2 سَمُيِلَ 2 - دٜڢْتٜرٜ اَللَّه ڢُلْڢُلْدٜ عَدَمَوَ

دَاوُدَ لَامَنِ يَحُودَ

¹ ࢡَاوٛ کُوجٜ طٜعٜ دَاوُدَ ࢨَمِ جَوْمِرَاوٛ‏: «مِيَحَ حَا غٛوتٛلْ ندٜرْ بٜرْنِيجِ يَحُودَ نَ؟» جَوْمِرَاوٛ جَابِمٛ‏: «عٛوحٛ؞» دَاوُدَ ࢨَمِ‏: «تٛيْ نجَحَنْمِ؟» عٛجَابِ‏: «حَا حٜبُرُونْ؞»

² دَاوُدَ يٜحِ تٛنْ، کَنغْکٛ عٜ رٜوْࢡٜ مَاکٛ طِطٛ، عَحِنٛعَمْ مٛ يِسْرٜعٜلْ عٜ عَبِغَيٜلْ لَاتِنٛوطٛ دٜبّٛ نَبَلْ، مٛ کَرْمٜلْ؞

³ دَاوُدَ يَحْرِ بٛو وٛرْࢡٜ وٛنْدُࢡٜ بٜى مُوطُمْ ڢُو، کٛو مٛيْ بٜى سَارٜ مُوطُمْ؞ ࢡٜنجٛوطِ ندٜرْ غُرٜ حٜبُرُونْ؞

⁴ يِمْࢡٜ يَحُودَ نغَرِ تٛنْ، مٛيْتِمٛ حَا عٛلَاتٛ لَامِيطٛ يَحُودَ؞ يَحُودُعٜنْ مبِعِ دَاوُدَ‏: يِمْࢡٜ بٜرْنِوٛلْ يَابٜسْ ندٜرْ لٜسْدِ غِلٜعَتْ عُوِ سَوُلُ؞

^5-6 عٛنٜلِ نٜلَاࢡٜ حَا مَࢡّٜ، عٛوِعِ ࢡٜ‏: «عٛنْ مبَطَنِ جَاغٛرْطٛ مٛنْ سَوُلُ مبٛوطٜىٰنغَ بٜى عُوُغٛ مٛ؞ جَوْمِرَاوٛ بَرْکِطِنْ عٛنْ، وَنغِنَنْ عٛنْ مبٛوطٜىٰنغَ عٜ غٛونغَاکُ نغَمْ کٛ عٛنْ مبَطِ؞ مِنْ بٛو مِوٛونَنَنْ عٛنْ؞

⁷ تِطِّنٜ ࢡٜرْطٜ مٛنْ، شٜمْبِطِنٜ جُوطٜ مٛنْ‏! جَاغٛرْطٛ مٛنْ سَوُلُ مَايِ، عَمَّا لٜࢩٛلْ يَحُودَ وَطِ يَمْ لَامِيطٛ مُمْ؞»

عِسْبٛسٜتْ لَامَنِ إِسْرَاءِيلَ

⁸ عَبِنٜىٰرْ ࢡِي نٜىٰرْ، مَوْطٛ حٛنٛوࢡٜ سَوُلُ يَحْرِ عِسْبٛسٜتْ ࢡِي سَوُلُ حَا مَحَنَيِمْ؞

⁹ تٛنْ عٛوَطِمٛ لَامِيطٛ دٛوْ غِلٜعَتْ عٜ عَسٜرْ عٜ يِسْرٜعٜلْ عٜ عٜڢْرَيِمْ عٜ بٜنْيَمِنْ، وَاتٛ دٛوْ إِسْرَاءِيلَ ڢُو؞

¹⁰ عِسْبٛسٜتْ وٛودِ دُوࢡِ شَݠَّنْطٜ نَيِ سَاعِ عٛلَامٛ؞ عٛلَامِ دُوࢡِ طِطِ؞ يِمْࢡٜ يَحُودَ تَنْ تٛکِّ دَاوُدَ؞

¹¹ عٛلَامَنِ ࢡٜ حَا حٜبُرُونْ دُوࢡِ جٛوٜىٰطِطِ عٜ لٜبِّ جٛوٜىٰغٛ؞

حَࢡْرٜ دَاوُدَ بٜى سَارٜ سَوُلُ

¹² عَبِنٜىٰرْ عٜ يِمْࢡٜ عِسْبٛسٜتْ نغُرْتِ مَحَنَيِمْ يَحُغٛ غِبِيٛنْ؞

¹³ يٛعَبْ ࢡِي سٜرُيَتُ عٜ يِمْࢡٜ دَاوُدَ بٛو نجٜحِ تٛنْ؞ ࢡٜݠٛتِّ حَا حٜىٰلٜىٰوٛ غِبِيٛنْ؞ يِمْࢡٜ دَاوُدَ نجٛوطِ حَا وَکٜىٰرٜ حٜىٰلٜىٰوٛ ندٜعٜ، يِمْࢡٜ عِسْبٛسٜتْ بٛو حَا وَکٜىٰرٜ ندٜيَ؞

¹⁴ عَبِنٜىٰرْ وِعِ يٛعَبْ‏: «عَشُّ سُکَاࢡٜ مبَطَنَ عٜنْ ڢِجِرْدٜ کٛنُ؞» يٛعَبْ جَࢡِ؞

¹⁵ ندٜنْ سُکَاࢡٜ نغُرْتِ، سَݠّٛ عٜ طِطٛ حَا وَکٜىٰرٜ بٜنْيَمِنْ عٜ عِسْبٛسٜتْ، سَݠّٛ عٜ طِطٛ بٛو حَا وَکٜىٰرٜ دَاوُدَ؞

¹⁶ ࢡٜنَنغِندِرِ کٛعٜ مَࢡّٜ، ࢡٜنجُوْنجُوْتِرِ بُتُّلِ مَࢡّٜ بٜى کَاڢَاجٜ، ࢡٜمَايْدِ ࢡٜ ڢُو؞ ࢡَاوٛطٛنْ نٛکُّورٜ ندٜعٜ حَا غِبِيٛنْ حٜࢡِ عِنْدٜ حٜلْکَتْ-حَسُرِيمَ؞

¹⁷ ندٜنْ حَࢡْرٜ عُمِّ حَکُّندٜ جَمَعَاجٜ طِطِ ڢُو، حَࢡْرٜ مَنْ سَاتِ مَسِنْ؞ يِمْࢡٜ دَاوُدَ نجَالِ عَبِنٜىٰرْ عٜ يِمْࢡٜ إِسْرَاءِيلَ؞

¹⁸ ࢡِࢡّٜ سٜرُيَتُ تَتٛ ࢡٜعٜ ڢُو طٛنْ تٛنْ‏: يٛعَبْ عٜ عَبِسَيْ عٜ عَسَعٜلْ؞ عَسَعٜلْ عٛ جَاوْطٛ بَنَ لٜلْوَ؞

¹⁹ عٛتَاسْنِ عَبِنٜىٰرْ بٜى تِينَارٜ طُوطْندٜ؞

²⁰ عَبِنٜىٰرْ يٜىٰسِتِ، ࢨَمِ‏: «طُمْ عَنْ نَ، عَسَعٜلْ؟» عٛجَابِ‏: «طُمْ مِنْ؞»

²¹ عَبِنٜىٰرْ وِعِمٛ‏: «عَشُّ تَاسْنُغٛ يَمْ‏! تٛکَّ غٛوتٛ ندٜرْ سُکَاࢡٜ، جَࢡْتُ کٛ عٛمَرِ ڢُو؞» عَمَّا عَسَعٜلْ سَلِ عَشُّغٛ مٛ؞

²² عَبِنٜىٰرْ رٜىٰنْتِنِ مٛ ڢَحِنْ، وِعِ‏: «عَشُّ تَاسْنُغٛ يَمْ؞ عُسٜنِ تَا دٛولَمْ مبَرُغٛ مَ‏!» نٛيْ مِلَارْدَتَ دٜىٰرْطِرَاوٛ مَ يٛعَبْ ࢡَاوٛطٛنْ؟

²³ عَمَّا عَسَعٜلْ سَلِ عَشُّغٛ مٛ؞ نغَمْ مَاجُمْ عَبِنٜىٰرْ يُوْرِمٛ ࢡَاوٛ ࢡَاوٛ حَا رٜىٰدُ بٜى لَبّٛ حَا نغٛ وُرْتِ غَلْ ࢡَاوٛ مَاکٛ؞ طٛنْ نِي عَسَعٜلْ مَايِ، شَالٛتٛوطٛ ڢُو طٛنْ دَرٛ تٛنْ؞

²⁴ عَمَّا يٛعَبْ عٜ عَبِسَيْ تٛکِّ تَاسْنُغٛ عَبِنٜىٰرْ؞ سَاعِ نَانغٜ طٛنْ مُتَ، ࢡٜنجٛتِّ تٛوْندِيرٜ عَمَّ وٛنْدٜ يٜىٰسٛ غِحَ، حَا لَاوٛلْ لَدّٜ غِبِيٛنْ؞

²⁵ يِمْࢡٜ بٜنْيَمِنْ مٛوࢡْتِ، ࢡِطّٛتِرِ ࢡَاوٛ عَبِنٜىٰرْ، ࢡٜطٛنْ ندَرِ دٛوْ حٛورٜ تٛوْندِيرٜ مَنْ؞

²⁶ عَبِنٜىٰرْ عٜوْنِ يٛعَبْ‏: «عَيِطِ کَاڢَحِ نَتِّنَ يِمْࢡٜ حَا ڢٛرٛيْ نَ؟ مَلَّ عَعَنْدَا نٛ تِمّٛودٜ مَاجُمْ حَلِّرْتَ؟ ندٜيْ عُمْرَتَ يِمْࢡٜ مَ ࢡٜعَشَّ تَاسْنُغٛ بَنْدِرَاࢡٜ مُوطُمْعٜنْ؟»

²⁷ يٛعَبْ وِعِ‏: «ڢَکَتْ بَنَ اَللَّه عٛ غٜىٰتٛ، تٛ عَوِعَايْنٛ طُمْ، يِمْࢡٜ عَمْ عَشَّتَانٛ تَاسْنُغٛ عٛنْ حَا جَنغٛ ڢَجِرِ؞»

²⁸ ندٜنْ عٛڢُوڢِ لُوَلْ کٛنُ؞ يِمْࢡٜ مَاکٛ عَشِّ تَاسْنُغٛ إِسْرَاءِيلَعٜنْ، ࢡٜعَشِّ حَࢡْرٜ بٛو؞

²⁹ جٜمَّارٜ ندٜعٜ ڢُو عَبِنٜىٰرْ عٜ يِمْࢡٜ مُمْ تَعِ ندٜرْ عَرَبَ؞ ندٜنْ ࢡٜعٜىٰرِ مَايٛ عُرْدُنْ، ࢡٜشَالِ لٜسْدِ بِتُرُنَ ڢُو، ࢡٜنغَرِ حَا مَحَنَيِمْ؞

³⁰ ندٜ يٛعَبْ عَشِّ تَاسْنُغٛ ࢡٜ، عٛمٛوࢡْتِ يِمْࢡٜ مَاکٛ؞ عٛتَوِ وٛرْࢡٜ سَݠّٛ عٜ نجٛوٜىٰنَيٛ نغَلَا طٛنْ، عَسَعٜلْ بٛو وَلَاطٛنْ،

³¹ يِمْࢡٜ دَاوُدَ مبَرِنٛ يِمْࢡٜ بٜنْيَمِنْ عٜ يِمْࢡٜ عَبِنٜىٰرْ تٜىٰمٜطّٜ تَتٛ عٜ شَݠَّنْطٜ نجٛوٜىٰغٛ (360)؞

³² ࢡٜکٛوشِ ࢡَنْدُ عَسَعٜلْ، ࢡٜعُوِ ندُ حَا بَيْتِلَامَ ندٜرْ يٜنَاندٜ بَابَ مَاکٛ؞ ندٜنْ يٛعَبْ عٜ يِمْࢡٜ مُمْ تٛکِّتِنِ جَحَانغَلْ مُوطُمْعٜنْ جٜمَّارٜ ڢُو؞ ࢡٜنجٛتِّ حٜبُرُونْ وَکَّتِ نَانغٜ طٛنْ ڢُطَ؞