2 حَبَرُوجِ ࢩَلَاطٜ 2 - دٜڢْتٜرٜ اَللَّه ڢُلْڢُلْدٜ عَدَمَوَ

¹ عٛحٛوعِ رٛونْدٛوࢡٜ عُجِنٜ شَݠَّنْطٜ نجٛوٜىٰطِطٛ (70,000) عٜ سٜحٛوࢡٜ کَاعٜ حَا کٛوسٜىٰجٜ عُجِنٜ شَݠَّنْطٜ نجٛوٜىٰتَتٛ (80,000) عٜ حَکِّلَنٛوࢡٜ کُوغَلْ عُجِنٜ تَتٛ عٜ تٜىٰمٜطّٜ نجٛوٜىٰغٛ (3,600)؞

² ندٜنْ سُلَيْمَـٰنُ نٜلْدِ حِرَمْ، لَامِيطٛ تِرُسْ، حَبَرُ نِعِ‏: «عَوَلِّ بَابَ عَمْ دَاوُدَ، عَنٜلْدِمٛ لٜطّٜ شٜمْبِطّٜ نغَمْ عٛࢩِࢡَ جٛوطٛرْدٜ مَاکٛ؞

³ جٛنْتَ ࢩِࢡَنْمِ سُودُ نغَمْ تٜدِّنْغٛ عِنْدٜ جَوْمِرَاوٛ اَللَّه عَمْ، مِسٜنَ ندُ نغَمْ مَاکٛ، مِنْ نغُلَنَ مٛ عُورٜتٜىٰطُمْ يٜىٰسٛ مَاکٛ، مِنْ نجٛعِّنَنَ مٛ تَمْسٜىٰجٜ جٛعِّنْتٜىٰطٜ ڢٛرٛيْ، مِنْ لِيعَنٛ مٛ غُلٜتٜىٰطِ ڢَجِرِ عٜ کِيکِيطٜ عٜ ࢩَلْطٜ شِوْتٛرْطٜ عٜ جُولْطٜ لٜوْرُ حٜسْرُ عٜ جُولْطٜ طٜ جَوْمِرَاوٛ اَللَّه مٜىٰطٜنْ دَرْنِ ڢُو، ڢٛدّٜ کٛ عٛعُمْرِ إِسْرَاءِيلَ حَا ڢٛرٛيْ؞

⁴ سُودُ ندُ ࢩِࢡَنْمِ، لَاتٛتٛ مَوْندُ، نغَمْ اَللَّه عَمِنْ ࢡُرِ طٛوَنْتٜىٰࢡٜ ڢُو مَنغُ؞

⁵ عَمَّا تٛ لَاتَکٜ عَسَمَنْجِ بٜى عَسَمَنْجِ ࢡُرْطِ تٛوُغٛ ڢُو کٜعَتَا مٛ جٛوطَاغٛ، ندٜنْ کَمْ تَغُ حٜࢡَنْ سٜمْبٜ ࢩِࢡَنْغٛ مٛ سُودُ نَ؟ کٛو مِنْ مَا مِڢٛتَايْ ࢩِࢡَنْغٛ مٛ سُودُ، سٜيْ وُلَنغٛ مٛ دٛکّٜ يٜىٰسٛ مَاکٛ، کَنْجُمْ مبَاوَنْمِ؞

⁶ «ندٜنْ کَمْ، نٜلَنَمْ غٛطّٛ بَاوْطٛ حُووُغٛ بٜى کَنغّٜىٰرِ عٜ شَرْدِ عٜ نجَمْندِ مبٛطٜىٰرِ عٜ ࢡَلٜىٰرِ عٜ لِمْشٜ بٛطٜىٰجٜ عٜ بٛطٜىٰجٜ شٛيْ عٜ شَرْوِنَاطٜ، عَنْدُطٛ کُوغَلْ سٜحُغٛ سُورَاجِ بٛو؞ کَنغْکٛ عٛحُووْدَ بٜى حُووٛوࢡٜ عَمْ ࢡٜ بَابَ عَمْ سُࢡْنٛ ࢡٛويْمَ ندٜرْ لٜسْدِ يَحُودَ عٜ بٜرْنِوٛلْ عُرُسَلِيمَ؞

⁷ نٜلْدَمْ لٜطّٜ شٜمْبِطّٜ عٜ بٛوطّٜ عٜ لٜطّٜ سَنْدَلْجٜ دِغَ لِبَنٛنْ بٛو، نغَمْ مِعَنْدِ حُووٛوࢡٜ مَ ࢡٜمبَاوِ ڢٜعُّغٛ لٜطّٜ حَا لِبَنٛنْ؞ حُووٛوࢡٜ عَمْ کُووْدَ بٜى مَࢡّٜ؞

⁸ ࢡٜݠٜعَّنَمِّ لٜطّٜ طُوطّٜ، نغَمْ سُودُ ندُ ࢩِࢡَنْمِ، لَاتٛتٛ مَوْندُ، کَايٜىٰڢِيرُ؞

⁹ حُووٛوࢡٜ مَ ڢٜعّٛوࢡٜ لٜطّٜ، مِحٛکَّنْ ࢡٜ عَلْکَمَارِ بُحُوجٜ عُجِنٜ شَݠَّنْطٜ نَيِ (40,000) عٜ سَعِيرُورِ بُحُوجٜ عُجِنٜ شَݠَّنْطٜ نَيِ (40,000) عٜ عِنَبٛوجَمْ لِيتِرْ عُجِنٜ تٜىٰمٜطّٜ نَيِ عٜ شَݠَّنْطٜ نَيِ (440,000)، نٛنْ بٛو نٜبَّمْ لِيتِرْ عُجِنٜ تٜىٰمٜطّٜ نَيِ عٜ شَݠَّنْطٜ نَيِ (440,000)؞»

¹⁰ حِرَمْ، لَامِيطٛ تِرُسْ جَابِ سُلَيْمَـٰنُ بٜى بَتَاکٜوٛلْ نغٛعٛلْ‏: «جَوْمِرَاوٛ يِطِ يِمْࢡٜ مُمْ، نغَمْ مَاجُمْ عٛوَطِ مَ عَ لَامِيطٛ مَࢡّٜ؞

¹¹ يٜتّٛورٜ لَاتَنٛ جَوْمِرَاوٛ اَللَّه إِسْرَاءِيلَ، تَغْطٛ عَسَمَ عٜ لٜسْدِ، نغَمْ عٛحٛکِّ لَامِيطٛ دَاوُدَ ࢡِطّٛ کَکِّلْطٛ، مَرْطٛ ڢَامُ عٜ حِکْمَ، حَا عٛࢩِࢡَنَ جَوْمِرَاوٛ سُودُ، عٛࢩِࢡَنَ حٛورٜ مَاکٛ بٛو سُودُ لَامُ؞

¹² ندَا، مِنٜلْدِ مَ حِرَمْ-عَبِ، بَاوْطٛ کُوغَلْ، مَرْطٛ ڢَامُ؞

¹³ دَادَ مَاکٛ عِوِ لٜࢩٛلْ دَنْ، بَابَ مَاکٛ بٛو غٛطّٛ تِرُسْ؞ عٛ بَاوْطٛ حُووُغٛ بٜى کَنغّٜىٰرِ عٜ شَرْدِ عٜ نجَمْندِ مبٛطٜىٰرِ عٜ ࢡَلٜىٰرِ عٜ کَاعٜ عٜ لٜطّٜ عٜ بَتَّاجِ بٛطٜىٰجِ عٜ شَرْوِنَاطِ عٜ بٛطٜىٰجِ شٛيْ عٜ دَنٜىٰجِ طِغُّطِ؞ عٛعَنْدِ سُورْطِنغٛ سُورَاجِ بٛو عٜ وَطُغٛ کُوجٜ طٜ غٛطّٛ يِطِ ڢُو؞ کَنغْکٛ عٛحُووْدَ بٜى يِمْࢡٜ مَ وَاوْࢡٜ کُوغَلْ عٜ يِمْࢡٜ جَاغٛرْطٛ عَمْ وَاوْࢡٜ کُوغَلْ، بَابَ مَ دَاوُدَ؞

¹⁴ عَلْکَمَارِ عٜ سَعِيرُورِ عٜ عِنَبٛوجَمْ عٜ نٜبَّمْ کٛ تَمِّيطَ حٛکُّغٛ، بَرْکَامَ، حٛکُّ طُمْ حُووَنٛوࢡٜ مَ؞

¹⁵ مِنِنْ کَمْ مِنْ ݠٜعَّنْ لٜطّٜ حَا لِبَنٛنْ، دٜيْدٜيْ حَاجٜ مَ ڢُو؞ مِنْ کَࢡَّ طٜ، مِنْ تَيْنَ طٜ مبٜىٰلَ، مِنْ نجَحْرَ طٜ وُرٛ يَڢٛ؞ حَا تٛنْ مبَاوَتَ يَحْرُغٛ طٜ حَا عُرُسَلِيمَ؞»

¹⁶ سُلَيْمَـٰنُ لِمِ جَنَنْࢡٜ جٛوطِيࢡٜ ندٜرْ إِسْرَاءِيلَ ڢُو، ࢡَاوٛ بَابَ مُمْ دَاوُدَ لِمُنٛ ࢡٜ نَانٜ؞ لِمْغَلْ مَࢡّٜ وَطِ عُجِنٜ تٜىٰمٜرّٜ عٜ شَݠَّنْطٜ نجٛوٛ عٜ تَتٛ عٜ تٜىٰمٜطّٜ نجٛوٜىٰغٛ (153,600)؞

¹⁷ ندٜرْ مَࢡّٜ عٛحٛوعِ رٛونْدٛوࢡٜ عُجِنٜ شَݠَّنْطٜ نجٛوٜىٰطِطٛ (70,000) عٜ سٜحٛوࢡٜ کَاعٜ دٛوْ کٛوسٜىٰجٜ عُجِنٜ شَݠَّنْطٜ نجٛوٜىٰتَتٛ (80,000) عٜ حَکِّلَنٛوࢡٜ کُوغَلْ عُجِنٜ تَتٛ عٜ تٜىٰمٜطّٜ نجٛوٜىٰغٛ (3,600)، حَا ࢡٜکُووْنَ حُووٛوࢡٜ؞