Luka 2 - Bibilia Tapu

PENE II - 2

No te ingoa e tataia, i anau ei a Iesu i Betelehema: te au angela, e tu au tiaki mamoe: te peritome angaia o te Tamaiti: ko Simeona, e ko Ana: ko Iesu i rotopu i te au orometua.

¹ E I TAUA tuatau ra, kua tuku mairā Kaisara Auguso i te tuatua e, e akaope i taua enua ra i te tataia.

² (Ko te tata anga muatangana teia ka tutaraʼi a Kurenio i Suria.)

³ E ope takiri rava akera te tangata i te aere ki to ratou uaorai oire kia tataia.

⁴ Aere katoa aturā Iosepha mei roto atu i te oire i Nazareta i Galilea ra, ki te oire no Davida, ki Iudea, i tuatuaia ra e ko Betelehema; (no te mea, no te uanga aia e no te kopu-tangata o Davida:)

⁵ Kia tata katoaia raua ko Maria te vaine i momokoia nana ra, e kua nui aia.

⁶ E i to raua noo anga i reira, ope rava akera ona puke rā e anau ei aia ra.

⁷ Kua anau iora aia i tana tama mua, vaî atura i te kakau, tuku atura ki roto i te are puakatoro, no te mea kare akera raua i o ki te are tapae anga.

⁸ E aronga tiaki mamoe tei taua enua ra, e tika ki roto i te au koro, i te tiaki anga i ta ratou anana i te po.

⁹ E i na, kua tu maira tetai angela a te Atu ki vaitatao ia ratou, kua kako rava iora ratou i te mārama, i te kakā o te Atu: e maata rava akera to ratou mataku.

¹⁰ Kua tuatua maira te angela kia ratou, Eiaa e mataku: i na oki, e tuatua meitaki taku e taoi mai kia kotou na, ka riro ïa ei rekareka maata no te tangata ravarai.

¹¹ I nakonei oki i anau ei te Ora no kotou i te oire o Davida, koia oki te Mesia ra ko te Atu.

¹² E teia ta kotou akairo; e kite kotou i taua tamaiti ra i te vai ua anga ki roto i te are puakatoro, kua vaîia ki te kakau.

¹³ E i reira ra, i kapitiia maira taua angela ra e tetai urupu maata no te rangi, i te akameitaki anga i te Atua, e te na ko anga,

¹⁴ Kia akakakāia te Atua i runga i te rangi teitei, e ei au to to teianei ao, e kia kite aroaia mai te tangata nei.

¹⁵ E kia oki atura taua au angela ra ki runga i te rangi ra, kia vaio atu taua au tiaki mamoe ra, kua tuatua iora ratou tetai ki tetai, E taki aere tatou ki Betelehema, e akara i taua mea ra, i ta te Atua i akakite mai kia tatou nei.

¹⁶ Aere viviki atura ratou, e kite atura ia Maria raua ko Iosepha, e te tamaiti i te vai ua anga ki roto i te are puakatoro.

¹⁷ E kite atura ratou, akakite aere atura i te tuatua no taua tamaiti ra i tuatuaia mai kia ratou ra.

¹⁸ E te aronga i akarongo ra, umere anake atura i te au mea ta te au tiaki mamoe i akakite atu kia ratou ra.

¹⁹ Karekā Maria, tavaitai iora i taua au tuatua ra, e akaeatu akera i roto i tona ngakau.

²⁰ Oki atura taua au tiaki mamoe ra, i te akakakā anga, e te akameitaki anga i te Atua, i te au mea ta ratou i akarongo e ta ratou i kite, tei tuatuaia mai kia ratou ra.

²¹ E tae akera ki te po varu i peritomeiaʼi taua tamaiti ra, tapa iora ratou iaia ko Iesu, te ingoa ta te angela i tapa mai ou tona metua vaine i to ei iaia ra.

²² E ope akera te au rā tamā anga nona, i akonoia i roto i te ture a Mose ra, apai atura raua iaia ki Ierusalema, tuku atura iaia ki mua i te aroaro o te Atu ra;

²³ (Mei tei tataia oki i te ture a te Atu ra e, “Ko te au tama mua ravarai, kua tapu ïa no te Atu;”)

²⁴ E e apai atu oki i te atinga i tuatuaia i te ture a te Atu, “E rua kukupa, e kare ra, e rua punua rupe.”

²⁵ E i na, tei Ierusalema tetai tangata ko Simeona te ingoa; e tangata akono i te Atua, e te tuatua-tika, te tapapa ra i te akapumaana no Iseraela: tei runga oki iaia te Vaerua Tapu.

²⁶ Kua akakite takereia ana aia e te Vaerua Tapu, kare aia e mate vave, kia kite ra aia i te Mesia a te Atu ra.

²⁷ E i aratakiia aia e te Vaerua ki roto i te iero: te apai maira nga metua i te tamaiti ra ia Iesu ki roto, e rave i ta te ture iaia ra;

²⁸ Kua rave akera aia iaia ra, kua ikiiki iora, e akameitaki atura i te Atua, na ko atura,

²⁹ E taku Atu e, e tuku koe i toou tavini i teianei ma te au, kua tau oki i taau tuatua;

³⁰ Kua kite akenei oki toku mata i te Ora naau,

³¹ I akonoia e koe ki mua i te mata o te tangata katoa nei;

³² Ei turama, ei akamārama mai i te au etene, e ei kakā oki no toou iti-tangata no Iseraela.

³³ E umere rava aturā Iosepha raua ko te metua vaine i te au tuatua nona i tuatuaia ra.

³⁴ Kua akaora aturā Simeona ia raua, na ko atura kia Maria i tona metua vaine, I na, kua tukuia teia tamaiti nei, ei mea e ingaʼi, e e tu akaou ei, to Iseraela e manganui; e ei akairo, ei tauetono anga;

³⁵ (E ka puta mama rava katoa oki toou uaorai ngakau mei te puta koke ra,) kia kitea te manako o te ngakau e manganui.

³⁶ E tetai peroveta vaine ra ko Ana, e tamaine na Phanuela, no te kopu o Asera: kua ruaine roa aia, e itu ona mataiti i te noo anga raua ko te tane tana i akaipoipo i te paretenia anga ra:

³⁷ Kua takaua ra aia, ka varu akera ngauru anga tona mataiti e a ara, kare rava aia i akaruke i te iero, e tika ra i te akamori anga i te Atua, ma te pure e te akakoreanga kai i te po e te ao.

³⁸ E koia i tomo mai ki roto i reira, akapaapaa atura i te Atu, e kua tuatua iora iaia i te aronga katoa i tapapa i te ora i Ierusalema ra.

³⁹ E oti akera ia raua tei tuatuaia mai i roto i te ture a te Atu ra, oki atura raua ki Galilea, ki to raua uaorai oire tikai i Nazareta.

⁴⁰ Tupu atura taua tamaiti ra, e maroiroi atura te ngakau, ki atura oki i te pakari: e tei iaia oki te meitaki o te Atua.

⁴¹ E aere rai nga metua nona ra ki Ierusalema, ki te oroa o te Pasa ra, kare e mataiti i tukua.

⁴² E tae akera ki te ngauru ma rua o tona mataiti, aere atura ratou ki Ierusalema i te akonoanga o taua oroa ra.

⁴³ E ope akera taua puke rā ra, ooki maira raua, noo atura te tamaiti ko Iesu i muri i Ierusalema; kare uā Iosepha ma tona metua vaine i kite.

⁴⁴ Aere maira raua e po tai maira i te aerenga, manako akera raua tei roto aia i te aerenga tangata ra; kimi atura raua iaia i roto i to raua uaorai kopu-tangata, e i te au tangata tupu ra.

⁴⁵ E kare rava akera aia i kitea, ooki atura raua ki Ierusalema i te kimi anga iaia.

⁴⁶ E po toru akera, kite atura raua iaia ki roto i te iero, te noo ra i rotopu i te au orometua, te akarongo atura e te ui atura kia ratou.

⁴⁷ Umere anake iora te aronga katoa i akarongo iaia ra i tona kite e tana tuatua.

⁴⁸ E kite atura raua iaia, poitirere atura raua: kua karanga atura tona metua vaine kiaia, E tama, eaa koe i pera mai ei kia maua? i na, i kimi ua ana au ma toou metua tane ia koe ma te aue.

⁴⁹ Kua tuatua maira aia kia raua, Eaa korua i kimi ei iaku? kare korua i kite e, ei roto rai au i te are o taku Metua e tau ei?

⁵⁰ Kare akera raua i kite i te tuatua tana i tuatua mai kia raua.

⁵¹ E oki maira aia e ko raua katoa ki Nazareta, akarongo atura ia raua: vaio marie iora tona metua vaine i taua au mea katoa ra i roto i tona uaorai ngakau.

⁵² Tupu aturā Iesu i te maata anga e te pakari, e te akaperepereia mai e te Atua e te tangata katoa.