Ebera 6 - Bibilia Tapu

PENE VI - 6

Te ako marie ra, eiaa e akaruke i te akarongo, e irinaki ra i te tuatua a te Atua.

¹ E TEIANEI e vaio atu ana i te tuatua mua o te Mesia; e aere rai tatou ki mua i te pakari mou ra; eiaa ma te akamou akaou i te tumu ra, i te tataraara i te angaanga mate, e te akarongo i te Atua ra,

² E te tuatua o te au bapetizoanga, e te tuku anga rima ra, e te tuakaouanga o tei mate ra, e te akavaanga mutu kore ra.

³ E na reira oki tatou kia tika i te Atua ra.

⁴ Ko te aronga oki i akamāramaia ra, e kua kite i te oronga o te rangi ra, e kua rauka te Vaerua Tapu,

⁵ E kua tongi i te tuatua meitaki a te Atua ra, e te mana o te tuatau a muri atu,

⁶ E akaruke atu rai, kare rava e tika kia akatupu akaou i te tataraara ia ratou, ka akasatauro akaou ei ratou i te Tamaiti a te Atua e ka akariro akakite ua iaia ei akakinoanga.

⁷ Ko te enua oki e inu i te ua e topa putuputu ki rungao ra, e kua akaputu mai i te kai meitaki na te aronga i tanu ra, kua akameitakiia ïa e te Atua:

⁸ Kareka tei akatupu mai i te tataramoa e te au rakau taratara ra, kua akakinoia ïa, e kua vaitata i te taumaaia; ko te ai oki tona openga.

⁹ Kareka kotou, e aku au akaperepere, te manako nei matou e meitaki to kotou i to te reira; te meitaki i kapiti katoaia i te ora ra, tuatua ua atu ei matou i taua tuatua nei.

¹⁰ Kare te Atua i te Atua tuatua-tika kore, ka akangaro atu ei aia i ta kotou angaanga i rave, e to kotou anoano, i tona ingoa i akakite puia e kotou na, ko kotou i matuapuru i te aronga tapu, e te matuapuru ua ra oki kotou.

¹¹ E te inangaro nei matou kia akakite tamou marie rai kotou katoa i taua maroiroi ra, kia rauka te irinaki kite pu tikai e tae ua atu ki te openga:

¹² Kia kore e akatau, ei aru ra i te aronga i rauka tei tuatuaia maira i te akarongo e te akakoromaki.

¹³ Ka tuatua mai ei oki te Atua i tana tuatua kia Aberahama ra, no te mea kare atu e mea mana atu kia taputou aia, kua taputou iora iaia uaorai, I te na ko anga e,

¹⁴ “E akameitaki roa au ia koe na, e akamaata rava au ia koe.”

¹⁵ E roa akera tona akakoromaki marie anga, rauka iora iaia tei tuatuaia maria.

¹⁶ E taputou oki te tangata nei i tei maata atu ra, e te akaoti anga i te au tauetonoanga katoa ra, koia te taputou akatinamou nei.

¹⁷ Koia oki te Atua, inangaro akera aia i te akakite pu mai i te aronga tuanga i tei tuatuaia maira, i te tu ke kore o tana akakoroanga, akatinamou atura i te taputou.

¹⁸ Kia maata to tatou rekareka i aua nga tuatua tu ke kore e rua ra, ko tei kore e tika i te Atua kia pikikaa ra, ko tatou, ko tei oro i te irinakianga i tukuia mai ki mua ia tatou, kia rauka ei akapuanga.

¹⁹ Ko ta tatou ïa tutau no te vaerua, e mea mauti kore e te mou meitaki, no te mea kua akamouia i te ngai i roto mai i te paruru ra;

²⁰ I te ngai i tomokia e to tatou momua, e Iesu, ko tei akariroia ei taunga maata e tuatau ua atu, mei ia Melekizedeka ra.