Luke 2 - Chin-Laitu

¹ Jnkhaw kvawqkrai vj Rawmaq Ikarek 'Iqkuktuq' sica' na a'pjng nawk kj mji tiq tomti heq khrawng tengkhong carawng an'poqcai laq ai tiyj sitawng an'hyawk.

² Ni baw cxkcxk tengkhong carawng an'hawn laq khaw vj 'Kuqreniq' khrawng 'Siriya' kre yj mawng ngj a'thonne.

³ Khrawng tjng tomti nhi tiq mji nghxt nawk dxn tjq cet ba na tengkhong carawng ngj an'ming an'hawn ne ye laq.

⁴ Jnkhaw vjyawng 'Yawtep' kha mawnglen 'Davik' yx vj kxq komlo tiq pjinghawt tj thonne khennj 'Galiqle' kre 'Nacarek' luq j kxq khrawng 'Yuqdaq' kre 'Betlawng' luq pawt ming hawn hai yj a'cet.

⁵ Jn baw a'cet khaw hxvj yawng 'Yawtep' na a'nghiq e-cjn a'hjn cang nghxq tiq 'Mariq' dj a'hiq cet nghaq.

⁶ Nhi hji pjinhiq jn tjq a'hiq khrai na ce 'Mariq' ce a'hjn niq-e lo theqna.

⁷ Nhi na cawcxk cawpaw a'caw nawk. Nhi hji tok dxmom nawk hai dxn mji tiyju khennj 'Mariq' na dikcaw khrawng suisawk kj lhom na syacawk e-kok kj a'ip sawk.

⁸ Jn yawn nj khrawng to cong saw heq na nhi tiq to heq 'Betlawng' luqka vj kxq laikhan jng tiq j an'cong.

⁹ Jnkhaw vjyawng 'Pxtpaw Phawlaw' tjq lo khrawng hawn cipaw pjinghawt ce nhi tiq mhawimhaw vj mhoknghawt pjttj dawng lo theqna 'Pxtpaw Phawlaw' phun khrawng nhi tiq ceng ka vj a'dawng lo. Jnkhennj to cong tiq heq an'nikyon kyaq.

¹⁰ Hawn cipaw na "kiqkawq cuq jn khrawng heq tomti tok a'lhji yj bji tiq sitawng pawi ka'sai lo yawng.

¹¹ Ni baw khonhxp pawi yj ljulawk ke hai (Mesyiyaqj) 'Boipaw Yesyuq' khrawng mawnglen 'Davik' luq j a'mji lo pjn.

¹² 'Betlawng' luq j suisawk kj lhom theqna syacawk e-kok kj an'iq sawk khrawng dikcaw nang'hi na na'mhuq laq hxvj 'Boipaw Yesyuq' nawk khrawng nan'cok laq ai tiyj a'hawu.

¹³ Mhoknghawt pjttj hawn cipaw heq kha hawn luqk j kxq komlo theqna 'Pxtpaw phawlaw' sitawng ni baw a'tjuqkauq ve nawk.

¹⁴ Hawn luq duk kj mji tiq 'Pxtpaw Phawlaw' na'phun len bjiq seq. Ni somdek khrung ngj mji tiq 'Pxtpaw Phawlaw' na na'nawye nawk khrawng heq tomti yadik dawmdak mji bjiq seq uq' tiyj 'Pxtpaw Phawlaw' phun a'tjuqkauq ve nawk.

¹⁵  Jnkhaw vjyawng hawn cipaw heq hawn luq pawt an'cet ba pjnnj to cong saw heq na han'hi yj 'Pxtpaw Phawlaw' na a'soqsai khrawng heq so hai tok kj 'Betlawng' luq pawt cet sjn puq tiyj an'punghaw ko an'hawu ve tong.

¹⁶  Nhi tiq jn dxn tjq a'yawng ngj cet theqna 'Yawtep' na 'Mariq' dj syacawk kok kj ip tiq dikcaw an'khom me.

¹⁷  To cong tiq heq na kha dikcaw 'Yesyuq' an'mhuq na ce hawn cipaw heq na an'hawu nghxt khrawng dikcaw dj soisen ne tiq sitawng heq khrawng, khrawng heq j an'sai ba.

¹⁸ To cong saw heq sai ba khrawng sitawng nge tiq khrawng heq na kha a'lhji yj an'mhawnkau nghxq yawng.

¹⁹ Jn baw khennj 'Mariq' na a'cxk nawk hxvj hawn cipaw 'Gabrelaq' dj an'khom me nghxt khrawng ngj thoq dikcaw dj soisen ne tiq heq tomti mhawt te na sawp na sawp na a'khin ne ba.

²⁰ To cong saw heq na khrawng hawn cipaw hawu khrawng baw vj an'mhuqkhom laq khennj 'Pxtpaw Phawlaw' phun tjuqkauq ve pheng an'cet ba.

²¹ Nhxp sat nhxp a'khrai na ce dikcaw khrawng nhi tiq thum baw a'vxn awq pji poqcai na 'Mariq' na 'Yawtep' na khrawng hawn cipaw sin nghxt baw vj 'Yesyuq' tiyj a'ming a'hiq sui.

²² 'Mawsye' petnyet kyengl ngj an'thum me nawk baw vj cimkyalek na bjikhji tiqm an'poqcai cawng na ce nu-paw hji na dikcaw 'Yesyuq' khrawng 'Pxtpaw Phawlaw' ceng ngj awp pe hai yj 'Yeruqsalawng' luq pawt a'hiq ceq pui nawk.

²³ 'Mawsye' petnyet kyengn ngj an'thum me nawk baw vj cimkyalek na bjikhji tiqo an'poqcai cawng na ce nu-paw hji na dikcaw 'Yesyuq' khrawng 'Pxtpaw Phawlaw' ceng ngj awp pe hai yj 'Yeruqsalawng' luq pawt a'hiq ceq pui nawk.

²⁴ Khongkho haw khop-nghawt siyaqna kho haw lu-nhiq j an'pawq laq 'Pxtpaw Phawlaw' petnyettaw hawu baw tjng ngj an'pawq.

²⁵ Jnkhaw cxn nj 'Yeruqsalawng' luq j 'Syuqmong' ming naw tiq khrawng pjinghawt a'mji. Nhi na khrawng 'Pxtpaw Phawlaw' lx khrawng poqcai theqna krundiu tiq khrawng pjinghawt tj a'thonne. 'Icare' khrawng yx heq j 'Pxtpaw Phawlaw' na tha pe theqna a'ljulawk ke hai cong nge tiq pjinghawt tj a'thonne. Cimkya tiq muikhraw heq khrawng nhi ceng ngj mji theqna

²⁶ Nhi yj "ljulawk ke hai Boipaw na'mhuq phu yaq kaw bjt hai siyju tiq'' tiyj 'Pxtpaw Phawlaw' na a'hawu nghxt.

²⁷ 'Mariq' na 'Yawtep' na kha petnyettaw baw poqcai hai yj Phawlaw kyong tjq dikcaw 'Yesyuq' khrawng a'hiq lo pui nawk. 'Syuqmong' kha Phawlaw kyong tjq cet hawn nj cimkya tiq muikhraw na lawm a'dawn.

²⁸ Jnkhaw vjyawng dikcaw 'Yesyuq' khrawng 'Syuqmong' na nhi kut tj pjm na 'Pxtpaw Phawlaw' phun ni baw a'tjuqkauq ve nawk.

²⁹ 'Pxtpaw Phawlaw' na na'hawu baw tjng ngj nang mapaw ke khrawng yadik dawmdak ka'bjt tj ka'laq pjn.

³⁰ Ibahai yj nawk hxce khrawng heq batnghawt ljulawk ke hai tiq nang na na'tjq lo khrawng 'Boipaw Yesyuq' ka'mhuq laq pjn khennj.

³¹ Khrawng heq tok kj nang na na'poqcai pet khrawng

³² 'Boipaw Yesyuq' khrawng khrawng kyaw yx heq j nang sitawng sai pet tiq a'ang ngj thon theqna nang yx 'Icare' heq phun len hai tok kj poqcai pet tiq a'ang ngj kha a'thonne.

³³ 'Mariq' na 'Yawtep' na kha 'Syuqmong' hawu khrawng dikcaw 'Yesyuq' sitawng a'hiq yawk na a'hiq mhawnkau nghxq yawng.

³⁴ Jnkhaw vjyawng 'Syuqmong' na nhi tiq j khunkhjipawi a'pet pjnnj 'Mariq' j 'Icare' khrawng yx heq duk kj kxq 'Pxtpaw Phawlaw' kheu nge tiq heq na nge yaq tiq heq, a'pawi mhu tiq heq na mhu yaq tiq heq lui hai tok kj 'Pxtpaw Phawlaw' na nang caw khrawng lui na a'tawk.

³⁵ Khrawng heq lungthin duk kj kxq an'khin khrawng tomti nhi na a'phjuhak kai. Jnkhennj khrawng heq na lx hai siyju uq. Cim hyum mj na'thin cop an'sun baw vj na'khawm laq ai" tiyj a'hawu nghxt.

³⁶ Jn dxn nj 'Asya' yx vj kxq 'Phanveulaq' cawnhu 'Ennaq' ming naw tiq 'Parawphek' pjinghawt a'mji. Nhi khrawng a'sawk nju caw hxvj ka'thoq imthong e-the na a'immawq paw dj khokum kum-seq a'hiq mji nghxt nghaq.

³⁷ Tuq-j ce nhi khrawng mhe'nu vj thonne theqna a'sawk kha satkip sina kum-palhi a'mji nghxq khennj a'cang koklok lo pjn. Nhi khrawng Phawlaw kyong ngj kxq i-khaw vj kha thok yaq kaw i-kha e-yaq kaw a'nhxp a'yawn uqpuk cong na suqtong.

³⁸ Jnkhaw hxvj Phawlaw kyong ngj khrai lo tiq dikcaw 'Yesyuq' nhi na a'mhuq khaw hxvj 'Pxtpaw Phawlaw' phun khrawng tjuqkauq ve naw na 'Yeruqsalawng' luq vj ljulawk ke hai 'Boipaw Yesyuq' cong nge tiq heq tomti yj dikcaw sitawng a'hawu yok.

³⁹ Jnkhaw vjyawng 'Yawtep' na 'Mariq' na khrawng 'Pxtpaw Phawlaw' petnyettaw heq a'pawi caw vj a'hiq poqcai cawng na ce nhi tiq im mji nawk 'Galiqle' kre 'Nacarek' luq pawt an'cet ba.

⁴⁰ Dikcaw a'len lo na ce kangma ye theqna nyen pawi yj a'kxmyom. 'Pxtpaw Phawlaw' pet khrawng khunkhjipawi a'khawm laq.

⁴¹ Kum mhji kum mhji 'Mariq' na 'Yawtep' khrawng pataqkha pji poqcai hai yj 'Yeruqsalawng' luq pawt a'hiq cet soi.

⁴² 'Boipaw Yesyuq' kum kalainhiq a'mji na ce nhi tiq khrawng pataqkha pji poqcai hai yj jn luq pawt an'cet nghaq kyaq.

⁴³ Pataqkha pji pa'kau na ce dikcaw 'Yesyuq' khrawng 'Yeruqsalawng' luq duk kj a'mji ye nghxt khrawng a'nu-paw hji na co yaq kaw vj a'hiq lo ba tawk.

⁴⁴ Dikcaw 'Yesyuq' khrawng nhi hji dj an'cet ba pui khrawng heq duk kj pui piq cjk pai tiyj khin theq hji na nhxp-nghawt kung a'hiq ceq tawk. Pjnnj yawng dikcaw 'Yesyuq' khrawng khepui bongbawi heq ceng ngj nhi hji na sui na kha

⁴⁵ khom tiyaq theqna 'Yeruqsalawng' luq pawt sui hai yj a'hiq lo ba.

⁴⁶ Nhxp-thum nhxp pjyawng dikcaw 'Yesyuq' khrawng PhawLaw kyong duk kj 'Kyu' uqpade yawcu tiq sarapaw heq ceng ngj a'mji khrawng a'hiq khom me. Dikcaw 'Yesyuq' na khrawng nhi tiq thonkheu heq nge theqna nhi tiq j nghi dang a'ti khrawng heq a'nghiq ba.

⁴⁷ Dikcaw 'Yesyuq' kheukhaw yaw laq tiq khrawng heq na nhi na a'cok khrawng hyawq j a'hawu ba khrawng an'mhawnkau kyaq.

⁴⁸ 'Yawtep' na 'Mariq' na kha dikcaw 'Yesyuq' a'hiq khom khaw hxvj nhi hji na kha mhawnkau theqna nhi nu na "caw vj, ibahai yj ni baw na'thon laq ke'hiq na lhawq tong na ka'hiq sui yok laq siyju vaw tiyj" a'hawu.

⁴⁹ Jnkhaw hxvj dikcaw 'Yesyuq' na 'ibahai yj na'hiq sui yok. Ke ce ka'paw im mj yawng ka'mji yai tiyj co yju tiq hiq aw tiyj a'hawu ba.

⁵⁰ Sinakha dikcaw 'Yesyuq' hawu ba khrawng nhi hji na yawcu yju hji.

⁵¹ Jnkhaw vjyawng dikcaw 'Yesyuq' khrawng 'Yawtep' na 'Mariq' kheu nge na nhi hji dj 'Nacarek' luq pawt a'yun ne ba. Nhi nu na ce hawn cipaw dj a'khom me nghxt khrawng ngj ka'thoq tuq j a'khom laq khrawng heq nhi lungthin duk kj a'khin ne nawk soi.

⁵² Jnpjnnj 'Yesyuq' a'len lo na ce nyen pawi yj kxmyom theqna kangkang mama vj a'mji. 'Pxtpaw Phawlaw' ceng ngj kxq khunkhjipawi laq theqna khrawng heq nawye nawk khrawng kha a'khawm laq.