نامَه فیلیپی کلیسا را 4 - کتاب مقدس به زبان تالشي - گویش مرکزی

¹ پس، اَی چمن برا اِن کن بَشِمَه رَی بداشتیم، و شِمَه ویندِرا ایشتیاق بَداشتیم، اَی شِمَه کن چمن خَشی و کلَّه تاجیرون، اَی خاجَتیِن، اِنتَرَکِه خِداوَندیکا آمبَست بِبَه.

پند، تشویق ، دِوا

² اِفُودیه کا خاشتو خازِمه و سینتیخی کا خاشتو خازبَکم کن خداوندی دِلَکا یَک رَای بِبون.

³ ها بَتِکا نی اَی وَفادارَ هَمکار، بَپیمَه کن اِم دِ گِلَه خَنِمی کاریَری بَدَری. اِمی خونِه کن اَکلیمِنتُس و چمن دییرَ هَمکارونَّه کن چَوون نومی زندَگی دَفتَرییکا نِوِشتَه آبَه یَه، اَیِن بَمِنَه دوشادوش اِنجیلی کاریرا زَمَتِشون کَشتیَه.

⁴ اوزون خداوندیکا خَش بِبَه؛ هَنی باتیم خَش بِبَه:

⁵ بَرزَ گرد بوینن کن شمَه با مولاحِضَه آدَمیرون. خداوند نِزِکَه.

⁶ هیچ چیرا تَفشیشی کا مَبَه، بَلکَم هَر چیی ایی دِلَکا دِوا و خاشتو خازینَه، و شِکر کَردِنَه، اِشتَن خواستَه اون خدا را بِواجَه.

⁷ خدا صلح و سلامتی هر فَهمیکا کَفا تَرَ، شِمَه دِلون و فکرون مسیح عیسی دِلَکا غَم بَردیَه.

⁸ آخِریکا، اَی برا اِن، هَر چیی ایی کن راستَه،هَر چیی کن حورمت بَداشتی، هَر چیی کن دِرِستَه، هَر چیی کن پاجا اَ ، هَر چیی کن دِل پیستَیَه و هَر چیی کن پرستش کَردِ لَیاقَتی بَداشتی، اَگَم چاکَه و اَگَم پرستش کَردِ اَرزشی بَداشتیه، چَوون خونه فِکر بکَرَ.

⁹ اَ چیی ایی کن بَمِنکا آموج گَتَرونَه و بَدست وردَرون و بَمِنکا دَرَستَرون و یا بَمِنکا ویندَرون، هَی اَنجوم بدَرَ، کن خدا صلح سلامَتیَ بَشِمَنَه بَبیَه.

خدا تدارک ویندِ

¹⁰ خداوندی دِلَکا خَیلی خَشیمَه کن ایسَه ایکَرَ دییَر چمن خونه تَفشیشیرون. واقییَن کن شِمَه چمن فِکریکا بیرون، ولی فِرصَت نِداریرون.

¹¹ اِمی نیازی خونه نمَوات، چون آموج گَتَمه کن هَر وضعیکا قانِع بِبوم.

¹² اَز، هِم دَسدَریس بِه مَعنی بَموستیمَه، و هِم نِعمَتیکا فِرَوون بِه زندَگی کردِ بَموستیم. هَر وضع و حالیکا، سیر بِه و وِشنگی، زندَگی راز، و گیدَلی بِه و دَسدَریس بِه، آموج گَتَمَه.

¹³ چَی واسیطنَه کن بَمن زبق دَرِ، هَر کاری اَشامَه کردِ.

¹⁴ اِم حالیکا، لطف کَردِرون کن چمن زَمَتونکا شَریک آبیرون.

¹⁵ شِمَه نی، اَی فیلیپیِن، چاک بَموستیرون کن اِنجیلی کاری بنا کردِ، مَقدونیَه کا شِه بَه دوملَه، هیچ کِلیسا ایی غَیرَاَز شِمَه، دخلو خرجیکا بَمِنَه شَریک آنِبَه.

¹⁶ حتی زَمانی کن شهر تِسالونیکی کا بیم، چَن کَرَ چمن اِحتیاجونرا کمک عَندِرون و هَنی عَندِرون.

¹⁷ نِه اِمکن خَلا ویگَتِه دوملَه ایم، بَسکَم بَرَ ایی دوملَه ایمَه کن شِمَه ایتباری خدا وَریکا ویشتَر آکَرِ.

¹⁸ شمه کومکِن کامیل چمن دَست آرَستَه و چمن اِحتیاجیکا ویشتَر بَداشتیم، ایسَه کن شِمَه رَونَه آکَردَ کمکی اِپافرودیتوسی واسیطنَه ویگَتِمَه هر چیی ایکا فِروون بَداشتیمه. شِمَه خَلا، خَشَه بوعَه عطر و مقبولَه قِربونییَه، کن خدا راضی آرَکَرد.

¹⁹ و چمن خدا، گردِ شِمَه نیازون اِشتَن پر جَلالَه دوُلَتی طبق، مَسیح عیسی دِلَکا رفع بَکَیَه.

²⁰ خدا و چَمَه آستامونیَه دَدَ را تا اَبَد شکوه و جَلال ببو. آمین.

آخِرین سَلامِن

²¹ گِردِ موقدَسون مَسیح عیسی دِلَکا سلام بدَرَ. برا اِنی کن بَمِنَه دِرِن، بَشِمَه سلام دَرِن.

²² اِم جِگا گِرد موقَدَسِن شِمَرا سلام بَدان، بخصوص اَیِنی کن رومی ایمپراطوری، کَه آدَمِنین.

²³ خداوند عیسی مَسیح فِیض شِمَه روح نَه دَرِبِبو. آمین.