Online Bible

Yôhan 9 - Bunong

ឞ្រាសយេឆូ ជានឞាសទូហ្វេឞូនុយ្សចែសមាត់

¹ នោកឞ្រាសយេឆូ ហាន់រ៝ៈត្រ៝ង ពាង់ឆៃទូហ្វេឞូក្លោចែសមាត់នតើមឞើសនទុលមែ។

² មពោលអ៝សម៝នអោបឞ្រាសយេឆូ ៖ “អើនើមនតី ឞើសតាៈនាវតីសអីនៃ ទឹងពាង់ចែសមាត់នតើមឞើសនទុលមែកើតនៃ? តាៈឞើសពាង់នើមជានតីស មោលាសតាៈឞើសមេៈឞឹពាង់ជានតីស?”

³ ឞ្រាសយេឆូ អើស៖ “មោអោសតាៈឞើសនាវតីសពាង់នើម មោដ៝ង់នាវតីសមេៈឞឹពាង់។ ពាង់ចែសមាត់យ៝រលាសកោរាញឞ្រាសអុចអ៝ន់ឞូឆៃនាវទើយពាង់នើមតាឞូនុយ្សអីនៃ។

⁴ អ្យាត់មាឞ៝ន់ហោមជានការមាកោរាញឞ្រាសនើមតើមញជ្វាល់គ៝ប់វាច់ នោកត្រោកហោមអាង។ មាង់ឞើយត៝ត់ ជេសរីលាសត្រោកលែៈមាង់មោហោមអោសគែសឞូនុយ្សទើយជានការ។

⁵ នោកគ៝ប់ហោមគុតានែសនតូអ្យា គ៝ប់តឹមឞានមានាវអាងមាទឹងលែៈឞូនុយ្សតានែសនតូអ្យា”។

⁶ ជេសឞ្រាសយេឆូ ងើយកើតនៃ ពាង់ឆ៝សទាកទីវតានែស លាយទាកទីវអីនៃមានែស ហឹងតាមាត់ឞូនុយ្សចែសនៃ។

⁷ ជេសរីឞ្រាសយេឆូ ដាៈពាង់៖ “ហាន់ហ៝ម់ ហាន់រាពោសមាត់មៃនៃតាទាកងលៅឆីល៝ម រី” - រាឞ្លាងងើយលាស«ឆីល៝ម »នៃ «ឞូដាៈហាន់» ជេងទាកងលៅអីឞូជាន។ ឞូនុយ្សចែសមាត់នៃហាន់រាពោសរ៝ ជេសរីមាត់ពាង់ឆៃអាង ពាង់ឆឹតឞើសរី។

⁸ ផូងច្យៅមែង នទ្រែលមាផូងវៃឆៃពាង់គុទាន់ព្រាក់ឞូអាល៝រនើស ខាន់ពាង់តឹមលាស៖ “ឞូក្លោអីនៃបាសគុទាន់ឞូអាល៝រនើស?”

⁹ គែសឞូនុយ្សអាបាៈលាស៖ “ពាង់អីនៃរ៝”។ ឞូនុយ្សអាបាៈជឹតលាស៖ “មោ មោទីពាង់អោស ពាង់តឹមត្រុបមាត់ទើម”។ យើនមាពាង់នើមអីតាៈចែសមាត់នៃលាស៖ “គ៝ប់យា”។

¹⁰ ឞូអោបពាង់៖ “មើមទឹងអាងមាត់មៃអីនៃនើស?”

¹¹ ពាង់មឞើសមាឞូ៖ “គែសទូហ្វេឞូនុយ្សរាញាយេឆូ ពាង់ឆ៝ៈទាកឞ៝ក់ហឹងតាមាត់គ៝ប់ ជេសរីដាៈគ៝ប់ហាន់រាពោសតាទាកងលៅឆីល៝ម ។ គ៝ប់ហាន់រាពោស មាត់គ៝ប់ឆៃអាងរ៝”។

¹² ឞូអោបឞូនុយ្សចែសមាត់នៃ៖ “អាសពាង់អាបៃ?” ឞូនុយ្សចែសមាត់នៃអើស៖ “គឹតអែស!”

ផូង ផារីឆី អោបជែកឞូនុយ្សចែសមាត់នៃនើស

¹³ ជេសរីឞូលែវឞូនុយ្សអីតាៈចែសមាត់អីនៃហាន់តាផូងផារីឆី ។

¹⁴ នោកឞ្រាសយេឆូ លាយទាកទីវពាង់នើមមានែស នទ្រែលមាជានអ៝ន់មាត់ឞូនុយ្សឆៃអាងនៃនើសជេងតានារឆាបាត់ អីនាររាលូផូងអីឆ្រាអែល ‌

¹⁵ កើតនទ្រីទឹងផូងផារីឆី អោបឞូនុយ្សតាៈចែសមាត់អីនៃ៖ “មើមទឹងអាងមាត់មៃនៃនើស?” ឞូនុយ្សចែសមាត់នៃមឞើសមាផូងផារីឆី ៖ “ពាង់ឆ៝ៈទាកឞ៝ក់ហឹងតាមាត់គ៝ប់ ជេសរីគ៝ប់រាពោស មាត់គ៝ប់ឆៃអាងរ៝”។

¹⁶ ផូងផារីឆី អាបាៈតឹមលាសនទ្រាង់ខាន់ពាង់៖ “ឞូនុយ្សអីនៃមោគែសអោសលោសតាៈឞើសកោរាញឞ្រាស យ៝រលាសពាង់មោជានតឹងនាវវៃតានារឆាបាត់ អីនាររាលូ”។ អាបាៈជឹតលាស៖ “លាសឞូនុយ្សតីស មើមទឹងពាង់ទើយជាននាវខ្លៃកើតនអា?” ជេសរីខាន់ពាង់ជេងតឹមងខាសមពោល។

¹⁷ ជេសរីខាន់ពាង់អោបតៃឞូនុយ្សអីតាៈចែសមាត់នៃជឹត៖ “លាសនទ្រីអាសមៃ ពាង់អីតើមជានមាត់មៃឆៃអាងនៃ ឞូម៝សមៃលាសមេស?” ឞូនុយ្សចែសមាត់នៃអើស៖ “ពាង់ឞូនុយ្សនតើយ្សនាវងើយកោរាញឞ្រាស”។

¹⁸ យើនមាមពោលកោរាញផូងអីឆ្រាអែល អេហ៝ៈអ្យាត់អោសលាសឞូនុយ្សអីនៃឞើសនតើមនើសពាង់ចែស អាបៃអ្យាលែៈឆៃអាង ខាន់ពាង់ក្វាល់អីមេៈឞឹពាង់ប៝ត់។

¹⁹ ឞ្រោៈត៝ត់តានៃ ខាន់ពាង់អោប៖ “ឞូនុយ្សអ្យាក៝នខាន់អៃមៃងាន់? ខាន់អៃមៃលាសពាង់ចែសមាត់នតើមឞើសនទុលមែ អាបៃអ្យាមើមទឹងមាត់ពាង់ជេងអាង?”

²⁰ មេៈឞឹពាង់អើស៖ “ពាង់ក៝នហេនងាន់ ហេនលែៈគឹតនហេលពាង់ចែសមាត់នតើមឞើសនទុលមែងាន់ដ៝ង់‌

²¹ យើនមាឞើសតាៈមាត់ពាង់ទឹងឆៃអាងហេនមោគឹតអោស។ ឞូម៝សជានអ៝ន់មាត់ពាង់ឆៃអាងនៃ ហេនមោគឹតដ៝ង់។ ខាន់មៃអោបអេងឆាក់ពាង់នើមតានៃ ពាង់លែៈក្វ៝ង់ លែៈឞ្លាវមឞើសងក៝ចអេងឆាក់ពាង់នើម”។

²² ទឹងមេៈឞឹពាង់ងើយកើតនៃ ខាន់ពាង់ក្លាចមពោលកោរាញផូងអីឆ្រាអែល យ៝រលាសមពោលកោរាញផូងអីឆ្រាអែល លែៈតឹមទីនាវ លាសឞូម៝សកើបឞ្រាសយេឆូ ជេងឞ្រាសក្រីស ឞូមព្រើសលើយអ៝ន់លោសឞើសនតុកញីសរាបុនផូងអីឆ្រាអែល ខាន់ពាង់នើម។

²³ កើតនទ្រីទឹងមេៈឞឹពាង់លាស៖ “ខាន់មៃអោបអេងឆាក់ពាង់នើមតានៃអែស យ៝រលាសពាង់លែៈក្វ៝ង់”។

²⁴ ជេសរីឞូក្វាល់តៃឞូនុយ្សតាៈចែសមាត់នៃអោបតៃទូតឹជឹត ឞូលាសពាង់៖ “ហេនដាៈមៃងើយនាវងាន់ហ៝ម់តានាប់មាត់កោរាញឞ្រាស! ហេនលែៈគឹតជេសឞូនុយ្សអីនៃ ពាង់ឞូនុយ្សជានតីសងាន់”។

²⁵ ឞូនុយ្សអីតាៈចែសមាត់នៃអើសមាខាន់ពាង់៖ “គ៝ប់មោគឹតអោសពាង់ឞូនុយ្សជានតីស មោលាសមោ។ យើនមាគ៝ប់គឹតឆាក់គ៝ប់នើម ឞើសនតើមនើសមាត់គ៝ប់ចែស អាបៃអ្យាមាត់គ៝ប់លែៈឆៃអាង”។

²⁶ ខាន់ពាង់អោបតៃពាង់៖ “លាសនទ្រីមើមពាង់ជានអ៝ន់មាត់មៃឆៃអាងនៃនើសមេស? មាៈនទើពាង់ជានមេស?”

²⁷ ឞូនុយ្សចែសមាត់នៃអើស៖ “គ៝ប់លែៈជេសងក៝ចមាខាន់មៃ តីសមាខាន់មៃមោអុចអ្យាត់អោស។ អាបៃអ្យាមើមទឹងខាន់មៃអុចដាៈគ៝ប់ងក៝ចតៃទូតឹជឹត? ខាន់មៃអុចជានអ៝សម៝នពាង់ដ៝ង់បាស?”

²⁸ ខាន់ពាង់មឺចរាម៝តអោឞាល់៖ “មៃអីលាសអ៝សម៝នពាង់ ហេនអ្យាអ៝សម៝នចែមោឆេ ។

²⁹ ហេនគឹតកោរាញឞ្រាសលែៈងើយមាមោឆេ ងាន់ យើនមាឞូនុយ្សអីនៃហេនមោគឹតអោស ឞើសតាៈនាវទើយពាង់!”

³⁰ ឞូនុយ្សអីតាៈចែសមាត់អីនៃលាស៖ “គ៝ប់មោវ៝ត់អោសខាន់មៃលាសមោគឹតឞើសតាៈនាវទើយពាង់ យើនមាពាង់លែៈជានអ៝ន់មាត់គ៝ប់ឆៃអាង។

³¹ ឞ៝ន់លែៈគឹត លាសឞូនុយ្សជានតីស កោរាញឞ្រាសមោអ្យាត់អោស។ ឞូនុយ្សឞ្លាវក្លាចយើកមាពាង់ នទ្រែលមាជានតឹងនាវពាង់អុចមើពាង់អ្យាត់។

³² នតើមឞើសកោរាញឞ្រាសរាហាក់ញជេងនែសនតូ អេហ៝ៈព្រ៝តតាង់គែសឞូនុយ្សឞ្លាវជានឞូនុយ្សចែសមាត់ឞើសនទុលមែអ៝ន់ឆៃអាង។

³³ លាសឞូនុយ្សអីនៃមោគែសលោសតាៈឞើសកោរាញឞ្រាស ពាង់មោអោសទើយជាននទើកើតនៃ”។

³⁴ ឞូលាសមាពាង់៖ “មៃជេងឞូនុយ្សជានតីសហោងាន់ឞើសនទុលមែ មើមមៃឞាញ់នតីលាសមាហេន!” ជេសរីឞូមព្រើសអោឞាល់លោសអាទីស។

³⁵ ឞ្រាសយេឆូ តាង់ឞូមព្រើសឞូនុយ្សអីតាៈចែសមាត់នៃនើសលោសអាទីស ជេសរីឞ្រាសយេឆូ ជ៝យម៝ប់ពាង់ អោប៖ “អាសមៃញឆីងដ៝ង់មាក៝នឞូនុយ្សអីតាៈឞើសកោរាញឞ្រាស?”

³⁶ ពាង់អើស៖ “អើកោរាញ អាសពាង់អីរីមេស ឆើមមឞើសអ៝ន់គ៝ប់ គ៝ប់ឞែមាញឆីងមាពាង់”។

³⁷ ឞ្រាសយេឆូ លាស៖ “មៃលែៈឆៃពាង់ ពាង់អ្យាហែសអីលែៈតឹមងើយមាមៃអាបៃអ្យា”។

³⁸ ឞូនុយ្សចែសមាត់នៃលាសមាឞ្រាសយេឆូ ៖ “អើកោរាញ គ៝ប់ញឆីងមាមៃ”។ ជេសរីឞូនុយ្សចែសមាត់នៃយើកមឞាសឞ្រាសយេឆូ តានៃរ៝។

³⁹ ឞ្រាសយេឆូ លាស៖ “គ៝ប់វាច់តានែសនតូអ្យា គៃមាផាតទោយ្សទឹងលែៈឞូនុយ្ស ជេសរីអ៝ន់ឞូនុយ្សចែសមាត់ជេងឆៃអាង នអ៝ប់មាញហើមាឞូនុយ្សអីកើបអេងមាត់ខាន់ពាង់នើមឆៃអាង ខាន់ពាង់បេងមាចែស យ៝រលាសឞូនុយ្សគឹតនាល់កោរាញឞ្រាសងាន់តឹមឞានមាឆៃអាង”។

⁴⁰ ផូងផារីឆី អីគុនទ្រែលឞ្រាសយេឆូ តានៃ តាង់ពាង់លាសកើតនៃ ជេសរីអោបពាង់៖ “លាសនទ្រីមៃក្វាល់ហេនអ្យាឞូនុយ្សចែសមាត់បាស?”

⁴¹ ឞ្រាសយេឆូ លាសមាខាន់ពាង់៖ “លាសខាន់មៃឞូនុយ្សចែសមាត់ងាន់តានាវមឹន មោគឹតវ៝ត់នាវកោរាញឞ្រាស ខាន់មៃមោអោសគែសទោយ្ស តីសមាខាន់មៃកើបអេងមាត់ខាន់មៃឆៃអាងលែៈគឹតវ៝ត់នាវកោរាញឞ្រាស យើនមាមោអោសរ៝មគ៝ប់ កើតនទ្រីទោយ្សហោមក្រេបមរ៝តាខាន់មៃ”។

Wycliffe Bible Translators, Inc.