Maseli 2 - Bibilia Tapu

PENE II - 2

Ko tei rauka te kite tikai ra e riro i te akono i te Atua.

¹ E TAKU tamaiti, kia āriki mai koe i taku nei tuatua, e kia vaio marie i taku au akauenga ia koe;

² Kia ariu mai koe i to taringa ki te pakari, e kia kimi marie to ngakau i te kite ra;

³ Kia kapiki nui koe i te kite, e kia akateitei i to reo kia rauka te kite ra;

⁴ Kia kimi pu tikai koe iaia mei te ario ra, e kia makitoro marie koe iaia, mei te apinga uunaia ra:

⁵ Ei reira koe e kite ei i te mataku ia Iehova, e e rauka ia koe te kite i te Atua.

⁶ Ko Iehova oki tei oronga mai i te pakari: no roto i tona vaa te kite e te karape.

⁷ Te vaoo ua ra aia i te ora no te aronga tiratiratu; e paruru aia no te aronga aerenga apa kore ra.

⁸ Ko tei tapapa i te au mataara o te tuatua-tau ra, te tiaki ra oki aia i te aerenga o tona ra aronga tapu.

⁹ Ei reira koe e kite ei i te tuatua-tika e te tuatua-tau, e te tiratiratu; te au mataara memeitaki katoa ra.

¹⁰ Kia o mai te pakari ki roto i to ngakau na, e kia riro te kite ei mea mataora i to vaerua ra;

¹¹ Na te akono meitaki e tapapa ia koe i reira; e na te kite e tiaki ia koe;

¹² Kia ora koe i te arataa o te tangata kino ra, i te tangata e tuatua i te tuatua akatoatoa ra;

¹³ Ko tei akaruke i te arataa tiratiratu ra, e kua na te ara poiri te aere;

¹⁴ Ko tei rekareka i te rave anga i te kino, e kua navenave i te akatoatoa anga a te tangata kino;

¹⁵ Ko tei māro i to ratou au aerenga, e te mingi ra to ratou arataa:

¹⁶ Kia ora oki koe i te vaine ke ra, i te akaturi, nana te tuatua taparu;

¹⁷ Ko tei akatitima i te tiaki iaia i tona ou anga ra, e kua ngaropoina iaia te koreromotu a tona ra Atua.

¹⁸ Te eke ra oki tona are ki raro i te mate; e tona au arataa ki raro i te au turuma.

¹⁹ Kare rava tei aere ki ona ra e oki mai, kare takiri e tae ki te ara ora.

²⁰ E tenana, e na te ara o te tangata memeitaki te aere, e akono marie i te ara o te aronga tuatua-tika ra.

²¹ Na te aronga tiratiratu oki e noo i te enua, e te aronga apa kore te ka akatinamouia ki reira;

²² Ka tipu keia ra te aronga kino i te enua nei, e te aronga rave ara ra, ka kiriti tumuia ïa.