फिलिप्पि INTRO1 - चितवनिया थारुकितबवाक परिचय फिलिप्पि सहरवा माकेडोनियाक रोम परदेसक एगुडा मुख्य सहर रहलिय। उअ सहरवामा बहुत जन रोमि मन्सेसभ हसे सिपाहिसभ रहइ, उहेसे फिलिप्पि सहरवाके रोमि उपनिवेस बनोले रहलइ (प्रेरित १६:१२)। यखनि फिलिप्पि माकेडोनिया परदेसक ग्रिसक उतर भागमा बडइ। पावल यापन परचारक दोसरो यातरामा फिलिप्पि सहरवामा पुगलिय। उअ जुनवामा युरोप महादेसमा ख्रिस्टक बारेमा सुसमाचार परचार कराइल इअ पहिला पल्टा रहलइ। यसने इसाइ धरम एसियासे युरोपलइ फइललइ। इसाइ धरम एसियामा सुरु भेलइ। उहेसे इअ पछियक धरम हइने हखइ। पावल एगुडा दर्सन पउले रहलिय। उहेसे पावल पहिला फिलिप्पि सहरवामा गेलिय, जुन दर्सनमा एक जन माकेडोनियाक मन्सावा “माकेडोनिया यउहुँ हसे हमराके मदत करहुँ” कहके कहले रहलिय (प्रेरित १६:९-१०)। फिलिप्पिमा भेलि पावलक पहिला भेटक बारेमा बयानक बारेमा प्रेरित १६:११-४० मा लिखाइल बडइ। वकरपाछा पावल यापन परचारक तिसरि यातरामा फेरि फिलिप्पि गेलिय (प्रेरित २०:१,६)। पावल इअ चिठिया झ्यालखनवामा रहइकि लिखले रहलिय। बहुत जन बाइबलक विद्धवानसभक विचारमा एफिसियानिके, कल्लसियानिके हसे फिलेमोनके लिखलि चिठियानिसाङे इअ चिठिया फेनि इस्वि सम्वत ६२-६३ मा रोमसे उअ लिखके पठोले रहलिय। इअ चिठियानिके झ्यालखानाक चिठि कहेके चलन फेनि बडइ। पावलक जिवनक बारेमा याको बुझे चाहबहुँ जउँ, रोमि मन्सावानिके लिखलि चिठियाक परिचय हेरबहुँ। बिसय सुचिक रुपरेखा परिचय १:१-११ पावलक व्यक्तिगत परिस्थितिसभ १:१२-२६ ख्रिस्टमा भेल जिवन१:२७–२:१८ तिमोथि हसे इपाफ्रोडिटसक तहिँया योजना २:१९-३० विरोधियानि हसे खतरासे बचेके चेतवनि ३:१–४:९ पावल हसे फिलिप्पि सङहातिसभ ४:१०-२० वराट बात ४:२१-२३ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.