Yilinga 18 - MUKANDA USANDU WA ZAMBI 1975

¹ Kulutwe lia yino yuma, Paulu wakatukile Ku Atene, wayile ku Korindu.

² Wawanyine umwe Ka-Yunda, jina lienyi Akwila, mukwa Ponta ku munyachi wenyi, te hakatuka shimbu likepe wika ku Italia, ni mukwo-pwo Prisela; mumu te Kelautiu hahana shimbi A-Yunda eswe akatuke ku Roma: iye walifutwile no;

³ se apwile akwa milimo yimuwika, Watwamine hamwe no, nikulinga; mumu apwile ku milimo yo akwa kutunga mbalaka.

⁴ Iye wahanjikile kuli atu mu sunangonga ha masambata eswe, wakunwine A-Yunda ni A-Ngresia.

⁵ Muze Saila ni Timoteu apalumukine ku Masendoniya, lie liji lialemene Paulu, nikushindakenya chikolo ni mbunge yeswe kuli A-Yunda, ngwenyi, Yesu iye mwe Kristu.

⁶ Alioze se alimikine nikushililika, wakukumwine mazalo jenyi, ngwenyi, Manyinga jenu akapwe ha mitwe ya yenwene; yami ngunasambe: chize ku haliapwila ndo ku miaka munguya kuli akwa mavungu.

⁷ Iye wakatukile kuze, wanjilile mu zuwo lia umwe mutu, jina lienyi Titu Justo, mukwa kuwayila, zuwo lienyi lialihachile ni sunangonga.

⁸ Alioze Krisepu, mukwa kuyula sunangonga, wafulielele Mwene, ni akwa zuwo lienyi eswe; ni anji a kuli A-Korindu, ha kwivwa, yafuliela, yaapapachisa.

⁹ Mwene wambile kuli Paulu ha ufuku mu usolwelo ngwenyi, Kanda ukevwa woma, alioze hanjika, kanda ukahola:

¹⁰ mumu nguli hamwe ni yena, ni mutu niumwe kechi kakukwata mukukulinga chipi: mumu atu anji nguli no mu limbo lino.

¹¹ Iye watwamineko kumi lia tukweji ni tukweji nake, nikulongesa liji lia Zambi hakachi ko.

¹² Alioze muze Ngaliu apwile nguvulu ya Akeya, A-Yunda ni mbunge yimuwika akatukilile Paulu, nikumutwala ku chitwamo cha upatwilo,

¹³ ngwo, Yono kakukununa atu kuwayila Zambi ngwe kuchalitele ni shimbi.

¹⁴ Alioze muze Paulu ambile kupakula kanwa lienyi, Ngaliu wambile kuli A-Yunda ngwenyi, Kachi chamwenemwene chinakapwa chitela chimwe, hanji mulonga wa utanganyanyi, kachi changutamba kulihumikiza ni yenu, A-Yunda.

¹⁵ Alioze se hichapwa yihula ha maliji ni majina ni shimbi ya yenwene, chitalenu yenwene; yami chisolo kusopa yino yuma.

¹⁶ Iye waahumine ku chitwamo cha upatwilo.

¹⁷ O eswe akwachile Sosetene, mukwa kuyula sunangonga, amulambile kulutwe lia chitwamo cha upatwilo, ni Ngaliu kasele mbunge ha nichimwe cha ku yino yuma.

¹⁸ Paulu, se watwamine kulutwe lia chino hindu matangwa anji, washikile ni mandumbu, wendele mu ulungu ku Seria, ni hamwe nenyi Prisela ni Akwila; Paulu te wakambile mutwe wenyi mu Senekwea, mumu chilakenyo wapwile nacho.

¹⁹ Iye wahetele ku Efwesu, waahichikileko: alioze iye mwene wanjilile mu sunangonga nikuhanjika kuli A-Yunda.

²⁰ Muze amulembele, atwame no shimbu, katayileko:

²¹ alioze washikile no, ngwenyi, Changutamba kuhichika yuma yeswe ngukapwe ku chiwanyino chize muchizaho ku Yerusaleme; alioze kumungukahiluka kuli yenu kachi Zambi mapala, iye wakatukile ku Efwesu nikwenda mu ulungu.

²² Muze te haheta ku Sesarea, yakanduka, yameneka chikungulwila, yapalumuka ku Andiakia.

²³ Muze hatwamako shimbu, wakatukile, wayile ndusu mu chifuchi cha Ngalashia ni Fwijia, limbo ni limbo, nikutakamisa tumbaji.

²⁴ Achi, umwe Ka-Yunda, jina lienyi Apolu, mukwa Alezandre ku munyachi wenyi, mukwa kulongoloka, wahetele ku Efwesu; iye mukwa tachi mu yisoneko.

²⁵ Yono wafumbiwile mu jila ya Mwene; iye se wazangumioka mu Spiritu, wahanjikile, nikulongesa pundu yuma ya kutwala kuli Yesu, alioze kananyingika wika upapachiso wa Yoano:

²⁶ iye waputukile kuhanjika ni hamu mu sunangonga. Alioze muze Akwila ni Prisela amuvwile, amutwalile hamwe no, washindunwine kuli iye pundu nawa jila ya Zambi.

²⁷ Muze ahalile kuya ku Akeya, mandumbu amukwashile, asonekene kuli tumbaji akamutambule. Muze aheteleko, wakwashile chikolo waze te ku vumbi afulielele.

²⁸ Mumu wakumikine chikolo A-Yunda, ni chize kumeso ja atu eswe, nikulweza ku Yisoneko Yesu iye mwe Kristu.