Levitiku 27 - Bibilia Tapu

PENE XXVII - 27

No te tia, e no te ngauru o te apinga, e te mea akatapuia, auraka e oko akaouia ra.

¹ KUA tuatua mairā Iehova kia Mose, na ko maira,

² E karanga atu koe ki te tamariki a Iseraela, e na ko atu kia ratou, Kia tia ua atu te tangata ia Iehova i te tia tangata ra, ei akaaiteite anga e tikaʼi.

³ Tera oki taau mea e aite ra, to te tane ra, mei te mataiti e rua ngauru e tae ua atu ki te ono o te ngauru o tona mataiti, tera taau aite anga, kia rima ngauru sekela ario, i te sekela o te ngai-tupa ra.

⁴ Kareka to te vaine ra, tera taau aite anga, kia toru ïa ngauru i te sekela.

⁵ E to te mataiti rima e tae ua atu ki te rua o te ngauru o tona mataiti, tera taau aite anga, i to te tane, kia rua ngauru sekela, e to te vaine ra, kia okotai ïa ngauru i te sekela.

⁶ Kareka to te marama okotai, e tae ua atu ki te rima o tona mataiti, tera taau aite anga i te reira, i to te tane ra, kia rima ïa sekela ario, e to te vaine ra, tera taau aite anga, kia toru ïa sekela ario.

⁷ E to te mataiti e ono ngauru ra, e ara atu: tera taau aite anga, i to te tane ra, kia okotai ïa ngauru ma rima i te sekela, e to te vaine ra, kia okotai ïa ngauru i te sekela.

⁸ Kia kore ra e tika iaia te reira akaaite anga naau, e akakite aia iaia uaorai ki mua i te aroaro o te taunga, e na te taunga e akaaite i te moni iaia; ko te tika iaia i tei tia ra, ko ta te taunga ïa e akaaite.

⁹ E puaka tei tiaia ra, i tei tika i te tangata kia apai ei atinga na Iehova ra, ko te reira au mea katoa i orongaia mai kia Iehova ra, e tapu anake ïa.

¹⁰ Auraka aia e akatu ke i te reira, auraka e tutakiia, i te mea kino ei tutaki i te mea kino; e tutaki ua atu aia i te puaka ki tetai puaka, ko taua tutaki ra, e tei tutakiia ra, e tapu katoa ïa i reira.

¹¹ E puaka viivii taua puaka ra, tei kore e tika kia apai ei atinga na Iehova, e akakite aia i taua puaka ra ki mua i te aroaro o te taunga ra;

¹² E na te taunga e akaaite i te moni i te reira, i te mea meitaki e te mea kino; ko taau ua, ta te taunga, e akaaite ra, ko te reira rai ïa.

¹³ Kia anoano ra aia i te oko akaou ra, e kapiti mairai aia i tetai tuanga rima ki taua moni i akaaiteia e koe ra.

¹⁴ E kia anoano te tangata i te akatapu i tona are no Iehova kia tapu, na te taunga e akaaite i te moni i taua are ra, i te mea meitaki e te mea kino; ta te taunga e akaaite ra, oti ra ua i reira.

¹⁵ E kia anoano taua tangata i akatapu i taua are ra i te oko akaou, e kapiti mairai aia i tetai tuanga rima, ki taua moni i akaaiteia e koe ra, e nona atura ïa.

¹⁶ E kia anoano te tangata i te akatapu i tetai kotinga i tona kainga ipukarea no Iehova, e akono te reira i taau akaaite anga i te ua i pini ei kia ruruia ra: okotai omera kerite ra, kia rima ïa ngauru i te sekela ario.

¹⁷ Tei te mataiti iubile tana akatapu anga i tona kainga, ko tei akaaiteia e koe ra, oti ra ua i reira.

¹⁸ Kua oti ra te iubile i akatapu ei aia i tona kainga, e akaaite te taunga i te moni kiaia i nga mataiti e toe ra, e tae ua atu ki tetai mataiti iubile ra, ka kiritiia ïa te reira i taua moni i akaaiteia e koe ra.

¹⁹ E kia anoano taua tangata i akatapu i taua kainga ra i te oko akaou, e topiri mairai aia i tetai tuanga rima i taua moni i akaaiteia e koe ra, e nona atura ïa.

²⁰ Kia kore ra aia e oko akaou i taua kainga ra, e kua okoia e ia tei tetai tangata ke, kare rava ïa e oko akaouia i reira.

²¹ Kia tae ra ki te iubile ra, ka taka ke ei taua kainga ra, e tapu ïa no Iehova; e kainga akataka roaia ïa: ka riro ïa ei apinga no te taunga.

²² E kia akatapu te tangata i te kainga okoia e ia no Iehova, kare te kainga ipukarea nona;

²³ Ei reira te taunga e akaaite mai ei kiaia i te moni taau e akatau ra, e tae ua atu ki te mataiti iubile; e ka apai aia i taua moni i akaaiteia e koe ra, ei mea tapu na Iehova i taua rā ra:

²⁴ E kia tae ki te mataiti iubile ra, e oki taua kainga ra ki te tangata i okoia atu ei ra, nona tikai taua kainga tupuna ra.

²⁵ E taau au akaaite anga moni katoa ra, e akono rai ïa i te sekela o te ngai-tapu ra; okotai takau gera ra okotai ïa sekela.

²⁶ To te puaka ra anaunga mua, ko Iehova te pu ra, no te mea e anaunga mua, auraka roa ïa e tangata e akatapu i te reira; i to te puakatoro e te mamoe ra; na Iehova te reira.

²⁷ Kareka te anaunga mua o te puaka viivii ra, e tika iaia kia oko akaou i te reira, kia topiri atu rai aia i tetai tuanga rima i te moni i akaaiteia e koe ra: kia kore ra e oko akaouia ra, e oko uaia ïa i reira i te moni tikai i akaaiteia e koe ra.

²⁸ Kare rava e mea i akataka roaia e te tangata na Iehova ra, i te au mea-katoa nana nei, i te tangata, e te puaka, e te koro a tona kainga ipukarea, e okoia, e e oko akaouia ra: ko te mea roarai i akataka roaia na Iehova ra, e mea tapu roa ïa.

²⁹ Kare rava e oko akaouia te au mea katoa i akataka roaia ra i te tika i te tangata kia akataka ra; ka mate tikai ra te reira.

³⁰ E te tuanga ngauru katoa o te enua, to te ua o te enua, e te kai no te au rakau ra, na Iehova ïa kua akatapuia na Iehova.

³¹ E kia anoano te tangata i te oko akaou i tana tuanga ngauru; ka topiri mairai aia i tetai tuanga rima i te moni e tau ki te reira.

³² E te tuanga ngauru no te puakatoro, e no te mamoe ra, e te au mea katoa i tatauia ra, e tapu te tuanga ngauru na Iehova.

³³ Auraka aia e akara i te meitaki anga e te kino anga, auraka oki aia e tutaki: e kia tutaki aia ra, ko taua tutaki ra e tei tutakiia ra, e tapu kare katoa ïa; e oko akaouia.

³⁴ Ko te au akauenga teia ta Iehova i akaue mai kia Mose, i te tamariki a Iseraela, i vaitata i te maunga ra ko Sinai.