A Scarta San Pablo D'a Eb' Aj Filipos 3 - Chuj San Sebastian Bible

A tas tz'aj stojlb'i qui nab'en

¹ A ticnec ex wu'tac, ex wanab', tzaljan̈c 'a Cajlil. 'Ay jun tzo'n̈ xo tas 'oj walb't 'ayex. Wach'xam waljnacx 'ayex, palta matz in cus waln 'at 'ayx jun 'ejm xo, yujto yowlal tze wach' 'ojquej 'eli.

² Caw tzeyil wal e b'a 'a jun tzo'n̈ eb' 'anma tu snab'en. Caw maysch'olnil tzyutj sb'a eb', yujto tznib'j eb' tzpol-l jac stz'umal e niwnal. A sb'eyb'al eb' cha, lajn 'icha no tz'i', caw yajb'entac tzyutj sb'a eb'.

³ Palta an̈ec xo, a 'a sat Dios 'ac'b'iln̈ec xo circuncidar 'a yel, yujto tzcalc qui b'a 'a Dios 'a 'esal. An̈j 'a Cristo Jesús 'aj tzon̈ tzaljec. Ax jun tas tzb'o 'a qui niwnalec, matz ca'c 'och xon jac yipc qui c'ojol.

⁴ An xo tic, in najnac, to smoj tzwa'ch jun tzo'n̈ tic yipc in c'ojol, yujto caw yiclum wutjnac in b'a 'a jun tzo'n̈ tic. Tecn 'ay eb' tznani, to smoj tzcolchj eb' yuj jun tzo'n̈ mun tzb'o eb' cha. Palta an tic, yel xo wal caw yiclum wutjnac in b'a 'a jun tzo'n̈ cha.

⁵ Yucb'ixial xo walji, wajx circuncidar, yujto israel in. Yin̈tl in can Benjamín. Hebreo in, yujto hebreo pax in mam in nun. Caw yiclum in 'a smasnil ley yic Moisés, yujto fariseo in paxi.

⁶ Caw wa'jnac 'och in nab'en 'a jun qui cuynb'il chi 'on̈, yuj cha, wa'n 'och syailal eb' yic xo Cristo. C'uxn in yicljnac jantcn̈ej tas tzyal 'a ley yic Moisés, man̈x 'a jac in paltail 'a 'a.

⁷ Smasniln̈ej jun tzo'n̈ xwal tic, caw wach'n̈j in nani. Palta a ticnec, tzin na'a, may jac yel'ch jun tzo'n̈ cha, yujto an̈j 'a Cristo tzwa'ch in nab'en.

⁸ Jantcn̈ej jun tzo'n̈ tas wa'jnac 'och yipc in c'ojol, may jac yel'ch 'a in sat ticnec. Yujto 'ay junx yel xo wach' tzin b'o'o, to tzwojquej 'el Cristo Jesús, atn Cajlilec. Yuj Cristo tic, c'uxn satnc 'el smasnil jun tzo'n̈ wa'jnac 'och yipc in c'ojl cha. Ax ticnec, 'icha c'alem xoj yaj 'a in sat, yujto tzin nib'j tzwique'ej Cristo 'a jun 'ejmn̈ej.

⁹ Junxn̈ej tzin 'ajcn yet'oc. A ticnec, tzyal Dios to wach'n 'a sat, yujn̈ej to tzwa'ch in c'ojl 'a Cristo, man̈ yujoc to tzin yiclj tas tzyal ley yic Moisés. Palta yujn̈ej to tzwa'ch in c'ojl 'a Cristo, tzin 'och wach'l 'a sat Dios.

¹⁰ Tzin nib'ej, tzin wach' 'ojquej 'el Cristo, sec a spoder yic xpitzw paxi, a tzyac' 'ayin. Tzin nib'j lajnn̈ej tzwutj wab'n syal yet'oc. Tzin nib'j 'icha x'aj schami, 'ixta tzin 'aj in cham jun xo.

¹¹ Yujto tzin nib'j 'ay waln wic in pitzw pax 'a scal eb' chamnac.

Ca'c 'ip, sec 'oj qui cha spac quico'

¹² Matz wala, toto tox xwac' ganar jun tzo'n̈ xwal tic. Yujto mant toc caw tz'acn in 'a smasnil. Palta caw an̈ja tzwac' 'ip ticnec, sec toq'ue 'oj in tz'acw 'a smasnil. Yujto a Cristo Jesús, tox in yique'ej.

¹³ Ex wu'tac, ex wanab', tzin na'a, mant toc tz'acn in 'a jun tzo'n̈ chi ticnec. Palta 'oj walb't 'ayex, tas tzwutj in b'a. A ticnec, man̈xtzac in na cot jun tzo'n̈ tas tox 'ix wac' ganar. An̈j jun tzo'n̈ tas 'ayt palta, a tzin na'a. Yuj cha, tzwac' 'ip,

¹⁴ sec wach' 'oj wac' ganar in chan spac, atn in q'uinl 'a jun 'ejmn̈ej. Yuj wal jun tic, tzon̈ yawtnec Dios yico'oc, yujto junxn̈ej tzon̈ 'ajc yet' Cristo Jesús.

¹⁵ An̈ec caw te'n on̈c xo, yowlal 'ixtc tzqui nac junjn on̈ec. Toto 'ayex, man̈ 'ixta'oc tze na'a, 'oj 'och Dios eyet'oc, sec 'oj nachjc 'el pax jun tzo'n̈ xo tic eyu'uj.

¹⁶ Yowlal tzqui b'eylb'ejc jantc tas tz'ajx nachjc 'el cujec yuj Dios.

¹⁷ Ex wu'tac, ex wanab', caw tze b'eylb'ej in b'eyb'al tic. An̈ tic on̈, tox xqui ch'ox jun wach' b'eyb'al eyil on̈. Yuj cha, 'iltec sb'eyb'al eb' lajn sb'eyb'al quet' on̈, sec tze b'eylb'ej pax 'ixta'.

¹⁸ 'Ay jun xo, til wal 'ejm waljnacx 'ayex. Ax yic tzwaln pax 'at 'ayx ticnec, caw tzin 'oq'ui. Yujto til wal eb' caw maysch'olnil tzyutj sb'eyb'al. Wach'xam xcham Cristo sjelc eb' 'a spenc culus, palta yuj sb'eyb'al eb' cha, caw 'ajc'ojl yajch eb' 'a ticnec.

¹⁹ Palta a eb' cha, yowlal 'oj satcn 'el eb' 'a jun 'ejmn̈ej. An̈j tas tznib'j 'och sniwnal eb', an̈j wal ta 'aych snab'en eb', 'icha to sdiosal eb' yaj jun tzo'n̈ cha. 'Ay jun tzo'n̈ tas tzb'o eb', caw q'uixweltac. An̈j yet' jun tzo'n̈ chi tzb'an̈ sb'a eb'. Cojxn jun tzo'n̈ yic yolyib'n̈q'uinl tic tzna eb'.

²⁰ Palta an̈ec xo tic, a 'a satcha'an̈, ata 'ayb't qui nab'enec, yujto a jun cha, atn qui chon̈b'ec. Wan qui tan̈wniec sjapx qui Colmal 'a satchan̈ cha, atn Cajlil Jesucristo.

²¹ A 'oj jelnoc jun qui niwnalec may jac swach'l tic, sec wach' lajn 'oj 'aj yet' jun yico', yujto a jun cha, caw niwn swach'il. 'Ixta 'oj on̈ yutquec yet' spoder, yujto 'ay spoder ya'n mandar smasnil tas.