Yilinga 19 - MUKANDA USANDU WA ZAMBI 1975

¹ Shimbu Apolu te achili ku Korindu, Paulu se hanapalika ndusu mu yifuchi yeswe ya ku tunda, wahetele ku Efwesu, wawanyine amwe tumbaji:

² wambile kuli ayo ngwenyi. Nwatambwile Spiritu Musandu muze nwafulielele, nyi? Ngwo, Ka, kutwevwile chipwe kachi Spiritu Musandu heza.

³ Iye wambile kuli ayo ngwenyi, Ku chuma chika anupapachishile? O ambile ngwo, Ku upapachiso wa Yoano.

⁴ Paulu wambile ngwenyi, Yoano chamwenemwene wapapachishile ni upapachiso wa kulikonyeka, nikwamba kuli atu, akafuliele yoze meza kunyima yenyi, Yesu te.

⁵ O muze evwile chino, aapapachishile mu jina lia Mwene Yesu.

⁶ Muze te Paulu hasayika moko jenyi hali ayo, Spiritu Musandu wejile hali ayo; o ahanjikile mu malimi, nikuprofeteza.

⁷ Malunga eswe apwile ngwe kumi ni aali.

⁸ Iye wanjilile mu sunangonga, wahanjikile ni hamu ha shimbu lia tukweji atatu, nikuhanjika kuli ayo, nikwakununa ha kutwala ku wanangana wa Zambi.

⁹ Alioze muze amwe akalile, kononokene, nikuhanjika chipi ha Jila yino kumeso ja chizavu, wakatukile kuli ayo, wahandunwine tumbaji, nikuhanjika ni atu tangwa ha tangwa mu shikola ya Teranu.

¹⁰ Chino chapwile ha miaka yiali; chocho waze eswe atwamine mu Eshia, evwile liji lia Mwene Yesu, ni A-Yunda ni A-Ngresia.

¹¹ Zambi walingile yipupu yinene ku moko ja Paulu:

¹² chocho achijile ku mujimba wenyi yitambala hanji mapunyu, ayitwalile nikuyisa hali mieji, ni misongo yaakatukile, ni maspiritu api atuhukile muli ayo.

¹³ Mba amwe a kuli A-Yunda, yendanganyi, akwa kutuhwisa mahamba, alianjilile chiyulo kuvuluka hali waze apwile ni maspiritu api jina lia Mwene Yesu, ngwo, Ngunanushingi kuli Yesu yoze anamwambujola kuli Paulu.

¹⁴ Kwapwile amwe malunga shimbiali, ana j a Sevwa, Ka-Yunda, sasendote mukwa lutwe, ano alingile chino.

¹⁵ Alioze Spiritu mupi waakumbulwile, ngwenyi, Yesu ngunamunyingika, hingunevu hali Paulu; alioze yenu aya?

¹⁶ Yoze mutu, muli iye mwapwile Spiritu mupi, watumbukile hali ayo, waakumbile, eswe aali, waahepwishile, chocho ombokele haze lia zuwo tupaza ni uselesele.

¹⁷ Ni waze eswe atwamine mu Efwesu, ni A-Yunda, ni A-Ngresia achinyingikine, ni woma wejile hali ayo eswe, ni jina lia Mwene Yesu liafumanyine.

¹⁸ Anji a kuli waze afulielele, ejile nikushikisa, nikwambulula yitanga yo.

¹⁹ Anji a kuli waze apwile nikulinga tufutafuta, anehene mikanda yo, ayochele kumeso ja eswe; ha kwalula ndando jayo, ajiwanyine makumi atano a tununu twa mbongo ja prata.

²⁰ Chocho ni ndundo liji lia Mwene liafumanyine, liakanganyine.

²¹ Muze yino yuma yamanunukine, Paulu wahalile mu Spiritu kuya ku Yerusaleme, muze hapalika ndusu mu Masendoniya ni mu Akeya, ngwenyi, Kulutwe lia chize changutamba kumona Roma nawa.

²² Iye se watumine ku Masendoniya, aali a kuli waze apwile nikumuvumbika, Timoteu ni Erasetu; iye mwene wasalile shimbu mu Eshia.

²³ Kwapwile ha mwaka uze wene Chizungozungo chinene ha kutwala ku Jila yino.

²⁴ Mumu umwe fuli-prata, jina lienyi, Ndemetriu, yoze watengele tutembele tukepe twa prata, twa Ndiana, wamwesene yilangaji upite wunji;

²⁵ wano eswe iye waakungile, hamwe ni akwa kulinga yuma ngwe yino, wambile ngwenyi, Malunga, nunanyingika ku milimo yino tuli ni upite wetu.

²⁶ Mba nunamono, nunevu ngwe hi ku Efwesu wika ko, alioze ndusu mu Eshia mweswe, chikepe chinasala, yono Paulu hanakununa nikukondolola mbunga yinene ngwenyi, Hi mazambi ko aze akutengewa ku moko ja atu.

²⁷ Utoji uliko, hi hali yetu wika ko, yino milimo yetu mayilelesa, alioze tembele nawa ya Ndiana zambi-wa-pwo munene mapwa wamokomoko; ni yoze akwa Eshia eswe ni akwa yifuchi yeswe ya hashi kakumuwayila, mamuchiza ku ulamba wenyi.

²⁸ O muze evwile chino, azalile tò ni ufwatulo, akololokele ngwo, Ndiana wa kuli A-Efwesu, iye munene.

²⁹ Limbo liazalile tò ni Chizungozungo: o alundumukine ni mbunge yimuwika ku lwaza, nikukoka hamwe no, Ngayu ni Aristako, akwa Masendoniya, ngeji-ni-akwo a Paulu.

³⁰ Muze Paulu azangile kunjila kuli atu, tumbaji kamutayijileko.

³¹ Mba amwe miata nawa, se apwile tusendo twenyi, atumine kuli iye, nikuliumba kuli iye kanda alisela ku utoji mu lwaza.

³² Atu eka ni eka kashika akololokele yuma yimwe yeka ni yeka, ni kukunguluka chazungulukile, ni anji kanyingikine chikuma chize akungaminyine.

³³ O asenyesene kulutwe Alezandre hakachi ka mbunga, A-Yunda nikumushinjika kulutwe. Alezandre walahwile ni kwoko lienyi, wafupile kulisambisa kuli atu.

³⁴ Alioze muze asele chinyingi ngwo, Iye Ka-Yunda, eswe ni liji limuwika ngwe ola jiali akololokele ngwo, Ndiana wa kuli A-Efwesu iye munene.

³⁵ Muze te mukwa kusonyeka wa limbo hatulwisa mbunga, yamba ngwenyi, Yenu malunga A-Efwesu, mutu muka kanyingikine ngwenyi, Limbo lia A-Efwesu mwe mukwa kufunga tembele ya Ndiana munene, ni kaponya kenyi yoze waholokele mwilu.

³⁶ Yino yuma kashika se niumwe mahasa kulikalayo, Chanutamba kutuluka, kanda nulipupula.

³⁷ Mumu yenu nwanehanga muno malunga ano, hi tuhupi twa matembele ko, hi akwa kushililika zambi yetu ko.

³⁸ Kachi kashika Ndemetriu ni yilangaji hamwe nenyi, chuma chimwe amuli nacho umwe, ngaji kwali, ni manguvulu nawa; akalisume umwe ni mukwo ni mukwo.

³⁹ Alioze kachi munuhula chuma chimwe chikwo, kachi makachipatula mu chikungulwila chinene.

⁴⁰ Se chamwenemwene Utoji tuli nawo, hanji matusuma ha vunda lia musono, chikuma te chakuhi: ha chuma chino kutuchi kuhasa kulisambisa ha Chizungozungo chino.

⁴¹ Muze te hamba yino yuma washikile ni chikungulwila.