نامَه فیلیپی کلیسا را 1 - کتاب مقدس به زبان تالشي - گویش مرکزی

¹ پولوس و تیموتائوس، کن مسیح عیسی وَزییَرین، طَرَفیکا، بَه گِردِ شهر فیلیپیَه موقدَسِن کن مَسیح عیسی کاینَه، ناظیرِن و شَمّاسِن:

² فیض و صلح و سلامتی چَمَه دَدَ، خدا، و خداوند عیسی مسیح طَرَفیکا، شِمَه نَه ببو.

دِوا و شکر کردِ

³ هَر موقِه شِمَه یاد آمَفَند، اِشتَن خدا شِکر باتیم

⁴ و اوزون چمن گِردِ دِوا اونکا شِمَه گِردیرا خَشینَه دِوا بَکَم،

⁵ اَ همکاری ایی خونه کن اَوَلَه روجیکا تا اومروج، اِنجیلی کاریکا هِستیرون.

⁶ یَقین بموستیم اَ کن چاکَه کاری شِمَه دِلَکا شِروو کَردِشَه، تا مَسیح عیسی ویگَرستِه روجیرا، اَی تَمون آرَکَرد.

⁷ اَز اِم حَقی بَداشتیمَه کن شِمَه گَردی خونِه اِنتَرَ حِسّی بِدارم، چیرا کن چمن دِلیکا جِگا بَداشتیرون؛ اِمی خونِه کن شِمَه گِرد بَمِنَه خدا فِیضیکا شَریکیرون، چِه چمن زیندان دگنِستِکا و چِه اِنجیلی دیفا کَردِ کا بِبوم و چَی حَییقتی ثابیت کَردِ کا.

⁸ چون خدا شاهیدَ کن چنترَ ایحساسینَه کن عیسی مسیح کا سرچشمَه بَگَتی، شمَه گِردیرا ایشتیاق بَداشتیم.

⁹ چمن دِوا اِمَه کن شِمَه موحبَت ویشتَر و وِرتَر آبو و کامیلَه اَلمند گیری و فَهمینَه دَرِ ببو،

¹⁰ تا بِشاعَه اَ چیی ایی کن چاکترَ قبول بکرَ و مَسیح روجیکا پاجا و بی عَیب ببَه،

¹¹ صالِح بِه بَرَ کا پَتلمَه بِبَه کن عیسی مَسیح واسیطَنَه، خدا شکوه جَلالیرا تَمون آرَب.

اِنجیلی پیشرفت

¹² اَی برا اِن، اَپیمَه بِزنَه اَ چیی کن چمن سَر گِذَشتَه، واقییِن اِنجیلی پیشرَفتی باعیث آبَه،

¹³ ایی جوری کن سَلطَنَتیَه کاخی نیگَبانونرا و گِردِ آدَمونرا دیار آبَه کن اَز مَسیح خونِه زیندانیکامَه؛

¹⁴ و چمن زیندان دگِنِسته باعیث آبَه کن ویشتَرِ برا اِن، خِداوَندیکا دِلی زِبق آکَن تا جورئَتینه، خدا کَلامی بی اِمکن بِتَرسِن بِواجِن.

¹⁵ بَعضیِن زِرَ بردِ و زِرَ دوعِه خونه مَسیح موعیظَه بکَن، ولی بعضییِن نی چاکه نِیَّتینَه.

¹⁶ اِم دِوومین کاولَه مُحبَتی خونِه اِنتَرَ بَکَنَه، چون بَموستینَه کن اَز اِنجیلی دیفا کَردِ خونِه اِم جِگاکام.

¹⁷ اَمّا اَیِن زِرَ دوعِه خونِه مَسیح موعیظَه بکَن، نِه چاکَه نِییَّتینه، اِم خَیالینَه کن زیندانی دِلَکا بَمن عذاب دَرِن.

¹⁸ پس چه؟ اِم مُهیمَّه کن هَر جوریَه، مَسیح ایلام ببو، چِه نِیت دِرِست ببو، چِه نادِرِست! و اَز اِمی خونِه خَشی بَکَمه. ها و هَنی خَشی بَکَمَه،

¹⁹ چون بَموستیمَه کن شِمَه دِوا اونَّه و عسیای مَسیح روح کاریَرینَه، اِمِن چمن رَخِستِه باعیث بَبین،

²⁰ هَته کن ایشتیاقینه اینتظار بَکَشتیم و اُمیدِم هِستَه کن هیچ چیکا سَر اَفکَندَ آنیمَب، بَلکَم کَامیلَه جورئَتینه، ایسَه نی اوزونی شیوار، مَسیح چمن تَنیکا جَلال بگَتی، چِه مَرگیکا و چِه زِندَگیکا.

²¹ اِمی خونه کن مِرا زندَگی کَردِ مَسیحَه، و مَردِ مِرا بَرَیَه.

²² اَگَم پی اِشتَن زندَگی اِم تَنیکا ایدامَه بِدَرم، اِم مِرا هِنتَه پور مِژدَ کاریَه. اِم حالینه نِمَشا واتِه کِرَم گِلَه اینتخاب بَکَم!

²³ اِم دِ وَصَطیکا برکَه چیمَه میمَه کامَه: چیرا کن طَمارزو دارِم اِم دِنیاکا بِشوم و مَسیح نَه بِبوم، اِمی خونه کن اِم خَیلی بِیتَرَ؛

²⁴ اَمّا چمِن جندَکی زِندَ مَندِ شِمَه خونِه را واجیب تَرَ.

²⁵ چون اِمی چاک بموستیم کن شِمَه خَشی و پیشرَفتی خونه ایمانی دِلَکا، زِندَ بَمَندیمَه و شِمَه گِردینَه ایدامَه دَرِم،

²⁶ تا وقتی هَنی شِمَه وَربام، شِمَه ایفتخار مَسیح عیسی دِلَکا چمن خونِه ویشتَر و وِرتَر آبو.

²⁷ تاکَه بَرزَ شمه زندَگی رَوش، مسیح اِنجیلی شَئنیکا ببو، تا چِه بام و شِمَه بِوینِم و چِه نام، شمَکا درَسِم کن شمه ایلَه روح کا آمبَستیرون و یَک فکر، دوش بَه دوش اِنجیلی ایمانیرا تقلا بَکَرون،

²⁸ و هیچ چیی دِلَکا اَیِنی کا کن شمَه زِرَبَرا این متَرسَه، کن هِم چَوونرا نیفلَه آبِه دیارَنِشونَه یَه، ولی شمَرا نیجات گَتِه نشونَه یَه و اِم خدا کا اَ.

²⁹ چون اِم ایفتخار شِمَه نَصیب بَیَه کن نِه تاکَه مَسیح ایمان بوعَرَ، بَسکَم چَیرا رنج و عَذاب نی بِکَشَه.

³⁰ شِمَرا نی هَه جَنگِستِه ایی هِستَه، کن بَمن چَی دلَکا ویندِرون و ایسَه کان دَرَستِه کن هَنوزَنی بَیکا ویلاخیستَه ایم.