Ioane 3 - Bibilia Tapu

PENE III - 3

Ko Nikodemo: no te anau akaou anga: no te ovi i akateiteiia: to te Atua aroa maata: ta Ioane bapetizo tuatua iaia uaorai, e to Iesu tupu anga i te maata.

¹ TE noo ra tetai tangata, no te au Pharisea, ko Nikodemo te ingoa, e tutara no te Ngati Iuda:

² Ko tei aere mai i te po kia Iesu ra, e kua tuatua maira kiaia, E Rabi, kua kite matou e, e Orometua koe mei ko mai i te Atua ra: kare oki teianei au akairo taau e rave nei e tika i te tangata, auraka te Atua katoa ra.

³ Kua karanga aturā Iesu, na ko atura kiaia, Tika, tika tikai taku e karanga atu kia koe, Kia kore te tangata e anau akaou ra, kare aia e kite i te basileia o te Atua ra.

⁴ Kua tuatua mairā Nikodemo kiaia, Eaa ua te tangata metua e anau ei? ka o akaou ainei ki roto i te kopu o tona metua vaine, ka anau mai ei?

⁵ Kua karanga aturā Iesu, Tika, tika tikai taku e karanga atu kia koe, Kia kore te tangata e anau ki te vai, e te Vaerua, kare aia e o i te basileia o te Atua.

⁶ Ko ta te kopapa e anau nei, e kopapa ïa; ta te Vaerua e anau ra, e vaerua ïa.

⁷ Eiaa koe e poitirere ua, ko au i karanga atu kia koe e, Kia anau akaou kotou e tikaʼi.

⁸ Te arara ua nei te matangi i tana ngai e anoano ra, te kite ra koe i tona aruru, kare ra koe i kite i te ngai no reira mai aia ra, e te ngai e aereia atu e ia ra: koia tika oki te tangata katoa ta te Vaerua e anau ra.

⁹ Kua tuatua mairā Nikodemo kiaia, na ko maira, Eaa ïa au mea e tikaʼi?

¹⁰ Kua karanga aturā Iesu, na ko atura kiaia, Ko te Orometua koe a to Iseraela, e kare koe i kite i teianei tuatua?

¹¹ Tika, tika tikai taku e karanga atu kia koe, Ko ta matou i kite ra, ta matou ïa e tuatua nei, e ta matou i akara ra, ta matou ïa e akakite nei; kare ra kotou e āriki mai i ta matou tuatua.

¹² I tuatua na au kia kotou i te tuatua no teianei ao, e kare kotou i akarongo, eaa ua kotou e akarongo ei kia akakite atu au kia kotou i te tuatua o te rangi?

¹³ Kare rava e tangata i tae ki runga i te rangi, mari ra ko tei aere mai ki raro mei runga mai i te rangi ra, ko te Tamaiti a te tangata i runga i te rangi ra.

¹⁴ Mei ia Mose i akateitei i te ovi i te medebara ra, koia katoa te Tamaiti a te tangata ra, kia akateitei katoaia e tikaʼi:

¹⁵ Kia kore e mate te akarongo iaia, kia rauka ra te ora mutu kore.

¹⁶ I aroa mai te Atua i to te ao nei, kua tae rava ki te oronga anga mai i tana Tamaiti anau tai, kia kore e mate te akarongo iaia, kia rauka ra te ora mutu kore.

¹⁷ Kare oki te Atua i tono mai i tana Tamaiti ki te ao nei e akaapa mai i to te ao, kia ora ra to te ao iaia.

¹⁸ Te akarongo iaia ra, kare aia e akaapaia: te kore e akarongo ra, kua akaapa takereia na ïa, i te mea, kare aia i akarongo i te ingoa o te Tamaiti anau tai a te Atua ra.

¹⁹ Teia taua akaapa ra, ko te mārama kua tae mai ki te ao nei, e i anoano akenei te tangata i te poiri, kare te mārama, no te mea te kino ua ra ta ratou tuatua.

²⁰ Ko te rave i te kino ra, kua makitakita anake ïa ki te mārama, kare oki e aere mai ki te mārama, ko te kitea aea tana tuatua.

²¹ Ko te akono i te tuatua-mou ra, ka tae mai ïa ki te mārama kia kitea meitakiia e, te tau ra tana tuatua ki te Atua.

²² E muri akera, aere aturā Iesu ma tana au pipi ki te enua ko Iudea, noo atura i reira ma ratou katoa, e bapetizo iora i te tangata.

²³ Te bapetizo katoa ra oki a Ioane i Aino, i vaitata ua i Salima, no te mea e manganui to reira vai: e kua aere maira te tangata, e bapetizoia iora.

²⁴ Kare rā Ioane e uriia ki roto i te are tapekaanga.

²⁵ Kua taumāro iora te au pipi a Ioane e te ngati Iuda i te tamā anga.

²⁶ Aere atura ratou ki a Ioane ra, e kua karanga atura kiaia, E Rabi, te tangati i noo korua i te pae i Ioridana ra, ko taau i akakite ra, i na, te bapetizo ua ra aia, e te aere ua maira te tangata katoatoa kiaia.

²⁷ Kua tuatua mairā Ioane, na ko maira, Kare o te tangata mana e rauka, mari ra ko tei orongaia mai no te rangi ra.

²⁸ Ko kotou uaorai tei kite iaku, e kua tuatua au e, Kare au i te Mesia, i tonokia mai au e na mua iaia.

²⁹ Ko te tane ou ra, te tangata ïa nana te vaine; ko te oa ra o taua tane ou ra, ko te noo ua i te pae i te akarongo anga kiaia ra, e rekareka maata tona i te reo o te tane ou ra: e teianei kua tika rava toku rekareka anga.

³⁰ Ka tupu aia i te maata anga, ka oki ra au i te mea ngiti anga.

³¹ Ko te aere mai mei runga ra, ko tei maata ïa; ko to te one ra, no te one ïa, e no te one tana tuatua: ko to runga mai i te rangi ra, ko tei maata ïa.

³² Ko tana i akara ra, ko tana i akarongo ra, ko tana rai e tuatua nei; kare ra e tangata e āriki mai i tana tuatua.

³³ Ko tei āriki mai i tana tuatua, kua tuatua pu ïa e, e tuatua-mou ta te Atua.

³⁴ Ko ta te Atua e tono maira, ko ta te Atua rai tuatua tana e tuatua ra: kare oki te Atua i oronga rikiriki ua mai i te Vaerua nona.

³⁵ Te akaperepere nei te Metua i te Tamaiti ra, e kua oronga ua mai i te au mea katoa ki tona rima.

³⁶ Ko te akarongo i te Tamaiti ra, e ora mutukore tona: e te kore e akarongo i te Tamaiti ra, kare aia e kite i te ora; te vai ra ïa te riri o te Atua ki runga iaia.