Ndrom Samƀŭt bơh Ôsê 2 - Nau Brah Ndu Ngơi 2023

¹ “Kuăl hom ma oh nâu khân may jêng Ammi jêh ri ma oh ruh khân may jêng Ruhama.”

Nau tâm rmal jêh ri njêng tay phung Israel

² “Phong hom ma mê̆ khân may, Phong hom yorlah păng mâu di ôh jêng ur Gâp, Gâp mâu ôh jêng sai păng! Đă păng mƀăr lơi nau văng tĭr klơ măt păng Jêh ri têl nau văng tĭr ta nklang toh păng.

³ Tơlah mâu, Gâp mra doh lơi rhôk păng, Ăn păng nâm bu nar mhe luh bơh ndŭl mê̆, Njêng păng jêng bri rdah, Jêng ntŭk neh kro, Ăn păng mra khĭt ji hir.

⁴ Gâp mâu mra yô̆ nđach kon sau păng ôh Yorlah khân păng jêng phung kon sau văng tĭr.

⁵ Ngăn yơh, mê̆ khân păng văng tĭr, Bunuyh ntreo ma khân păng hŏ ƀư jêh nau prêng. Yorlah păng lah: ‘Gâp mra hăn tĭng phung rŏng gâp; Khân păng mra ăn ƀănh, dak, rsau biăp, brai mhay, Dak ngi jêh ri ndơ nhêt.’

⁶ Yor nây, Gâp mra sŏk pôm lok nchăng trong păng, Ndâk du mlâm mpêr jŭm păng Ăn păng mâu dơi saơ trong hăn ôh.

⁷ Păng mra hăn tĭng phung rŏng păng ƀiălah mâu ban, Joi ƀiălah mâu mâp khân păng. Rnôk nây, păng lah êng: ‘Gâp mra plơ̆ sĭt ma sai saơm, Yorlah nôk nây gâp jêng ueh lơn ma aƀaơ aơ.’

⁸ Nanê̆ ngăn păng mâu gĭt ôh Gâp yơh, Nơm hŏ ăn jêh ba ƀlê, ndrănh mhe jêh ri dak ngi ma păng, Gâp yơh hŏ ăn ma păng âk prăk, mah Ƀiălah khân păng djôt dŏng ăn ma brah Baal.

⁹ Yor ri, tâm yan rek Gâp mra sŏk sĭt tay ba ƀlê Gâp, Tât yan ndrănh, Gâp mra sŏk ndrănh mhe; Gâp mra sŏk lơi bok răm jêh ri brai mhay Gâp, Prăp dŏng gay nkŭm săk rhôk păng.

¹⁰ Rnôk nây Gâp mra tâm mpơl nau bêk prêng păng Tanăp măt phung rŏng păng, Jêh ri mâu geh bunuyh dơi tâm rklaih păng bơh ti Gâp.

¹¹ Gâp mra ƀư dŭt lơi lĕ rngôch nau răm maak păng, Lĕ nar ƀŭn, nar khay mhe, Nar saƀat jêh ri lĕ rngôch nar rƀŭn toyh păng nal jêh.

¹² Gâp mra ƀư rai lĕ tơm krăk ƀâu jêh ri tơm rvi păng, Jêng lĕ tơm si păng tâm mpơl pô aơ: ‘Aơ jêng prăk nkhôm Phung rŏng ăn jêh ma gâp.’ Gâp mra njêng khân păng jêng bri rngol Ăn lĕ mpô mpa bri sa rvăn păng.

¹³ Gâp mra tâm rmal păng Yorlah tâm lĕ nar păng nhhơr ndơ ƀâu kah ma brah Baal, Văn mblo tôr jêh ri nkrơ̆ ndơ khlay, Hăn tĭng phung tĭr păng, Bi gâp păng chuêl jêh!” Brah Yêhôva lah pônây.

¹⁴ “Yor ri, aơ, Gâp mra nkơnh ndơm păng, Leo păng lăp bri rdah, Sŏk nau ngơi rdơ̆ rmên ngơi ma păng.

¹⁵ Tă bơh ntŭk nây, Gâp mra ăn ma păng đang krăk ƀâu, Njêng rlŭng Akôr mra jêng mpông nau kâp gân. Ta nây, păng mra plơ̆ lah nâm bu tâm nar mom ndăm, Nâm bu tâm nar păng luh tă bơh n'gor bri Êjipt.”

¹⁶ Brah Yêhôva lah: “Tâm nar nây, Ay mra kuăl Gâp jêng ‘sai gâp’ Jêh ri mâu mra kuăl Gâp jêng ‘kôranh gâp’ đŏng ôh.

¹⁷ Yorlah Gâp mra ăn păng hă trôm mbung kuăl phung brah Baal, Jêh ri bu mâu mra hôm nkah tât đŏng ôh amoh khân păng.

¹⁸ Tâm nar nây, Gâp mra ƀư nau tâm rnglăp ta nklang khân may Đah lĕ mpô mpa bri, sĭm klơ trôk, Đah lĕ mpa vơr ta neh. Gâp mra nkê̆ch pă lơi na, tak đao Jêh ri ƀư nau tâm lơh du luh bơh n'gor aơ, Gay khân may dơi gŭ mpăn.

¹⁹ Gâp mra nđăp ay đah Gâp n'ho ro; Gâp mra nđăp ay đah Gâp tâm nau di jêh ri sŏng, Nau ueh jêh ri nau yô̆ nđach.

²⁰ Di yơh, Gâp mra nđăp ay đah Gâp tâm nau răp jăp; Jêh ri ay mra gĭt Brah Yêhôva.”

²¹ Brah Yêhôva lah: “Tâm nar nây Gâp mra plơ̆ lah, Gâp mra plơ̆ lah ma lĕ ndâr trôk, Lĕ ndâr trôk mra plơ̆ lah ma neh ntu.

²² Neh ntu mra plơ̆ lah ma ba ƀlê, Ndrănh mhe, jêh ri dak ngi; Lĕ rngôch pe ntil nây mra plơ̆ lah ma Jesrêel.

²³ Gâp mra tăm păng ăn ma Gâp tâm neh ntu Mpơl nau yô̆ nđach ‘phung mâu geh nau yô̆ nđach.’ Jêh ri lah ma phung ƀon lan ‘mâu di ƀon lan Gâp’ pô aơ: ‘Ay jêng ƀon lan Gâp’, Jêh ri ƀon lan nây mra plơ̆ lah: ‘May jêng Brah Ndu hên.’”