Levitiku 4 - Bibilia Tapu

PENE IV - 4

Te atinga akonoia no te ara kitea kore kia apaiia ra.

¹ KUA tuatua mairā Iehova kia Mose, na ko maira,

² E tuatua ana koe ki te tamariki a Iseraela, e na ko atu, Kua ara tetai tangata i te kite kore i te au akaueanga katoa a Iehova ra, kua rave i te au mea kare e tika kia rave ra;

³ Ko te taunga i akamainuia ra tei rave i te ara, e kua araia te au tangata iaia; e apai mai aia i tetai puakatoro ou kino kore kia Iehova, ei tarangaara i tana ara i raveia e ia ra.

⁴ E taki aia i taua puakatoro ra ki te ngutupa o te Are uipaanga ki mua i te aroaro o Iehova; e tuku oki aia i tona rima ki runga i te mimiti o taua puakatoro ra, e ka taia taua puakatoro ra ki mua i te aroaro o Iehova.

⁵ E na taua taunga i akamainuia ra e rave i tetai manga toto no taua puakatoro ra, ka apai ei ki roto i te Are uipaanga ra:

⁶ E na te taunga e tutou i tona maikao-rima ki roto i taua toto ra, ka pîpî ei i te toto, e kia taki itu pîpî anga, ki mua atu nei i te paruru i te ngai-tapu, ki mua i te aroaro o Iehova ra.

⁷ E tuku oki te taunga i tetai manga i taua toto ra ki mua i te aroaro o Iehova, ki rungao i nga tara o te atarau apinga kakara, i roto i te Are uipaanga ra; kareka te toto katoatoa o taua puakatoro ra, ka riringi aia i te reira ki te tumu o te atarau atinga karakaratio, i te ngutupa o te Are uipaanga ra.

⁸ Te tongaua katoa no taua puakatoro tarangaara ra e kiriti katoaia ïa, te tongaua ki rungao i te ngakau, e te tongaua katoa no runga i te au mea i roto ra,

⁹ E nga pukuatu ra, e te tongaua ki rungao, i te îo kaokao ra, e te ekaeka i rungao i te ate; ka kiritiia ïa, e nga pukuatu katoa ra;

¹⁰ Mei tei te puakatoro atinga au i kiritiia ra; e na te taunga e taʼu i te reira ki runga i te atarau atinga karakaratio ra.

¹¹ Kareka te kiri o taua puakatoro ra, e te kiko katoa, e te mimiti, e nga vaevae, e te ngakau, e te repo,

¹² Taua puakatoro katoa ra oki, e apaiia ïa ki vao mai i te puakapa i te ngai viivii kore ra, i te riringianga reu ra, ka taʼu ei ki te ai i rungao i te vaie: ei te ngai e riringiiaʼi i te reu ra ka taʼuaʼi.

¹³ E kua araia te uipaanga tamariki a Iseraela katoa ra i te kite kore, e kare te uipaanga ra i kite, e kua rave i tetai mea i akakoreia i te au akaueanga katoa a Iehova, e kua ara;

¹⁴ Kia kitea ra taua ara i raveia e ratou ra, ei reira te uipaanga e apai ei i tetai puakatoro ou ei tarangaara, e na ratou e taki ki mua i te Are uipaanga ra.

¹⁵ E na te aronga pakari o te uipaanga e tuku i to ratou rima ki runga i te mimiti o taua puakatoro ra, ki mua i te aroaro o Iehova: e ka taia taua puakatoro ra ki mua i te aroaro o Iehova.

¹⁶ E na te taunga i akamainuia ra e apai i tetai manga toto no taua puakatoro ra ki roto i te Are uipaanga:

¹⁷ E ka tutou te taunga i tona maikao-rima ki roto i taua toto ra, ka pîpî ei, e kia taki itu pîpî anga, ki mua atu nei i te paruru, ki mua i te aroaro o Iehova.

¹⁸ E tuku oki aia i tetai manga i taua toto ra ki rungao i te au tara o te atarau i mua i te aroaro o Iehova, i roto i te Are uipaanga ra, ka riringi ei i te toto katoatoa i te tumu o te atarau atinga karakaratio, i te ngutupa o te Are uipaanga ra.

¹⁹ Ei reira aia e rave ei i te matu katoa nona ra, ka taʼu ei ki runga i te atarau ra.

²⁰ Kia okotai rai tu ko tana e rave i taua puakatoro ra, e tana i rave i te puakatoro tarangaara ra, e akapera katoa aia i teia: na te taunga e apai i te tapokiangaara na ratou, e ka akakoreia ta ratou ara.

²¹ E ka apaiia taua puakatoro ra ki vao mai i te puakapa, e ka taʼuia mei tei muatangana ra puakatoro i taʼuia ra: ko te tarangaara teia na te uipaanga.

²² Kia araia tetai tutara i te kite kore, e kua rave i te mea e kore e tika ki te au akaueanga katoa a tona Atua ra a Iehova kia rave, e kua ara:

²³ Kia kite ra aia i taua ara i raveia e ia ra; ei reira aia e apai mai ei i te atinga nana, ei puakanio, ei toa kino kore ra.

²⁴ E tuku oki aia i tona rima ki runga i te mimiti o taua puakanio ra, e ka taia te reira i te ngai ta ratou e ta i te atinga karakaratio ki mua i te aroaro o Iehova ra; e tarangaara oki te reira.

²⁵ E rave oki te taunga i tetai manga i te toto o taua tarangaara ra ki runga i tona maikao-rima, ka tuku ei ki rungao i nga tara i nga tara i taua atarau atinga karakaratio, ka riringi ei i te toto kite tumu o te atarau atinga karakaratio ra.

²⁶ E taʼu oki aia i te tongaua katoa ki runga i te atarau, mei te tongaua o te atinga au e taʼuia ra: na te taunga e apai i te tapokiangaara nana i tana ara, e ka akakoreia tana ara.

²⁷ E kua araia tetai o te au tangata rikiriki ra i te kite kore, e kua rave i tetai mea i akakoreia i te au akaueanga katoa a Iehova e kua ara;

²⁸ Kia kite ra aia i taua ara i raveia e ia ra; ei reira aia e apai mai ei te atinga nana, ei puakanio, ei i ua kino kore, no taua ara i raveia e ia ra.

²⁹ E tuku oki aia i tona rima ki runga i te mimiti o taua tarangaara ra, e ka taia taua tarangaara ra i te ngai i taiaʼi te atinga karakaratio ra.

³⁰ E rave oki te taunga i tetai manga i taua toto ra ki runga i tona maikao-rima, ka tuku ei ki rungao i nga tara o te atarau atinga karakaratio ra, ka riringi ei i te toto katoatoa i te tumu o te atarau.

³¹ E kiriti takiri oki aia i te tongaua katoa, mei te tongaua o te atinga au i kiritiia ra; e na te taunga e taʼu ki runga i te atarau, ei mea aunga kakara na Iehova; e na te taunga e apai i te tapokiangaara nana, e ka akakoreia tana ara.

³² E kia apai mai aia i tetai punua mamoe ei tarangaara, ei ua kino kore tana e apai mai.

³³ E tuku oki aia i tona rima ki runga i te mimiti o taua tarangaara ra, e ka taia ei tarangaara, i te ngai i taiaʼi te atinga karakaratio ra.

³⁴ E rave oki te taunga i tetai manga i te toto o taua tarangaara ra ki runga i tona maikao-rima, ka tuku ei ki rungao i nga tara o te atarau atinga karakaratio ra, ka riringi ei i te toto katoatoa i te tumu o te atarau.

³⁵ E kiriti takiri oki aia i te tongaua katoa, mei te tongaua o te punua mamoe no te atinga au i kiritiia ra; e na te taunga e taʼu ki runga i te atarau, e te au atinga ai katoa a Iehova ra: e na te taunga e apai i te tapokiangaara i tana ara i raveia e ia ra, e ka akakoreia tana ara.