نامَه فیلیپی کلیسا را 2 - کتاب مقدس به زبان تالشي - گویش مرکزی

مسیح فروتَنیکا سرمَشق گَتِه

¹ پس اَگَم مَسیح دِلَکا آلاویستیرون، اَگَم چَی موحبَت شِمَه آلاونِه، اَگَم روح دِلَکا ریفاقَت دارَ، و اَگَم مِربانی و دل سوزی هِستَه،

² هَم رَای بِه نَه، هِم موحبتینه، یکدِلی و هم نظَر بِه نَه چمن خَشی کامیل آکَرَ.

³ هیچ کاری زِرَ و یالَه نار گیری سَردِرِ مَکَرَ، بَسکَم فروتَنی نَه دیَرَ کَسون اِشتَنکا بِیتَر بِزنَه.

⁴ هیچ کِرَم شِمَکا تاکَه اِشتَن نفعی فِکریکا مَبو، بَسکَم دیَرَ آدَمون فِکریکا نی ببو.

⁵ هَه فِکرون بِدارَ کن مَسیح عیسی داریَه:

⁶ اَ کن هر چَنَه خدا نَه ایی شکل بَه خدا نَه بَرابَر بِه کا دَنچِکِستِش،

⁷ بَلکَم بَشتَنِش تَی آکَردَ و وَزیَر بِه شِکلِش گَتَه آدَمون شِکلی شیوار دَرمَه.

⁸ و چون اینسانی شِکلی شیوار دَرمَه بَشتَن فروتن آکَردِشَه و تا مَردِ موقِه، حتی صَلیبی سَردِرِ مطیع آبَه.

⁹ پس خدا نی بَرک بَی دَوراشتِشَه و گِرد نومونکا کَفاتر بَی ایلَه نوم آداشَه،

¹⁰ تا عیسی نومینَه هر زِنگی شَت آبو، آستامونیکا، زَمینی سَر، و زَمینی بنیکا،

¹¹ و هَر زونی ایقرار بکَرِ کن عیسی مَسیح «خِداوَندَ»، خِدای دَدَ شکوه و جَلالی خونِه.

نور دِنیا دلَکا

¹² پس اَی خاجَتیِن، هَتَه کن اوزون فِرمون بیرون، ایسَه نِه تاکَه چمن مَندَ جِگاکا کا بَلکَم پی خَیلی ویشتَر چمن مَند نِبِه کا، اِشتَن نیجات گَتِرا تَرسو لَرزینَه اَنجوم بدَرَ؛

¹³ چون خِدایَه کن شمَه دلَکا اِشتَن خَشی خونه کا کار کردِ، هِم ایرادَکا و هِم عَمَلیکا.

¹⁴ هَر کاری بی غور غورو خَرا خِلِه اَنجوم بدَرَ،

¹⁵ تا بی‌ عَیب و سادَ دل، و خدا بی عَیبَه خِردَنِن بِبَه، خَطاکار و گومراهَه اودومی دِلَه، کن شمَه نور چَوون دِلَکا هِنتَه اِستَرَ اِن اِم دِنیا کا شَپَق بَژِرون،

¹⁶ زندَگی کلامی آمبَست غَم بَرَ تا مسیح ویگَردِسته روجیکا ایفتخار بکَرم کن دَدار نَوریجیمَه و دَدارِم زَمَت کشتَه نی.

¹⁷ حتی اَگَم لازم ببو چمن خون هِنتَه خَلایی شیوار، شمه ایمانی قِربونی را ویبو، خَشیمَه و شِمَه گِردینَه خَشی بَکَم.

¹⁸ و شِمَه نی پی هِن تَرَکِه خَش بِبَه و بَمِنَه خَشی بکَرَ.

تیموتائوس و اِپافْرودیتوس

¹⁹ خداوند عیسی دِلَکا اُمید بداشتیمه کن تیموتائوسی خَیلی زو شِمَه وَر رَونَه بِکَم تا شِمَه حالیکا باخبَر بِبوم و چمن دِل خَش آبو.

²⁰ اِمی خونه کن هیچ کَسیم نییَه کن حَییقتن شمه راحتی فِکریکا ببو.

²¹ اَیِن گِرد اِشتَن مَنفَعَتی دوملَه این، نِه عیسی مَسیح.

²² ولی شِمَه بَموستیرون کن تیمو تائوس اِشتَن وَرداوَردی پس آدوعَشَه، اِمی خونِه کن بَمِنَه، هِنتَه زوعَه ایی اِشتَن دَدَ نَه، اِنجیلی کاریکا خیدمَتِش کردیَه.

²³ پس اُمید دارِم هِنتَه کن چمن تَکلیف رِشون آبَه، اَی شِمَه وَر بَینِم؛

²⁴ و خداوندی دِلَکا اِطمینان دارِم کن اِشتَن نی خَیلی زوو بومَمَه.

²⁵ هنترَکه، اَز لازم بَموستیم اِپافْرودیتوسی شِمَه وَر بَینِم، کَسی کن ایی طَریفیکا برا و همکار و چمن هَم رَزمَه، و دییَر َوَریکا، کَسیَه کن شِمَه بَی عَندَرون بَه تا چمن نیازون رفع بکرِ.

²⁶ چون شِمَه گِردی ویندِ خَوَصی دارِ و اِمی خونِه کن دَرَستَرون بَه اَ آزاری آبَه یَه، تَفشیش دگِنستَه به.

²⁷ واقییَن آزاری بَه و کایبَه مَردِ. اَمّا خدا بَی رحم کَردِش، و نِه تاکَه بَی، بَلکَم بَمن نی رحم کَردِش، تا قورصَه ایی چمن قورصه اون سَر ایضاف آنِبو.

²⁸ پس اَز چَی عندِرا ویشتَر خَشیم، تا هَنی چَی ویندِ خونِه خَشی بکرَ و چمن قورصَه کا نی کَم آبو.

²⁹ خداوندی دِلکا، بَی وِرَ خَشینَه قِبول بکَرَ و اِنتَرَ آدَمون حورمتی غَم بَرَ،

³⁰ اِمی خونِه کن اَ، مَسیح راکا کایبَه اَمِرییَه، اِشتَن جانی خَطَریکاش درفَندَ تا شِمَه خیدمَتی کم و کاستی جُبران ببو.