Levitiku 2 - Bibilia Tapu

PENE II - 2

No te atinga kai e te popo, kia apaiia ra.

¹ KIA anoano te tangata i te apai i te atinga kai kia Iehova ra, ei faraoa pueu tana atinga; e riringi oki aia i te inu ki rungao, e ka tuku aia i te tapou kakara ki rungao.

² E ka apai aia i te reira ki te aronga taunga ra, ki te au tamariki a Aarona ra: e e rave aia i tetai manga faraoa e kia ki tona rima, e tetai manga inu, e te tapou kakara auraka kia toe; ka taʼu ei te taunga i te reira ki runga i te atarau ei manakoanga, e atinga ai ïa, ei mea aunga kakara na Iehova.

³ E te toenga o taua atinga kai ra, na Aarona ïa e tana au tamariki: e mea tapu roa ïa no te au atinga ai a Iehova ra.

⁴ E kia apai koe i te atinga kai i keuia i te umu ra, ei areto faraoa pueu akaopue koreia, i irokia ki te inu, e kare ra, ei uefa akaopue kore i tainuia ra.

⁵ E e atinga kai tunu uaia ki runga i te auri taau atinga, ei faraoa pueu akaopue koreia, i irokia ki te inu.

⁶ E vavaʼi koe i te reira, ka riringi ei i te inu ki rungao: e atinga kai oki te reira.

⁷ E e atinga kai tunu faraipaneia taau atinga, ei faraoa pueu ïa, e te inu.

⁸ E ka apai koe i te atinga kai i peraia te rave kia Iehova ra, ka tuku ei ki te taunga ra, e nana e apai ki te atarau ra.

⁹ E ka rave te taunga i tetai vaʼi i taua atinga kai ra ei manakoanga, ka taʼu ei ki runga i te atarau; e atinga ai ïa, ei mea aunga kakara na Iehova.

¹⁰ E te toenga o te atinga kai ra, na Aarona ïa e tana au tamariki: e mea tapu roa ïa no te au atinga ai na Iehova ra.

¹¹ Auraka roa ei akaopue i to te au atinga kai ravarai ta kotou e apai kia Iehova ra: auraka rava oki kotou e taʼu i te akaopue, e te meli, ei atinga ai na Iehova.

¹² Kareka te atinga popo ra, e tika ia kotou kia apai i te reira na Iehova; kare ra te reira e taʼuia ki runga i te atarau ei mea aunga kakara.

¹³ E akataitai katoa i te au atinga kai ravarai naau; auraka roa koe e akangere i taau au atinga kai i te tai o te koreromotu a to Atua ra: ei tai rai taau e apai i taau au atinga ravarai.

¹⁴ E kia apai koe i te atinga kai popo na Iehova ra, ei kaui sitona i tamarōia i te pae ai, ei sitona meitaki i mirimiriia, taau e apai ei atinga kai popo naau ra.

¹⁵ E tuku oki koe i te inu ki rungao, e te tapou kakara katoa: e atinga kai oki te reira.

¹⁶ E ka taʼu te taunga i tetai vaʼi i taua sitona i mirimiriia ra ei manakoanga, e tetai manga inu, e te tapou kakara auraka kia toe: e atinga ai ïa na Iehova.