Yilinga 11 - MUKANDA USANDU WA ZAMBI 1975

¹ Achi, apostolo ni mandumbu waze apwile mu Yundeya evwile ngwo, Akwa mavungu nawa hatambula Liji lia Zambi.

² Mba muze te Petulu hakanduka ku Yerusaleme, waze a ku ungalami amuhangulwile.

³ Ngwo, Yena waliendelele ni yilima, walile hamwe no.

⁴ Alioze Petulu waputukile kulumbununa chikuma kuli ayo, nikuchilulika ngwenyi,

⁵ Napwile mu limbo lia Yopa, nikulemba: ngwe mu tulo namwene usolwelo, chimwe chikwachilo chahulumukine, ngwe hina linene, kanachisunwisa ku mbango jiwana mwilu; chejile ndo kuli yami.

⁶ Muze te hinahulikilaho meso jami, natalile, namwene tushitu a hashi, ni ngongo, ni tututu, ni tujila a mwilu.

⁷ Nevwile nawa liji, ngwo, Katuka, Petulu: shiha, ulie.

⁸ Alioze nambile ngwami, Ka, hi chocho ko, Mwene; mumu chuma chimwe chipi hanji cha luchisa kuchanjilile mu kanwa liami nilimwe tangwa.

⁹ Alioze liji liangukumbulwile chisuho chamuchiali mwilu ngwo, Chize hanapemesa Zambi, kanda uchivuluka ngwe, Chipi.

¹⁰ Chino chapwile katatu: ni cheka nawa yeswe yasosewele mwilu;

¹¹ kumanyi, haze hene malunga atatu amanyine kulutwe lia zuwo muze twapwile, akutumiwa hali yami ku Sesarea.

¹² Spiritu wangwambile nguye hamwe no, nikuyambashana nichimwe. Wano mandumbu asambano nawa avile hamwe ni yami, twanjilile mu zuwo lia yono lunga.

¹³ Iye watwambulwilile ngwe amwene mungelo, nikumana mu zuwo lienyi, ngwenyi, Tuma ku Yopa, Ukasake Semone, jina lienyi likwo, Petulu;

¹⁴ iye kumakakwaha maliji akulilamwina no, yena ni akwa zuwo lie eswe.

¹⁵ Shimbu naputukile kuhanjika, Spiritu Musandu wejile hali ayo, chizechene ngwe hali yetu ha uputukilo.

¹⁶ Mba newulukile liji lia Mwene, ngwe ambile ngwenyi, Yoano chamwenemwene wapapachishile mu meya; alioze kumakanupapachisa muli Spiritu Musandu.

¹⁷ Nyi Zambi waahele chawana chimuwika watuhele yetu nawa, muze twafulielele Mwene Yesu Kristu, mba yami iya munguhasa kukanda Zambi?

¹⁸ O muze evwile yino yuma, aholele kulungunga, achichimiekene Zambi, ngwo, Kashika Zambi hanahana kuli akwa mavungu nawa kulikonyekena akatambule mwono.

¹⁹ Achi, waze amwanganyine ha luyinda yoze wapwile mumu hali Eshetevau, apalikile ndusu mu chifuchi ndo ku Fwenishia, ni Saipulu, ni Andiakia, kahanjikile liji kuli hiumwe shina kuli A-Yunda wika.

²⁰ Alioze apwile amwe a kuli ayo, malunga a ku Saipuru ni a ku Sairene, muze ahetele ku Andiakia, ahanjikile kuli A-Ngresia nawa, nikwambujola sango lipema lia Mwene Yesu Kristu.

²¹ Kwoko lia Mwene liapwile hamwe no: anji afulielele, atewulukilile kuli Mwehe.

²² Ni liji lia kutwala kuli ayo liahetele ku matwi ja chikungulwila chize chapwile ku Yerusaleme; o atumine Mbarnavwe akaye ndo ku Andiakia.

²³ Iye, muze ahetele, ha kumona vumbi lia Zambi, wawahililile; waashinjile eswe hanga ni mbunge yeswe alalaminye kuli Mwene.

²⁴ Mumu wapwile mutu mupema, wazalile tò ni Spiritu Musandu ni Ufulielo, ni mbunga yinene aliwezele kuli Mwene.

²⁵ Iye wayile ku Tarsu mukufupa Saulu;

²⁶ muze te hamuwana, wamutwalile ku Andiakia. Mba ha mwaka wa muwundu akungulukile hamwe ni akwa chikungulwila, nikulongesa mbunga yinene; ni ku Andiakia hatangu alukile tumbaji ngwo, Akwa Kristu.

²⁷ Achi, ha matangwa ano aprofeta akatukile ku Yerusaleme nikupalumuka ku Andiakia.

²⁸ Mba umwe wa kuli ayo, jina lienyi Angavu, yakatuka, yalweza ku tachi ja Spiritu ngwenyi, Mukukapwa kapunga munene mu yifuchi yeswe ya hashi; mwenawo wapwile ha matangwa ja Kelautiu Sesare.

²⁹ Ni tumbaji aliselele, mutu ni mutu nikulita ni upite wenyi, kutumisa kuli mandumbu waze atwamine mu Yundeya yimwe ya kulikwasa nayo:

³⁰ chize nawa achilingile, nikuyitumisa kuli makulwana ku moko ja Mbarnavwe ni Saulu.