Online Bible

Markôs 10 - Bunong

នាវតឹមនត្លើយអូរឆាយ
( មថ ១៩:១-១២ ; លក ១៦:១៨ )

¹ ជេសរីឞ្រាសយេឆូ លោសឞើសប៝ននៃ ហាន់ជឹតឞ្រីយូដា មពែសឞើសកាល់តីទាករាលាយយោរដាន់ ជេងមពែសឞើសលោសនារ។ ផូងប៝នលានលែវឞាល់រានអាឞ្រាសយេឆូ ទូតឹជឹត ជេសរីពាង់នតុមនតីតៃតឹងមានាវវៃពាង់។

² គែសផូងផារីឆី អាបាៈហាន់លាប់គុទាច់អុចអោបរាល៝ងពាង់ ជេសរីខាន់ពាង់អោបពាង់៖ “ហើយនើមនតី! អាសតឹងមានាវវៃផូងឞ៝ន់ ឆាយទើយនត្លើយអូរដ៝ង់ឞើស?”

³ ពាង់អើសលាស៖ “នទ្រីមើមមោឆេ ដាៈខាន់មៃតានាវវៃពាង់?”

⁴ ខាន់ពាង់អើស៖ “មោឆេ ញចីសលាស អ៝ន់អីឆាយជានឆ៝ម់បុតនាវតឹមនត្លើយ ជេសរីទើយមព្រើសអីអូរពាង់នើម”។

⁵ ជេសរីឞ្រាសយេឆូ លាសមាខាន់ពាង់៖ “អាចមាខាន់មៃទាង់ក៝ហោអីរ ទឹងមោឆេ ញចីសនាវវៃកើតនៃ។

⁶ ឞើសនតើមកាល់អែ កោរាញឞ្រាសទែញជេងទឹងលែៈតានែសនតូអ្យា ពាង់ញជេងឞូនុយ្សដ៝ង់ គែសឞូក្លោគែសឞូអូរ។

⁷ មោឆេ ញចីស៖ «នទ្រីទឹងគែសឞូក្លោលោសទូឞើសមេៈឞឹ [ហាន់គុអាអូរ]‌

⁸ ជេសរីឞារហៃខាន់ពាង់ជេងអូរឆាយជេងទូរាង្លៃឆាក់»។ នទ្រីខាន់ពាង់មោហោមអោសជេងឞារហៃតៃ លែៈជេងទូរាង្លៃឆាក់ទើម។

⁹ លាសនទ្រីឞារហៃអូរឆាយអីកោរាញឞ្រាសទែរាង្លាប់នៃលើយអ៝ន់អោសឞូនុយ្សតឹមងខាស”។

¹⁰ ជេសរីត៝ត់ឆឹតគុតាទូមល៝ម់ជៃ មពោលអ៝សម៝នអោបឞ្រាសយេឆូ មានាវអីនៃទូតឹជឹត។

¹¹ ពាង់លាសមាខាន់ពាង់៖ “ឞូម៝សនត្លើយអូរ ជេសរីឆ៝ៈតៃអូរអេងជឹត ឞូក្លោអីនៃជេងឞូនុយ្សល៝ម់អូរ។

¹² លាសឞូអូរអីលែៈនត្លើយឆាយ ជេសរីឆ៝ៈឆាយអេងជឹត ឞូអូរអីនៃជេងឞូនុយ្សល៝ម់ឆាយ”។

ឞ្រាសយេឆូ អ៝ន់នាវគែសជេងមាក៝នឆែ
( មថ ១៩:១៣-១៥ ; លក ១៨:១៥-១៧ )

¹³ គែសទូនាររីឞូលែវក៝នឆែជេៈៗ ដាៈឞ្រាសយេឆូ ពាសអ៝ន់នាវគែសជេងមាក៝នឆែអីនៃ តីសមាមពោលអ៝សម៝នលាសឞ្វៃខាន់ពាង់។

¹⁴ ឞ្រាសយេឆូ នូយ្សមឞូ ត៝ត់ឆៃកើតនៃ ពាង់លាស៖ “អ៝ន់ផូងក៝នឆែវាច់តាគ៝ប់ លើយអោសឞ្វៃខាន់ពាង់ យ៝រលាសខាន់ពាង់មោអោសនហាវអេងឆាក់ខាន់ពាង់នើម យើនមាញឆីងមាមេៈឞឹហោងាន់។ ឞូនុយ្សអីកោរាញឞ្រាសអុចម៝ត់អ្វាញ់ ខាន់ពាង់គែសកើតនទ្រីដ៝ង់។

¹⁵ គ៝ប់លាសនហេលនានេៈងាន់មាខាន់អៃមៃ ឞូម៝សមោរ៝មនាវកោរាញឞ្រាសម៝ត់អ្វាញ់តឹមឞានមាក៝នឆែជេៈរ៝ម ឞូនុយ្សអីនៃកោរាញឞ្រាសមោរ៝មដ៝ង់ មោអ៝ន់ពាង់លាប់តានាវកោរាញឞ្រាសនើមម៝ត់អ្វាញ់ដ៝ង់”។

¹⁶ ជេសរីឞ្រាសយេឆូ ពឺអូតមពោលក៝នឆែនៃ នហ៝មាមឞើសឆើមតេៈតីអ៝ន់នាវគែសជេងមាខាន់ពាង់ដ៝ង់។

ទូហ្វេឞូក្លោនទ្រ៝ង់អុចគែសនាវរេសនហ៝រ៝
( មថ ១៩:១៦-៣០ ; លក ១៨:១៨-៣០ )

¹⁷ ជេសរីឞ្រាសយេឆូ នទ្រាប់មាលោសឞើសនៃហាន់រ៝ៈត្រ៝ង គែសទូហ្វេឞូក្លោញច្វាត់រានត៝ត់តានៃ ច៝នកោម៝ក់ឞើសនាប់ពាង់ នហ៝មាអោបលាស៖ “ហើយនើមនតីអ្វែស មើមគ៝ប់ជានមេស គៃមាគែសនាវរេសនហ៝រ៝?”

¹⁸ ឞ្រាសយេឆូ អើសលាស៖ “មើមទឹងមៃក្វាល់គ៝ប់«អ្វែស»កើតនៃមេស? មោគែសអោសទូហ្វេឞូនុយ្សអ្វែស គែសទូហ្វេកោរាញឞ្រាសទើមអ្វែស។

¹⁹ មៃលែៈគឹតជេសតានាវវៃផូងឞ៝ន់លាស៖ «លើយងខឹតឞូ លើយល៝ម់អូរល៝ម់ឆាយ លើយនតុង លើយងើយញចើត លើយមរោសគៃមាឆ៝ៈទ្រាប់នទើឞូ ជេសរីយើកមាមេៈឞឹហ៝ៈ»”។

²⁰ ឞូក្លោអីនៃអើសមាពាង់៖ “ហើយនើមនតី! ទឹងលែៈនាវអីនៃគ៝ប់លែៈញអោតនតើមឞើសជេៈងាន់”។

²¹ ជេសតាង់ពាង់អើសកើតនទ្រី ឞ្រាសយេឆូ អ្វាញ់ជឹតពាង់នៃ រ៝ង់មាឞូក្លោនៃ ឞ្រាសយេឆូ ងើយលាស៖ “ហោមទូនតីលមៃមោហ៝ៈជាន តាច់លែៈទ្រាប់នទើមៃ ពាៈអ៝ន់មាមពោលអ៝អាច រីមើមៃគែសនទើខ្លៃតាប៝នអ្វែសតាកាលើ។ ជេសរីហាន់តឹងគ៝ប់”។

²² ជេសឞូក្លោនៃតាង់លាសកើតនៃ មុសមាត់ពាង់ឆើសរាអើយ្ស ជេសរីព្លឹឆឹត នូយ្សនហ៝ម់ពាង់រាវៃញហ្វាចហោងាន់ យ៝រមាទុតអ៝ក់ទ្រាប់នទើពាង់។

²³ ឞ្រាសយេឆូ អ្វាញ់ជុមពាង់នើម ជេសរីលាសមាមពោលអ៝សម៝នពាង់៖ “ជេរងាន់មាឞូនុយ្សនទ្រ៝ង់អ៝ន់កោរាញឞ្រាសម៝ត់អ្វាញ់ខាន់ពាង់”។

²⁴ មពោលអ៝សម៝ននទ្រ៝ត់ហីសរាហ៝ល់ហោងាន់មានាវពាង់ងើយអីនៃ។ ជេសរីឞ្រាសយេឆូ លាសមាខាន់ពាង់ជឹត៖ “ហើយអ៝សនោ នាវកោរាញឞ្រាសម៝ត់អ្វាញ់ជេរងាន់លាប់!

²⁵ មាឞូនុយ្សនទ្រ៝ង់លាប់តានាវកោរាញឞ្រាសម៝ត់អ្វាញ់ ជេររាលាវដាសអ៝ន់ឆែសឆាមោលាប់តាត្រោមងលាយ”។

²⁶ មពោលអ៝សម៝ននទ្រ៝ត់ហីសរាហ៝ល់លើហោជឹត ជេសរីអោបនទ្រាង់ខាន់ពាង់នើម៖ “លាសឞូនុយ្សនទ្រ៝ង់លែៈគែសជេរជេសមាអ៝ន់កោរាញឞ្រាសម៝ត់អ្វាញ់ខាន់ពាង់ លាសនទ្រីឞូនុយ្សអាអេងហោមទើយអ៝ន់កោរាញឞ្រាសម៝ត់អ្វាញ់ដ៝ង់មោលាសមោ?”

²⁷ ឞ្រាសយេឆូ ងគឹលអ្វាញ់ជឹតខាន់ពាង់លាស៖ “នាវអ្យាឞូនុយ្សជានមោអោសទើយ យើនមាកោរាញឞ្រាសហោមទើយជាន យ៝រលាសទឹងលែៈនទើពាង់ជានទើយទាទេ”។

²⁸ ពេត្រោស លាសមាឞ្រាសយេឆូ ៖ “លែៈមៃឆៃជេសហេន ហេនលែៈនត្លើយនទ៝សនទើហេននើមលែៈផ្យៅ ហាន់តឹងមៃ”។

²⁹ ឞ្រាសយេឆូ អើសលាស៖ “គ៝ប់លាសនហេលនានេៈងាន់មាខាន់មៃ ឞូម៝សនត្លើយញីសជៃ អ៝សនោ អ៝សនូរ មេៈឞឹ អ៝សក៝ន មោលាសមីរឞា យ៝រមាតឹងគ៝ប់ នទ្រែលមាតឹងនាវមហែមហានអ្វែស‌

³⁰ នទ្រីទឹងកោរាញឞ្រាសងខោមតានាវរេសជេងពាង់អីនៃអាបៃអ្យាអ៝ន់អ៝ក់ងាន់ងេនមាញីសជៃ អ៝សនោ អ៝សនូរ មេៈឞឹ អ៝សក៝ន នទ្រែលមាមីរឞា។ ពាង់ឞូជាននាវក្រីតជេរដ៝ង់ យើនមានារជឹតនាប់តៃពាង់ទើននាវរេសនហ៝រ៝។

³¹ ល៝ង់អ៝ក់ឞូនុយ្សអីឞើសនាប់ព្លាច់ឞើសកើយ ឞូនុយ្សអីឞើសកើយព្លាច់ឞើសនាប់ច្រាវ។ គែសអ៝ក់ឞូនុយ្សតានែសនតូអ្យាឞូគឹតខាន់ពាង់គែសនាវខ្លៃងាន់ យើនមាជឹតនាប់តៃមោគែសអោសនាវខ្លៃ តីសមាគែសអ៝ក់ឞូនុយ្សអេងជឹតតានែសនតូអ្យាឞូគឹតខាន់ពាង់មោគែសអោសនាវខ្លៃ យើនមាតាជឹតនាប់តៃគែសនាវខ្លៃច្រាវ”។

លែៈពែតឹជេស ឞ្រាសយេឆូ មឞើសនាវ ពាង់ ខឹត
( មថ ២០:១៧-១៩ ; លក ១៨:៣១-៣៤ )

³² ឞ្រាសយេឆូ នទ្រែលមាមពោលអ៝សម៝នពាង់ហាន់ហាវជឹតប៝នក្វ៝ង់យេរូឆាលឹម ។ ពាង់ហាន់ឞើសនាប់ឞូ ល៝ង់មពោលអ៝សម៝នរាវៃរោតអោតងាន់ លែៈឞូអីហាន់តឹងឞើសកើយក្លាចដ៝ង់។ ជេសរីឞ្រាសយេឆូ លែវ ១២ នុយ្សមពោលកោរាញអ៝សម៝ននៃហាន់នតុកអេងបាសមាឞូ ងក៝ចមានាវអីគែសត៝ត់មាឆាក់ពាង់នើមតៃ៖

³³ “អាបៃអ្យាឞ៝ន់ហាវជឹតប៝នក្វ៝ង់យេរូឆាលឹម ។ គ៝ប់អ្យាអីក៝នឞូនុយ្សតាៈឞើសកោរាញឞ្រាស ឞូទែញជុនអ៝ន់មាមពោលកោរាញជានឞ្រាស នទ្រែលមាផូងនើមនតីនាវវៃផូងឞ៝ន់។ ជេសរីខាន់ពាង់អីនៃតេៈទោយ្សគ៝ប់ត៝ត់ខឹត ញជុនគ៝ប់មាផូងអីមោទីផូងអីឆ្រាអែល ។

³⁴ លែៈផូងអីនៃគើមងគ្រើសគ៝ប់ ឆ៝សទាកទីវតាគ៝ប់ រាពាត់គ៝ប់មាម៝ង់រាឆែ ជេសរីងខឹតលើយគ៝ប់ យើនមាលោចពែនារឞើសកើយនៃគ៝ប់ទ៝ក់រេសតៃ”។

នាវ យាកើ នទ្រែលមា យោហាន អុចទាន់
( មថ ២០:២០-២៨ )

³⁵ ជេសរីរ៝ៈត្រ៝ងនៃឞារហៃអ៝សនោខាន់ពាង់យាកើ នទ្រែលមាយោហាន អីក៝នឆេបេដេ ទាន់មាឞ្រាសយេឆូ ៖ “ហើយនើមនតី! ទាន់មៃយោៈអ៝ន់តឹងនាវហេនទាន់ដ៝ង់អើ”។

³⁶ ឞ្រាសយេឆូ អោបខាន់ពាង់៖ “ម៝សនទើអុចគ៝ប់ជានអ៝ន់មាខាន់មៃមេស?”

³⁷ ខាន់ពាង់អើសលាស៖ “នោកមៃជេងកាដាច់ម៝ត់អ្វាញ់ឞ្រីកោរាញឞ្រាសតៃ អ៝ន់ហេនគុកេងមៃនើមម៝ត់អ្វាញ់នទ្រែលមៃ ទូហ្វេគុឞើសមា ទូហ្វេគុឞើសច្យៅអើ”។

³⁸ ឞ្រាសយេឆូ អើសនាវនតឹតលាស៖ “ឞារហៃខាន់មៃនៃមោគឹតអោសម៝សនទើទាន់។ នទ្រីខាន់មៃទើយឆ៝ៈទើនញេតនទ្រាញ់ព្លៃយុងយារប៝នតាកាច៝កអីគ៝ប់ឞែទើយដ៝ង់? ខាន់មៃទើយទើនដ៝ង់នាវបាប់តែមអីគ៝ប់ទើនលាសមោ?”

³⁹ ខាន់ពាង់អើស៖ “អើ ហេនទើយឆ៝ៈទើន”។ ឞ្រាសយេឆូ លាស៖ “ខាន់មៃឆ៝ៈទើនញេតនទ្រាញ់ព្លៃយុងយារប៝នតាកាច៝កអីគ៝ប់ញេត នទ្រែលមាទើននាវបាប់តែមអីគ៝ប់ទើនតៃងាន់ដ៝ង់។

⁴⁰ តីសមាអីនាវគុឞើសមាឞើសច្យៅរី គ៝ប់មោអោសទើយរ៝ម យ៝រមានតុកអីនៃលែៈនទ្រាប់អ៝ន់មាឞូនុយ្សអីកោរាញឞ្រាសនើមអុចអ៝ន់ទើម”។

⁴¹ ត៝ត់មាមពោលអ៝សម៝នអីជឹតនុយ្សនៃតាង់លាសកើតនៃ ខាន់ពាង់ជីនូយ្សដាសយាកើ នទ្រែលមាយោហាន ។

⁴² ជេសរីឞ្រាសយេឆូ ក្វាល់លែៈរាងោចមពោលអ៝សម៝នពាង់ ពាង់លាស៖ “ខាន់មៃលែៈគឹតជេសឞូនុយ្សអីជានកាដាច់មាផូងឞូនុយ្សអីមោទីផូងអីឆ្រាអែល ខាន់ពាង់អីនៃទាសអុចជានមាផូងប៝នលានខាន់ពាង់នើម។ គែសដ៝ង់មពោលអីតេសក្វ៝ង់តុនជ៝តផូងប៝នលានខាន់ពាង់នើម។

⁴³ តាមពោលខាន់មៃលើយអោសជានកើតនៃ! តាមពោលខាន់មៃលាសគែសទូហ្វេអុចជានក្វ៝ង់ អ៝ន់ពាង់អីនៃជេងឞូនុយ្សឆើមកើលជានការមាខាន់មៃ។

⁴⁴ លាសគែសទូហ្វេអុចជានក្វ៝ង់រាលាវឞូ អ្យាត់មាពាង់ជានទឹកមាទឹងលែៈឞូនុយ្សអេងប៝ត់‌

⁴⁵ យ៝រមាគ៝ប់អីក៝នឞូនុយ្សតាៈឞើសកោរាញឞ្រាសជុរតានែសនតូអ្យា មោអោសគ៝ប់ដាៈឞូឆើមកើលជានការអ៝ន់មាគ៝ប់។ គ៝ប់ច្រាវឆើមកើលជានការអ៝ន់មាឞូ ជេសរីគ៝ប់ឆើមឆាក់គ៝ប់នើមត៝ត់ខឹតឆាក់ គៃមាច្វាយទឹងលែៈឞូនុយ្ស”។

ឞ្រាសយេឆូ ជានឞាសចែសមាត់ បារតីមេ
( មថ ២០:២៩-៣៤ ; លក ១៨:៣៥-៤៣ )

⁴⁶ ជេសរីឞ្រាសយេឆូ នទ្រែលមាមពោលអ៝សម៝នហាន់ត៝ត់តាប៝នយេរីខោ ។ នោកខាន់ពាង់លោសឞើសប៝នយេរីខោ នៃ ផូងប៝នលានឞ្រោៈនទ្រែលទ្រឺម។ គែសដ៝ង់ទូហ្វេឞូក្លោចែសមាត់ រាញាបារតីមេ អីក៝នតីមេ គុក៝ប់ទាន់ព្រាក់ឞូតាមែងត្រ៝ងរី។

⁴⁷ ត៝ត់ពាង់តាង់ឞូលាស៖ “យេឆូ ប៝ននាឆារែត ឞ្រោៈត៝ត់តាអ្យា” ពាង់នតែរលាស៖ “ហើយកោរាញយេឆូ អីក៝នឆៅកាដាច់ដាវីត ! ទាន់យោៈនអាចមាគ៝ប់បាៈអើ!”

⁴⁸ អ៝ក់ឞូនុយ្សលាសពាង់គុរាក្លាក់ហ៝ៈលើយហោមនតែរ យើនមាពាង់នតែរលើមានតែសៗលាស៖ “ហើយក៝នឆៅកាដាច់ដាវីត ! ទាន់យោៈនអាចមាគ៝ប់បាៈអើ!”

⁴⁹ ជេសរីឞ្រាសយេឆូ ញឆ្រុងព្លឹលាស៖ “ដាៈពាង់ហាន់អាអ្យា”។ ជេសរីឞូដាៈឞូនុយ្សចែសមាត់នៃលាស៖ “លើយហោមរាវៃ ទ៝ក់ហ៝ម់ ពាង់ក្វាល់មៃហើយ”។

⁵⁰ ឞូនុយ្សចែសមាត់អីនៃមអារ់ច្រ៝ប់អាវក្វ៝ង់ ទ៝ក់ដើបហាន់រានទឺសអាឞ្រាសយេឆូ រី។

⁵¹ ជេសរីឞ្រាសយេឆូ អោបពាង់៖ “ម៝សនទើអុចគ៝ប់ជានអ៝ន់មាមៃមេស?” ឞូនុយ្សចែសមាត់អីនៃអើសលាស៖ “ហើយនើមនតី! ដាៈមៃជានត្រោមមាត់គ៝ប់អ៝ន់ឆៃអាងអើ”។

⁵² ឞ្រាសយេឆូ លាសមាពាង់៖ “មៃហាន់ឆឹតអ៝ន់អ្វែសលាង់យឹ! នាវមៃញឆីងមាគ៝ប់លែៈជានឞាសមៃជេស!” ទោមាអ្វាញ់ឆៃអាងរ៝ នហ៝មាហាន់តឹងឞ្រាសយេឆូ ។

Wycliffe Bible Translators, Inc.