Esetera 7 - Bibilia Tapu

PENE VII - 7

Te pati rā Esetera kia ora aia ma tona iti-tangata. Riiā Hamana ra i runga i te ringa i akatuia e ia no Moredekai.

¹ KUA aere iora te ariki raua ko Hamana e inu ki o te ariki vaine ra ki o Esetera.

² Kua karanga akaou atura te ariki kia Esetera i te inumanga wina i te rā rua ra, Eaa toou anoano, e te ariki vaine e Esetera? ka orongaia atu ïa kia koe: eaa taau e pati mai? ka akatikaia ïa e tae ua atu ki tetai veenga i te basileia nei.

³ Kua tuatua maira te ariki vaine ko Esetera, kua na ko maira, Te kite aroaia maira au e koe, e te ariki e, e kia tika oki i te ariki, teia toku anoano, kia ora au, teia oki taku e pati atu, kia ora toku ra au tangata:

⁴ Kua oko naia oki matou, ko au e toku ra au tangata kia mate rava, kia ta ravaia, e kia pou takiri. Naringa oki matou i okoia ei tavini tane e ei tavini vaine, kua muteki ua ïa au, kua ngere ra te ariki i reira, kare oki e puapinga na ta te enemi kia apai mai.

⁵ Kua karanga atura te ariki ra ko Ahasueru, kua na ko atura ki te ariki vaine ra kia Esetera, Koai ïa tangata, e teiea ïa, tei akakiia tona ngakau e akapera?

⁶ Kua tuatua mairā Esetera ra, Ko te tangata ekai ra e te enemi, ko teianei ïa tangata kino ko Hamana. Mataku rava akerā Hamana i mua i te aroaro o te ariki e te ariki vaine ra.

⁷ Kua tu akera te ariki i taua inumanga wina ra ma te riri, aere atura ki roto i te koro i te are o te ariki ra: kua tu mairā Hamana kua pati akatenga i te ariki vaine ia Esetera kia ora; kua kite iora e te akakoro ra te ariki i te kino nona.

⁸ Kua oki maira te ariki mei roto mai i te koro i te are o te ariki ra ki roto i te ngai inumanga wina ra; rokoia mai te tipapa ua rā Hamana ki runga i te roi i moeia e Esetera ra. Te tuatua ua ra te ariki, E rave ainei oki aia i te ariki vaine i mua i toku aroaro nei i roto i te are? Tei te mama anga atu taua tuatua ra mei roto mai i te vaa o te ariki, kua tapoki atura ratou i to Hamana mata.

⁹ Kua karanga atura tetai tavini ariki ko Harabona ki mua i te ariki, I na katoa te ringa e rima ngauru i te kubiti i te teitei, ta Hamana i akatu no Moredekai, nana te tuatua meitaki i te ariki ra, te tu ua ra ïa i roto i te are o Hamana. Kua karanga atura te ariki, Ka ri iaia i runga.

¹⁰ Kua ri atura ratou ia Hamana ki runga i te ringa i akatuia e ia no Moredekai. Anga akera te riri o te ariki.