛ حَلُّغٛ غٛ وَنغَنْ، مٛ عِيسَى، جَوْمِرَاوٛ مٜىٰطٜنْ حَلْکَتَ بٜى ݠٛوڢْطٜ حُنْدُکٛ مُمْ؞ عٛحَلْکَنْ مٛ بٜى بَنغُکِ مُمْ سَاعِ عٛلٛرٛيْتٛ؞

⁹ نٜطّٛ ࢡُرْدُطٛ حَلُّغٛ عٛو وَرْدَنْ بٜى بَاوْطٜ سَيْطَانُ، عٛحُووَنْ کُوطٜ مَوْطٜ عٜ عٛوَطَنْ عَلَامَاجِ عٜ کَايٜىٰڢِيجِ عٜسْتٛوجِ؞

¹⁰ بٜى کُوطٜ کَلُّطٜ کٛو طٜيٜ ڢُو، عٛعٜسْتَنْ مَجّٜتٜىٰࢡٜ؞ ࢡٜ مَجّٜتٜىٰࢡٜ نغَمْ ࢡٜشَلِ جَࢡُغٛ عٜ يِطُغٛ غٛونغَ کَ وَاوَنّٛ حِسْنُغٛ ࢡٜ؞

¹¹ نغَمْ مَاجُمْ اَللَّه نٜلَنَنْ ࢡٜ بَاوْطٜ عٜسْتٛوجٜ حَا ࢡٜنُطِّنَ ڢٜوْرٜ؞

¹² ندٜنْ کٛو ࢡٜيٜ ࢡٜنُطِّنَايْ غٛونغَ، عَمَّا شٜيٛرِ زُنُوبَ، ࢡٜ حِيتٜتٜىٰࢡٜ؞

سُࢡَاࢡٜ نغَمْ کِسْندَمْ

¹³ عَمَّا، مِنِنْ، سٜيْ مِنْ نغٜتَّ اَللَّه ڢٛرٛيْ دَلِيلَ مٛوطٛنْ، عٛنٛنْ دٜىٰرْطِرَاࢡٜ، يِطَاࢡٜ جَوْمِرَاوٛ؞ نغَمْ اَللَّه عَارْتِ سُࢡِ عٛنْ نغَمْ حِسْنُغٛ عٛنْ؞ عٛنْ کِسَنْ بٛو نغَمْ رُوحُ سٜنِ عٛنْ، نغَمْ عٛنْ نُطِّنِ غٛونغَ بٛو؞

¹⁴ اَللَّه عٜوْنِ عٛنْ بٜى لِنْجِيلَ کَ مِنْ نغَازِ عٛنْ، حَا عٛنْ کٜࢡَ غٜطَلْ مٛوطٛنْ حَا تٜدُّنغَلْ جَوْمِرَاوٛ مٜىٰطٜنْ عِيسَى اَلْمَسِيحُ؞

¹⁵ نغَمْ مَاجُمْ، دٜىٰرْطِرَاࢡٜ، تَبِتٜ، نجٛغٜ کٛ مِنْ عٜکِّتِنِ عٛنْ بٜى بٛلّٜ عَمِنْ مَلَّ بٜى بَتَاکٜوٛلْ عَمِنْ؞

¹⁶ جَوْمِرَاوٛ مٜىٰطٜنْ عِيسَى اَلْمَسِيحُ بٜى حٛورٜ مُمْ عٜ اَللَّه بَابِرَاوٛ مٜىٰطٜنْ، مٛ يِطِ عٜنْ، مٛ حٛکِّ عٜنْ دٜعّٜرٜ دُومِيندٜ عٜ تَمُّندٜ وٛوندٜ بٜى مٛعّٜرٜ مُمْ،

¹⁷ ندٜعِّتِنَ ࢡٜرْطٜ مٛوطٛنْ، ندٛکَّ عٛنْ سٜمْبٜ وَطُغٛ عٜ وٛلْوُغٛ کٛ وٛوطِ؞